Jampi-pa kiti hi koi hija, ipijeh a Thadou tedia poimo ham? Tunia aumtalou (L) Pu Thangkholen Sitlhou hi koi ham? (L) Pu Thangkholen Sitlhou hi tua aumtalou (L) Pu Khotinthang Sitlhou (1874-1934) adia atupa masapen ahi. Pu Khotinthang Sitlhou chapa chu Pu Thangkhomang Sitlhou ahin, Pu Thangkhomang Sitlhou chapa chu Pu Thangkholen Sitlhou ahi. Pu Khotinthang Sitlhou, Jampi (tua Tamenglong dist.) haosapu (chief) ahin, hijeh a hi amahi Jampi-pa tia hung kiminvo a hung kikou pan ahi. Hiche Jampi-pa kitihi Pu Khotinthang Sitlhou son leh pah akon Thadou chon leh khan a chena-ngaina dol a mi-upa ho hung kipeson/kilason ahi. Pu Khotinthang Sitlhou, Jampi-pa in “Thingkho leh Malcha” kikankhom chu Manipur pumpi akon (Nagaland jong jaotha) Thadou haosa ho koukhomna lhangsapna/temna anabol in, kenglampi a hahsatah le nikho tampi lut a Thadou Haosa hochu Jampi kho a chun “Sajamlhah” bolding in ana chekhom uve. Jampi-pa inmai/leitol a chun March 17, 1917 nikho in Aisan-pa (tua Tamenglong dist.), Tujang-pa (tua Kangpokpi dist.), Laijang-pa (tua Tamenglong dist.), Chassad-pa (tua Kamjong dist.), Boljangpa (tua Ukhrul dist.), Goboh-pa (tua Chandel dist.), Thenjol-pa (tua Nagaland state), Kanjang-pa (tua Nagaland state), Lonpi-pa/Mombi-pa (tua Chandel dist.), Longja-pa (tua Chandel dist.), Henglep-pa (tua Churachandpur dist.), Loikhai-pa (tua Churachandpur dist.), Santing-pa (tua Tamenglong dist.), Songpi-pa (tua Churachandpur dist.) leh adang dang hochu ana kikhom uvin ahi. Akikhom haosa hochun British ho douding in kilolna ana lauvin, Pu Khotinthang Sitlhou in Thadou Gaal chu phondohna anei in, Pu Sutmang Singson @Pasut, Kanjang-pa in Siel mei chu asat tan in, Pu Tintong Haokip, Laijang-pa in Thihnang akap in, ahung kikhom Thadou Haosa jousen jong hiche thuphon tosotna a chun kihahselna “Sajamlhah” na in Thihnang (Meithal long) a chun twi/tui chu adon uvin hiche nia pat chun “Thadou Gaal” chu ahung kipan in May 20, 1919 in ana kichai e. Tuni nikho in Thadou Gaal lamkai Pu Khotinthang Sitlhou hi British dou lamkai galhang hina leh India freedom fighter khat hina hetpehna in India Prime Minister Pu Narendra Modi leh Union Home Minister Amit Shah teni in jong Manipur ahung vilnauva mipi kipunkhomna a thumvei jen hetpehna leh phondohna ana nei lhon in ahi. Hiche hin avetsah chu Thadou tehi Manipur a kondoh mi (indigenous) hina aphotchen nakhat ahi. Tu Manipur dinmun hahsat laitah leh Thadou te dinmun lhahsam laitah a ahina Thadou jachat pilou hel a dinpi leh kichatna neilouva samphong a eilamkai uva Pu Thangkholen Sitlhou aumtahlou hi it aumlheh in, thomhao jong aum in, jana sangpen jong ipe uvin ahi. Achesa November 1 & 2, 2024 nikho a anachelha Thadou Convention, Guwahati-2024 jong Pu Thangkholen Sitlhou chu ana jaovin, Thadou hohi Kuki akihilou dan kichehtah in aphongdoh in, Thadou Chiefs Council, Manipur (TCC-M) adia jong Convenor a lhendoh anahi. Thadou galhang Pu Khotinthang Sitlhou tupa masapen khat in kichehtah a Thadou hi Kuki ahipoi tia tuni athini gei a eidinpi uhi Thadou adia mi hangsan, ahina kicheh, vetton leh juithei tah, pu leh pa te panlahna thusim ho tuhchah jing khat ahin, ivang u apha in, iki letsah pilheh uve. Akhang akhang a Thadou adia panla insung ahiuvin, ama aumtahlou hi Thadou nam pumpi adia vangset umtah ahi. Pathen in Pu Thangkholen Sitlhou in adalhah insung mite le Thadou mite jouse lungmonna, lhamonna le thahatna eipetau hen! Sd/- (M. James Thadou) President, Thadou Inpi Manipur