ملاحظات هامه بخصوص الوظائف وسوق العمل في مصر : ------------------------------------------------------------------------ ١- ياريت كل واحد شباب أو بنات يحاولوا يشوفوا شغل تاني اضافي بجانب شغلهم الأساسي دا في حاله لو هما شغالين لان القطاع الخاص لايرحم أحد ولا يوجد به استقرار نهائي مهما كان وضع وموقف واسم الشركه او المكان ..الخ ------------------------------------------------------------------------ ٢- في حاله عدم وجود شغل اصلا لازم تقدم تنازل بمعنى مش شرط تشتغل بمؤهلك أو تخصص لو انت مؤهل عالي أو حتى مؤهل متوسط او حتى بدون مؤهل اشتغل اي شغل حلال حتى لو متعب أو مش بتحبه أنا عارف اصلا ان الواحد عشان يشتغل اصلا شئ متعب جدا بس أدينا بنحاول ..الخ. ------------------------------------------------------------------------ ٣- مش شرط يبقا الشغل في نفس المحافظه بتاعتك أو نفس المكان اللي انت فيه لو محافظه تانيه عادي لو مكان تاني عادي لو هتاخد سكن مفيش مشكله اي شغل وانا عارف ان دا صعب بالنسبه للمتزوجين أو اللي عنده ظروف قهريه بس لازم نقدم تنازلات مفيش حاجه كامله ..الخ. ------------------------------------------------------------------------ ٤- مش شرط أعلان الوظيفه اللي هنقدم عليه يكون مناسب لينا ميه في الميه عشان نتصل بيه حتى لو الاعلان مش مناسب معانا ممكن تتصل عادي تعرض خبراتك وسنك وتقول لصاحب الإعلان انك بتدور على شغل فلاني هوا ممكن يدلك على مكان أن يفيدك مش هتخسر حاجه دي مكالمه .. على سبيل المثال سواق درجه اولى لقى اعلان أنهم محتاجين سواق درجه ثانيه ايه المانع أنه يتصل يعرض عليهم جايز يبقا خير مش خسران حاجه المثال دا للتوضيح ...الخ . ------------------------------------------------------------------------ ٥- لازم نطور نفسنا باستمرار في المجال بتاعنا أيا كان تخصصنا ومؤهلنا ايه سوق العمل أصبح صعب جدا والمنافسة فيه كتير اوي وصاحب العمل بيدور على أعلى خبره بأقل مرتب لازم نتعلم اي حاجه لازم نقرأ اي حاجه لازم نتطور في اي حاجه .. الخ . ------------------------------------------------------------------------ ٦- بالنسبه للبنات أو السيدات ياريت اصلا متشتغلوش الا لو ظروفكم اجبرتكم على كدا لأن السوق أصبح ملئ بالنصب والاحتيال وعدم الأمان ..الخ . ------------------------------------------------------------------------ ٧- محدش يآمن لاي شغل خاص هوا فيه لانك في اي وقت ممكن المكان يصفي أو يقفل أو يظلمك ويمشيك لاي سبب سواء ظلم اولا فلازم تكون عامل حاسبك ليوم زي دا حاول على قد ما تقدر تحوش فلوس عشان توجه الفتره اللي هتقعد فيها بدون شغل أو تتعلم مهاره جديده أن تتعلم صنعه جديده مش عيب حتى لو انت مؤهل عالي ولو معاك فلوس وعرفت تفتح مشروع صغير إلى جانب شغلك افتح اهم حاجه تأمن نفسك من غدر وعدم امان واستقرار القطاع الخاص ايا كان هوا ايه مصنع أو شركه او مؤسسه أو هيئه أو محل ... الخ . ------------------------------------------------------------------------ ٨- خلوا علاقتكم بالناس اللي معاكم في الشغل على قد ماتقدروا كويسه متقطعوش مع بعض احنا كلنا في دنيا هنحتاج لبعض بطريقه مباشره او غير مباشره بقصد او بدون قصد ولو مش هنحتاج لبعض يكفينا العلاقات الطيبه والسيرة الحسنه وتذكروا أن العلاقات بتجيب شغل وبتفتح سكك الخير .. الخ . ------------------------------------------------------------------------ ٩- سوق العمل في مصر كل يوم يصبح اسوا من اليوم اللي قبله دا مش احباط دا واقع احنا عايشينه ياريت نعمل حساب حاجه زي كدا ونأمن نفسنا بقدر الإمكان .. الخ . ------------------------------------------------------------------------ ١٠- اخر حاجه الدوله متعرفش عننا اي حاجه اقصد الناس اللي في القطاع الخاص يعني محدش بيحس بينا غير بعضنا بعد ربنا طبعا فقط احنا اللي بنطبطب على بعض وبنحس ببعض وبنشجع بعض وبنحاول نساعد بعض ونفتح سكك لبعض ونشوف ثغرات وفرص نحاول ونعافر بيها مع بعض للاسف الموضوع سئ اوي ولازم كلنا نساعد بعض عشان كدا بننزل وظائف للناس ونعمل جروبات في سبيل مساعده الناس كلها من كل المحافظات وانا مش باخد فلوس نهائي من اليوتيوب او التليجرام أو الفيس بوك .. الوظائف دا كلها صدقه لوجه الله عني وعن جميع الناس .. لعل حد يائس يلاقي وظيفه تكون سبب بعد ربنا انو يشتغل مين عارف احنا بنسعى ونساعد ... الخ بالتوفيق للجميع مستر / حسين السيد (وظائف جميع محافظات مصر + وظائف دوله سوريا + وظائف دوله لبنان+ وظائف دوله اليمن)