زندگی کا خوبصورت فلسفہ – تقسیم میں اضافہ ہے کہتے ہیں کہ ایک اور ایک دو ہوتے ہیں، مگر دو بھائی جب گلے ملتے ہیں تو ایک ہو جاتے ہیں۔ ریاضی کہتی ہے کہ 1+1=2 مگر میاں بیوی کا رشتہ بتاتا ہے کہ یہ تعلق صرف دو افراد کا نہیں رہتا، یہ نسلوں کی بنیاد رکھتا ہے، 1+1=3 بھی ہوتا ہے۔ ہم نے سیکھا تھا کہ تقسیم کرنے سے چیزیں کم ہو جاتی ہیں، مگر زندگی نے سکھایا کہ چیزیں بانٹنے سے کم نہیں ہوتیں بلکہ بڑھتی ہیں۔ محبت، خوشی، علم، اور رزق – یہ وہ نعمتیں ہیں جو تقسیم کرنے سے کم نہیں ہوتیں، بلکہ دُگنی ہو جاتی ہیں۔ چراغ سے چراغ جلانے سے روشنی کم نہیں ہوتی، بلکہ اندھیرے ختم ہوتے ہیں۔ کسی کو مسکراہٹ دینا آپ کے ہونٹوں سے خوشی نہیں چھینتا، بلکہ دوسروں کے چہرے پر روشنی بکھیر دیتا ہے۔ کسی کا دل خوش کرنے سے آپ کا اپنا دل بھی ہلکا اور خوش ہو جاتا ہے۔ پانی جو رُک جائے تو بدبودار ہو جاتا ہے، مگر جو بہتا رہے وہ زندگی دیتا ہے۔ رزق بھی ایسا ہی ہے، اگر روکتا جائے تو گھٹن آ جاتی ہے، مگر جب بانٹا جائے تو برکت بڑھتی ہے۔ دریا اپنے لیے نہیں بہتا، درخت اپنے لیے نہیں پھل دیتا، سورج اپنے لیے نہیں چمکتا، قدرت ہمیں سکھاتی ہے کہ جو دوسروں کے لیے جیتا ہے، وہی اصل میں زندہ رہتا ہے۔ زندگی کا اصل راز؟ جو چیزیں دل سے بانٹو گے، وہ پہلے سے زیادہ ہو جائیں گی، کیونکہ "خوشی تقسیم کرنے سے دُگنی ہو جاتی ہے اور محبت دینے سے کبھی ختم نہیں ہوتی!" تحریر: اسامہ سرور