🧵 *Silsila Kitab-ul-Fiqh* *Namaz ka Baab* _#31_ *Mayyit Ko Ghusl Dene Ka Masnoon Tareeqa:* *Samaan-e-Ghusl:* *1:* Ghusl ka takhta *2:* Qainchi *3:* Chhoti chaadar do adad *4:* Saabun *5:* Toliya do adad *6:* Mushk aur kafoor *7:* Dastaane ya shopper *8:* Paani ke 2 tub *9:* Paani daalne ke liye 2 dabbe *10:* Beri ke patte *11:* Rooi *12:* Tissue paper/Dheley *13:* Kafan *14:* Chaarpaai Mayyit ko sunnat ke mutaabiq ghusl dene mein jo maraahil pesh aate hain unhein bit-tarteeb tehreer kiya jaata hai: *1:* Mayyit ko jis takhte par ghusl diya jaaye usko teen ya paanch ya saat dafa lobaan ki dhuni deni chahiye. Phir mayyit ko is par is tarah litaaye ke qibla uski daayi taraf ho. *2:* Mayyit ke badan ke kapray maslan sherwaani, baniyan waghera chaak kar le aur tehband uske satr par daal kar andar hi andar woh kapray utaar le. Yeh tehband lambaai mein naaf se pindli tak aur mote kapray ka hona chahiye keh geela hone ke baad andar ka badan nazar na aaye. *3:* Naaf se lekar raano tak mayyit ka badan dekhna jaaiz nahi aur aisi jagah haath lagana bhi jaaiz nahi. Mayyit ko istinjaa karaane aur ghusl dene mein is jagah ke liye dastaane pehen lene chahiye ya kapra haath par lapet lena chahiye kyunki jis jagah zindagi mein haath lagana jaaiz nahi waha marne ke baad bhi dastaano ke baghair haath lagana jaaiz nahi aur nigah daalna bhi jaaiz nahi. Ghusl shuru karne se pehle baaye haath mein dastana pehen kar mitti ke teen ya paanch dhelo ya tissue papers se istinjaa karaye aur phir paani se paak kare. *4:* Mayyit ko wuzu karaaye. Wuzu mein ghatton tak haath dhulwaye, na kulli karaaye aur na hi naak mein paani daale balki rooi ka phaaya tar kar ke honto, daanton aur masooron par pher kar phenk de. Isi tarah yeh amal teen dafa kare. Phir isi tarah naak ke dono suraakho ko rooi ke phaaye se saaf kare. *Wazaahat:* Agar inteqaal aisi haalat mein hua ho ke mayyit par ghusl farz ho (maslan kisi shakhs ka janaabat ki haalat mein ya kisi aurat ka haiz-o-nifaas ki haalat mein inteqaal ho jaaye) to bhi munh aur naak mein paani daalna durust nahi hai. Albatta daanto aur naak mein tar kapra pher diya jaaye to behtar hai magar zaroori nahi hai. Phir naak, munh aur kaano mein rooi rakh de taake wuzu aur ghusl ke dauraan paani andar na jaaye. Phir munh dhulwaaye, phir haath kohniyo samet dhulwaye, phir sar ka masah karaye, phir teen dafa dono pair dhulwaye. *5:* Jab wuzu mukammal ho jaaye to sar ko aur agar mard ho to darhi ko bhi gul khairo, khatmi, ber ya saabun waghera se mal kar dhoye. *6:* Phir usey baaye karwat litaaye aur beri ke patton mein pakaaya hua neem garam paani daayi karwat par teen dafa sar se paon tak itna daale ke neeche ki jaanib baaye karwat tak pohonch jaaye. *7:* Phir daayi karwat litaa kar isi tarah se sar se pair tak teen dafa itna paani daale ke neeche ki jaanib daayi karwat tak pohonch jaaye. *8:* Iske baad mayyit ko apne badan ki tek laga kar zara bithaane ke qareeb kar de aur uske pet ko upar se neeche ki taraf aahista aahista maley aur dabaaye. Agar kuch (peshab ya paikhana waghera) khaarij ho to sirf usko ponch kar dho de, wuzu aur ghusl dohraane ki zaroorat nahi kyunki is napaaki ke nikalne se mayyit ke wuzu aur ghusl mein koi nuqsaan nahi aata. *9:* Phir usey baaye karwat par litaa kar daayi karwat par kaafoor mila paani sar se pair tak teen dafa khoob baha de ke neeche baaye karwat bhi khoob tar ho jaaye. Phir doosra dastana pehen kar saara badan kisi kapray se sukha kar doosra sukha kapra lapet de. *10:* Phir chaarpai par kafan ke kapray is tareeqe se upar neeche bichaayen jo aage kafan pehnaane ke masnoon tareeqa mein aa raha hai. Phir mayyit ko aaraam se ghusl ke takhte se utha kar kafan ke upar lita den aur naak, kaan aur munh se rooi nikal de. (*Note:* _Masa'il Hanafi Fiqh ke aitebaar se hai._) ⭕️⭕️⭕️⭕️⭕️⭕️⭕️⭕️⭕️⭕️⭕️