*#أفلا_يتدبرون |* *#اسم_الله_الكافي* *عارف يعني إيه تبقى متطمن مهما حصل؟*🌷🌷 يعني تبقى شايف الدنيا بتتقلب حواليك، والهموم بتزيد، والناس بتخذلك، ورغم كده قلبك ثابت، مفيش جواك ذرة خوف.. عارف ليه؟ لأنك مؤمن بإن فيه إله، شايفك، سامعك، وعالم باللي جواك حتى اللي مش قادر تحكيه. “فَسَيَكْفِيكَهُمُ اللَّهُ وَهُوَ السَّمِيعُ الْعَلِيمُ” الآية دي مش مجرد كلمات.. دي وعد، رسالة من ربنا ليك في كل مرة تحس إن الحمل تقيل، إن الدنيا بتضيق عليك، إنك مش قادر تواجه.. ربنا بيقولك “أنا كافيك”، فليه لسه خايف؟ الكفاية مش بس رزق، الكفاية سكينة في القلب.. إنك تصحى الصبح وانت عارف إنك مش لوحدك، إن اللي خلقك مش هيسيبك، وإن الخير جاي حتى لو متأخر. النبي ﷺ كان في أصعب المواقف لما نزلت الآية دي، وكأنها كانت طمأنينة من ربنا، وعد بالنصرة، إن مهما زاد الأذى، فالكافي لا يعجزه شيء. سيبها عليه، ومتقلقش.. الكافي مبيخذلش اللي استكفى به. قولها بيقين: “اللهم اكفني بحلالك عن حرامك، واغنني بفضلك عمن سواك..” واطمن.. لأنك في معية الله. #خطوات_علي_طريق_التعافي