جنو🐸
February 8, 2025 at 12:01 PM
*#داري《01》*
*#بقلم_نودين &ننس تمدين*
*ہہہـ٨ــــ♥︎ہہہـ٨ــــ♥︎ہــہہہـ٨ــــ❥ :00:00* **
"لستُ إمرأة عادية،
أنا التي تخلق من رحم الحُزن..
نصوصٍ معبرة،
ورسومٍ مدهشة،
أنا من تُجيد صياغة الأحزان بشكلٍ يُبهرك "))
"بلسان نُود"
طلعتا من الحمام بعد ما ظبطا طرحتي .. مُستحيل يمر علي يوم بدون ما أتذكر بابا وأبكيهُ .. كان صاحبي وأخوي وصندوق أسراري حتى أكتر من ماما .. كان حته من قلبي بحب يفرحني ويسعدني بكافة الطُرق .. صح بعد وفاته لا ماما قصرت ولا أي زول بِعرفنا بس فرقتهُ مستحيل تتملي.
أنا بحاول بكل طاقتي أعدي الأيام والشهور والسنين والحياة .. وبتمنى بس المرة الجاية يكون دوري عشان ألحقه بسرعة .. حاسة كمية الشوق دي ما ح تتروي إلا بشوفتهُ.
مشيت على طاولة عليها أربعة كراسي فيها أصحابي وزُملائي في العمل .. من الآخر يجماعة أخواني وأيوة أنا رغاية.
_وين فطوري وقهوتي وتلفوني؟
=بما إنك ليك ساعة في الحمام فما عملنا حسابك لأنو ح تقولي الأكل بارد والقهوة باردة وحركاتك المُعتادة دي .. وتلفونك مع كريم تقريباً بِحول قصيدة من قصائدك البتصدعينا بيها في الطلعة والنزلة دي.
_ننا عيب عليك والله .. أي نعم أنا بتاعت حركات بس من وين جاكم قلب تأكلوا من غيري .. وكريم الزفت شايل تلفوني وحايم بيهو وين؟
"عزيز إتنحنح" : أنا مُستنيك ما أكلتا.
_كرعلي يا عشاي .. ما إنت ود حلال وأصيل ما زي ناس كدا.
=سامع تشكيرات هنا وما سمعتا إسمي!
_كريم ناولني تلفوني وإترزع أفطر عشان الزمن.
=معليش قُلتي تلفوني ولا أنا سمعتا غلط!؟
_قصدي تلفونا .. كده صح؟
"ننا بقت تضحك" : الود كريم الوحيد المؤدبك .. يلا تستاهلي.
_أصبري لي حسابك بعدين إنتِ التانية.
"عزيز إتدخل": ناكل يا شباب عشان الإجتماع.
ننا ختت يدها على خدها وقالت: والله عزيز ده بشتغل شغل بتاع ناس كويسين ومُخلصين .. ده عبدو يعني؟
_عبدو في عينك .. كملي أكلك هو قال في إجتماع طاريء ولازم نكون موجودين.
نود ردت:
=عاد ما هو ظريف .. مرته تشاكله في البيت يجي يبلنا نحنا.
_نود إتلمي ووطي صوتك وصلحي الطرحه دي.
_كريم تصدق وتأمن بالله أنا كنت بحمد ربنا كل يوم إنو ما عندي أخ ولد .. ظهرت لي من وين إنت أعوذ بالله.
_ما عاوز لماضة.
طلعت ليهو لساني وأنا بكاويه.
كالعادة عزيز ببتسم وبطلعنا شُفع وننا خاته سماعتها وما شغالة بينا .. خلصنا فطورنا بصورة سريعة ومشينا غرفة الإجتماعات.
غرفة كبيرة وواسعة عليها أكتر من عشرة كراسي .. المُدير واقف كالعادة وبطنه مترين والرؤساء جنبه وبعدو الموظفين ..كُنت بشاغل في عزيز بحواجبي محنني شديد طبعاً ود مؤدب ومتربي مرتين.
المدير وقف وإبتسم إبتسامة عريضة .. ننا طوالي همست لي:
_أنا شايفة يفضل مُكشر أحسن .. ده لو إبتسم زيادة هيبلعنا.
=ننا أنا شايفة تسكتي خالص .. كل مرة بقرر أتوب بتخليني أوزع حسناتي .. إتخيلي أقيف في القنطرة عشان أب جلحات ده؟
المدير قال:
أحم أحم .. صباح الخير يا جماعة طبعاً كالعادة نود والمعاها مُتأخرين ومؤخرننا عن الإجتماع.
بس مع ذلك حابي أعيد التهنئة ليهم لأنهم رفعوا رأسنا السنة الفاتت بجائزة أفضل صحفيين في الولاية وكمان أفضل صحفيين في جريدة "الحياة" أنا فخور بيكم وبشغلكم جدًا .. وزي ما عارفين نحنا على مشارف أواخر السنة والمسابقة السنوية البتعملها الدولة ح تبدأ من الأسبوع الجاي وكالعادة معروف الجائزة ح تكون من نصيب خمس جرائد من وسط مليون جريدة ومجلة .. وعشان نحنا جريدة ما هينة وحصلنا على عدد من الجوائز .. قررنا ك إدارة إنو المرة دي نختار:
عبد العزيز أحمد الغزالي
وإيناس أدم تمدين
ونود محمد الهاشمي
وكريم محمد الزمراوي.
عشان يختاروا المواضيع ويطلعوا لينا بجريدة لآخر السنة وكمان للمسابقة .. عاوزكم تشدوا حيلكم وتطلعوا لينا بأفضل المواضيع يا شباب.
خلص الاجتماع بعد ما المدير وضح لينا النقاط الأساسية وخت مسؤولية كبيرة على عاتقنا .. طول اليوم كنا شغالين عادي وفي نفس الوقت كل واحد الموضوع بقى شاغل بالو وإحترنا نتكلم عن شنو بالضبط .. لحدي أخر الدوام وأنا بشيل شنطتي جاني كريم:
_يلا أطلعي مستنينك.
لبستا نظارتي الشمسية _ الليموزين جاهزة؟
_أيوة يا مُوزمازيل نود جاهزة تحت أمرك.
طلعتا النظارة وصريت وشي _ بطل تريقة.
_لما تخلي خيالك الواسع ده .. وبالمناسبة عازم نفسي عندكم شاي لبن.
_كريم صراحة وما تخجل مني أنا زي أختك يعني .. أنت اهلك ديل متبرين منك .. مانعيين منك السكر ولا رافعين اللبن فوق راس الدولاب؟
_ما عشان بفطر عندكم كل جمعة وبغسل غياراتي كل يومين وبتغدا أحيانًا وبشرب شاي اللبن بعد المغرب كل خميس معناها أهلي متبريين مني .. لا يا نود ما حمدتها منك.
_أحلف كده؟
طلعنا ولِحقنا ننا وعزيز اللي كانوا بتناقشوا في نفس الموضوع للمرة الألف وستمية وخمسين وصوتهم عالي:
_يا عزيز أنا كل مرة طالعة لناس البيت بعُذر .. صراحة تعبتا عديل كدا.
_تعبتي من شنو !!
إيناس أنا بشتغل دوامين على بعض .. وكل جمعة طُلبة وغيرو وغيرو عشان أتم البُنا وألم حق الدبلة وأجي أتقدم وأنا رافع راسي._طيب ده كله ليه لما إنت ممكن تمشي لعمك وتطلب ورثك عادي!؟
_إيناس ما تفتحي السيرة دي تاني .. مش هو عارف إنو ده حقنا وماكلو .. لا بسألو لا حاجة .. عاوزة تستني يا بت الناس كان بها ما عاوزة تستني .. تستني رجالة.
أنا وكريم فكيناها ضحكة لحدي ما إنتبهوا لوجودنا .. كريم إتقدم ومسك عزيز من كتفه وهو بقول:
_راجل والله يا صحبي .. يا إيناس إنتِ عاوزة تصلي وين يعني .. غير عزيز ده ماف ليك أي راجل إنتظري ساي.
_خليها دي مجنونة ساي.
_أنا مجنونة يا عزيز !؟
_لا ده لزوم أرد على كريم وكده.
_تهرشك أحيييييييا أنا ..!
كريم حمر لي_نود: ما حذرتك من الحركة دي أنا؟
ننا بمكاوة_بركة قبلوا عليك.
عزيز قال لينا_يلا يلا قدامي بالله.
ركبنا المواصلات عزيز وكريم قدامنا ونحن ورا .. وِصلنا الحِلة ♡!
خلوني أقول وِصلنا البيت لأنه حلتنا هي بيتنا حرفياً .. أي بيت نحنا دخلنا فيه وبنعرف ناسهُ .. يُمكن من 15 سنة ساكنين هنا وما ملينا من بعض .. وياما بكينا وضحكنا وطلعنا فرشنا الشارع بالفراشات وعملنا عشاء جماعي أو قعدة قهوة لنص الليل .. بقينا أكتر من أهل .. حقيقي الجار قبل الدار.
مما تجي داخل بلاقيك دكان عم حسن وقدامه شجرتين قاعدة تحتهم خالتو زينب ست الشاي وحواليها شباب الحلة .. على الجنبة اليمين ميدان كورة .. قدام الظلط تتقدم شوية تلقى شجر كتير وده ياهو بيت ناس كريم لان أمه بتحب الزرع .. لصقه بيت ناس إيناس .. وقدامه شجرة فايكس كبيرة وضليلة .. قصادهُ بيت ناس عزيز وجنبه بيت حبوبة كريم وبعدو بيتنا .. وتتوالى بيوت الأحباب والأصحاب .. عزيز دخل بيتهم بعدما صالح ننا بكلمتين حلوات وهي فصلت.
اللي بشوفهم لحظة الزعل بقول حيشيلوا في خاطرهم من بعض كتير .. بس عمرو ما مر يوم وهم زعلانين من بعض♡
ودعتنا أنا وكريم وجرت على بيتهم وهي بتبتسم.
فضلنا ماشين أنا وكريم جنب بعض .. كان بشاغل في أي خالة تجي ماشة وأي ولد صغير ويلعب معاهم بالكورة .. بحس كريم عندو طاقة حب زايدة والله وبال طويل وحنية تكفي بلد.
لما وصلنا قدام البيت لقيت المكان نضيف ومرشوش بالموية .. بحب المنظر ده وحقيقي قادر يشيل مني أي تعب حسيته خلال اليوم .. بابا الله يرحمه كان بِطلع كرسيه برة وبقعد في الدرابزين اللي عاملينه قدام البيت وبسقي الشجر .. بمروا بيه ناس الحلة وبونسوهُ لأنه بابو فاتح طول اليوم وجنبو كراسي وصبارة الشاي اللي ما بتفضى خالص .. لحدي الآن ما بعرف أقفل البوابة اللي برة إلا لما يجي زمن النوم .. وحتى لو ح أشرب كباية شاي واحدة بملا الصبارة بنسى إن بطل يكون موجود وما حيرسل يقول عايزا بس مع ذلك إتعودتا .. والإنسان لما يعتاد حاجة ببقى صعب يفك منها.
شكلي وقفتا كتير بتأمل البيت لحدي ما نبهني كريم:
_ما تدخلي حارسة يفضلوك؟
=كريم بيتكم ورا بالمناسبة لو نسيتو يعني قلت أذكرك.
_مالك إنتي يا زولة أنا جاي لخالتو سُنية.
_خالتك سنية بتكون في بيت ناس إيناس ومعاهم خالتو هدى .. عليك الله قد بيتكم وأختاني.
_يا زولة أختيني إنتي دي .. لما أكون ماشي بيتك وقتها إتكلمي.
إتقدمني بخطوات كبيرة وأنا بضحك على حركاته دي .. ضرب الباب مع إنو فاتح .. جات طالعة "مفاز" أختي الأصغر مني سلمت عليهُ .. سألها من ماما وقالت موجودة طوالي عاين لي نظرة إنتصار كدا ورجع يتكلم مع مفاز:
_إتخيلي أختك من قبل نجي عاوزة ترجعني بيتنا بأي طريقة.
=لصقة يا كريم لصقة.
إتجاوزتهم وهم بضحكوا .. سلمت على سُنية ودخلت غرفتنا أنا ووريف ومفاز " أخواتي الإتنين.
وريف بتدرس مختبرات خريجه مع أخو عزيز وأخو كريم..مفاز ممتحنة الشهادة ... برغم من ضيق بيتنا عُمرنا ما فكرنا نرحل منه أو نشوف أوسع منه .. لأنه واسع بحبنا لبعض وبدخلة الجيران والأهل علينا .. بيتنا غُرفتين وصالة ومطبخ وعريشة كبيرة قدامه.
أبوي إتوفى من تلاتة سنوات بس موته مؤثرني لأني البكر وزي ما بقولو البِكر حبيبة أبوها .. غيرت ملابسي ولبست عبايتي ولفيت طرحتي .. من وقت ما عرفت الصح من الغلط والحلال من الحرام وقفت مصافحة وإتحجبت وقاعدة أحاول قدر ما أقدر أبعد عن كريم وعزيز برغم من إنهم زي أخواني وأعز .. بس إحساسي بإنو كده غلط ما مُفارقني.
صليت المغرب لقيت كريم صلى وقاعد بشرب الشاي كالعادة وبتونس مع أمي .. قعدت جنبها وميلت راسي على كتفها .. فقال:
_أمك دي ما حملك يا سمينة.
=كريم على فكرة نزلتا خمسة كيلو والله أسأل وريف لو ما مصدق.
_يا بت أسكتي .. والله يا كريم بتمشي بنظام معين بترجع تحتفل بقالب كيك إتخيل؟
كريم قعد يضحك فيني بس أصلو ما إتحسست ولا إشتغلت بيه مديت يدي ناحية الكيك اللي خاتينه قدامو بس رفعو مني وهو بقول:
_ده عاملاهُ لي سنية براي .. زحي يدك دي.
=خلينا نسألا: صحي يا ماما ؟؟
_كريم معليش المرة دي أديها قطعه صغيرة تطلع نفسها.
_عشااانك بس يا سنسن.
_أنننننننن.
___________________________
"عند عزيز"
رجعت البيت وفيني ضيق ما عارف سببه .. ما اول مرة أنا وإيناس نتكلم في الموضوع دا .. وللأمانة هي صابرة علي شديد بس أنا كمان ما طالع بيدي شي .. قمت لقيت نفسي بعرفا .. ما عارف عمر السنين البينا كم بس مما قمت لقيتها قدامي وحبيتها .. كنت بدافع عنها لما كُنا في المدرسة وبشاكل ليها الأولاد وبضربهم وأي زول يزعلها باخد ليها حقها منو وقتي .. وبمنعها تمشي براها وعامل ليها نود حارس شخصي .. كبرتا لقيتها حب حياتي والحياة أخدتنا .. دوامة ورا دوامة وظرف ورا ظرف .. أبوي إتوفى وأحوالنا المادية إتغيرت وعمي أكل حقنا.
أنا أكبر أخواني .. وبعدي "يوسف" بقرا مختبرات خريج بعدو "نتالي" ودي في الثانوي ممتحنة شهادة .. وأصغر واحد "ياسين" يدابه دخل الثانوي.
دي أسرتي الصغيرة بعد أسرة إيناس ونود وكريم.
بما بس بعتبرهم أعز أصحاب هم أخواني وأسرتي التانية ما حصل إحتجتهم في حاجة وما لقيتهم جنبي دايمًا معاي شدة وفرح ♡!
قاعد أحاول بكل جهدي أشتغل وألملم أطرافي عشان أخطب إيناس وأبعد عنها الكلام خصوصاً آخر فترة بعدما أخوها وأمها بقوا عاوزنها تتزوج بأي طريقة .. لأنها كانت بترفض كل البتقدمو ليها.
أنا ما بقدر ألومها لو قررت تمشي بس ما قادر أتقبل فكرة إنها تكون لغيري .. قُمت ولعنت الشيطان .. أخدت لي حمام سريع ولبست وبعد صليت المغرب طوالي طلعت على شغلي التاني .."ميكانيكي في ورشة".
______________________
"عند إيناس"
أسرار كانت بتضفر لي شعري وأنا سرحانه بعيد وكل مرة بتخيل إني ما لعزيز بحس بوجع في قلبي .. حبيته كيف ومتين ما عارفة .. بس الواثقة منو ومتأكدة إني مستحيل أتخلى عنه لأي سبب كان.
_ياااخي براحه ما تشدي لي شعري كدا.
_ثبتي راسك طيب.
جات أمي ختت كانون الشاي ونقلت باقي العدة .. كُنا مفرشين الحوش بتلاتة سراير .. أبوي راقد ومشغل جنبه الراديو وبسمع في الكورة .. وأمي بتعمل لينا في شاي المغرب .. أسرار خلصت لي الضفائر .. صورتهم ورسلتهم لنود .. قفلت التلفون وبقيت أتونس مع ناس البيت.
بحب أسرتنا البسيطه وبحب لمتنا دي .. نتونس ونضحك ونتكلم لساعة متأخرة من الليل .. أبوي بيحكي لينا عن شغله زمان في الجيش وأمي بتحكي لينا عن زمنهم وزمن حبوباتنا وأسرار كالعادة بتشكي من الدراسة والإمتحانات .. وأنا بصدعهم بجريدتنا الرهيبة وبحكي ليهم عن إنجازاتنا.
_إتشطري كده وأعملي جريدة براك.
_أدونا سنتين تلاتة ح نعملها والله بإذن الله.
_علو مع كريم والجماعه الطيبين ديل .. أنا مستغربة أصلًا كيف للآن شغالين بدون تعملوا مشاكلكم وعوارتكم البتسوها هنا دي.
_يا أمي الشغل شغل .. لكن هنا أصلًا نحنا شفع وصغار.
أبوي قال_أخوك إتصل قبيل وقال ترجعي ليهو ضروري.
_هو ما ناوي ينزل قريب !؟
_قال لما ينوي للعرس بنزل.
_أها حلو.
أسرار همست لي _عاوزك لموضوع ود عمك داك أوعك ترجعي ليهو.
_أحم .. خلاص كده بقوم أرجع ليهو.
قمتٓ ودخلتٓ جوه إتصلت لـ نود .. رد علي كريم بـ
_عاوزة شنو مش قبيل كنتوا سوا؟
_كريم إنت يا ود ما عندكم بيت !؟
_ما عندنا ..ح تقولي عاوزة شنو ولا أقفل؟
_ووووبعلي لكن ما قادرة عليك ..
_خلاص خلاص هاك ما تصدعينا.
_ها يا حبي .. معليش كريم بتعاور كالعادة أعذريه عيان دا.
_أطردي الود ده.
_كان على عيني بس الست ماما بتحبهُ وعاملة ليه كيك بشاي وميتة من الضحك على النكت السخيفة البقولا .. ما علينا في شنو مالك متصلة الزمن دا؟
_ألبسي عبايتك تعاليني حالاً.
_لابساها أصلًا .. في مصيبة ولا شنو !؟
_قولي مصائب.
_اللهم بارك .. طيب جاية عليك.
______________________
"عند كريم"
طلعتٓ مع نود .. قدمتها دخلت بيت ناس إيناس وأنا دخلت بيتنا .. لاقيت روان كالعادة جضمتها بعدين دخلت سلمت على البقية بعدها دخلت الصالون .. كُنت مرهق وما فاهم حاجه ليومي غير إني كل يوم بتكفي على وشي وبحب نود زيادة وهي ما جايبة خبري حتى .. أو جايبة بس بتستهبل وما عاوزة تديني أمل.
سألتا من "علي بيدرس مختبرات وعثمان أسنان" أخواني الأصغر مني .. روان قالت لي مشوا الكورة ولسة ما جو .. إتدوشتا و فتحت تلفوني .. نود عندها اسكربيتات كده بتنزلها كل يوم الساعة 7 بكون مُنتظرها بفارغ الصبر .. بس قبل أفتح صفحتها وأتصفح زي الناس جاني تلفون من يوسف رديت.
_يا باشا.
_أسمعني ما تتخلع لو جنبك أي زول .. بس شيل قروش من عم حسن قول ليهو حساب يوسف وجيب معاك بطاقتك وتعال لي .. وما تكلم عبد العزيز.
_إنت وين يا زول؟؟
_في قسم "..."
______________________
*☆☆••••••••••••••••••••••••••••••• *يتبــــــــــــــــــــــــــــــــــــــــــــع*••••••••••••••• *TABO*•••••••••••••••••• *☆☆*
❤️
1