بين عشمي الكبير والاييد القصيرة كل ما انوي اكتب بلقى الروح كسيرة نصها في الجنينة ونصها في الجزيرة **** وكل مايوم يمُر بشعر حلقى مُر من نزف الجراح في ارض السُمر ودمعات العيون الصبحن حُمر وموت الما لحق ختولو الضريرة **** وين القى الأمان وبلدي أمانو غايب وشن طعم الفرح وعرض العازة سايب ياالقادر تغنى في نص المصايب معقول الدموع علي وطنك كتيرة؟ **** الشايل همومك ولاقى نهارو ليلو ما لاقيلو منك كلمة تقوي حيلو والمارق عشانن دسو عضم شليلو ترع الري دموع وزول بركات حليلو من حصد القموح لحصد الذخيرة *** لكن الله في والحق ما بروح وبالبذل النبيل تندمل الجروح ونلاقى الصباح بالوجه الصبوح الواقعات يمين نبنيهن صروح ومابقسى العمار لو صفت السريرة #الخرطوم #السودان