श्रीदत्तस्वरुप विनायकराव वासुदेव साठे विरचित "वासुदेवचरित" संन्यास घेतला पत्नी मृत होतां । प्रेषोच्चार दिला दत्तजींनीं II१II नारायण स्वामी त्यांचे करवोनियां । दंड गुरुराया तुम्हां प्राप्त II२II योजना दत्ताची हीच सिद्ध झाली । इच्छा प्राप्त झाली संन्यासाची II३II आसेतु हिमाचल पायांनीं फिरलां । प्रसारित केला श्रौतधर्म II४II पूर्वीं आचार्यांनीं धर्म प्रकाशिला । तोच तुवां केला प्रकट कीं II५II सर्वत्र पायींच प्रवास कीं केला । देवराया भला वासुदेवा II६II वाहनांत कधीं नाहींच बैसलां । पायींच फिरलां गुरुराया II७II दत्त-उपासना सर्वत्र विस्तारिळी । भजनाची केली जनां आज्ञा II८II कलि युगीं एक भजनचि सार । हाच कीं विस्तार केला तुवां II९II स्वयें त्वां मुखानें भजन बहु केलें । रचोनि ठेविले नाना ग्रंथ II१०II आचार विचार सकळ जनतेसी । ऐसा शिकविलासी वासुदेवा II११II विनायक म्हणे सद्गुरु माउली । कृपेची साउली मज करी II१२II