هندي رسنیو د دغه هېواد د چارواکو له قوله راپور ورکړی چې چابهار بندر له افغانستان او منځنۍ اسیا سره د سوداګریزو اړیکو د اقتصادي پراختیا لپاره مهمه بدیله لار ده. راپور د چارواکو له خولې زیاته کړې چې دغه لار د هند او ایران دواړو لپاره دوه اړخیزې ګټې لري. دغه راپور وروسته له هغې خپریږي چې د امریکا د خزانې وزارت پر ایران د بندیزونو په لړ کې چابهار بندر، چې هند او ایران یې تېر کال د پراختیا ۱۰ کلن تړون لاسلیک کړی و، هم شامل کړی دی.