السلام عليكم ورحمة الله وبركاته صباح الخير يا شباب النهارده 21 شعبان❗️ استعدادك لرمضان مش بس بعبادات القلب، لكن كمان لازم جسمك يكون جاهز للطاعة.. وده مش هيحصل لو كنت دايمًا تقيل من الأكل! كتير بنشتكي من الخمول بعد الفطار، الكسل في الصلاة، وعدم التركيز في العبادة.. وده بسبب إننا مش بندي جسمنا فرصة يرتاح!! النبي ﷺ قال: "ما ملأَ آدميٌّ وعاءً شرًّا مِن بطنٍ، بحسبِ ابنِ آدمَ أُكُلاتٌ يُقمنَ صُلبَهُ، فإن كانَ لا محالةَ فثُلثٌ لطعامِهِ، وثُلثٌ لشرابِهِ، وثُلثٌ لنفَسِهِ".. فعشان جسمك يستعد لرمضان صح: ✅ لو كنت بتاكل كتير، فأنت محتاج تقلل أكلك بالتدريج؛ عشان جسمك يتأقلم على الصيام بسهولة. ✅ مش كل ما تحس بالجوع تاكل لغاية ما تشبع، جرب تشرب مايه أو تاكل حاجة خفيفة. ✅ نفذ الوصية في الحديث، واعمل توازن بين الأكل والشرب والنفس. ✅ جدد نيتك في الأكل وخليه وسيلة مش غاية.. وسيلة تقوي جسمك عشان تقدر تأدي عباداتك لله، وتأدي شغلك المطلوب منك في الدنيا. ✅ افتكر إن الأكل المتوازن اللي بيخليك خفيف = ذهن أصفى، جسم أقوى، أداء أفضل في حياتك كلها. "اللهم بلغنا رمضان، وأعنَّا على حسن استقباله" 🤲 > د.محمد الغليظ