رسالة لهذه الأم وغيرها! الأهم دلوقت هو إزاي تتصرفي بحكمة من غير ما تخسريها أو تبعديها عنك. 1. اهدي الأول قبل ما تعاتبيها أو تواجهيها، خدي نفسك، واستعيذي بالله، وفكري بهدوء. العصبية معها والزعل ممكن يخلوها تكذب أو تخاف منك بدل ما تتكلم بصراحة. 2. اختاري التوقيت والطريقة الصح ما تواجهيهاش قدام حد ولا بأسلوب تحقيق، خديها في وقت تكونوا فيه مرتاحين، وابدئي الكلام بأسلوب هادي: "أنا لاحظت إنك بتكلمي حد، وحابة أفهم منك الموضوع بهدوء ومن غير ما تزعليني، أنا أمك وأكتر حد بيحبك وعاوز مصلحتك" الأسلوب ده هيخليها تحس بالأمان بدل ما تدافع عن نفسها أو تنكر. 3. اسمعيها الأول قبل ما تحكمي اسأليها بهدوء عن طبيعة الموضوع: هو مين؟ إيه اللي بينكم؟ إيه هدف الكلام؟ ليه مش حكت لكِ من البداية؟ مهم جدًا تسيبيها تتكلم من غير مقاطعة علشان تفهمي دوافعها. 4. عرفيها الصح من الغلط بأسلوب عقلي وعاطفي بنتك في سن حساس جدًا، ولو هاجمتيها ممكن تعاند، لكن لو احتويتيها وفهمتيها الصح، هتتقبل منك أكتر. وضحي لها إن العلاقات في السن ده مش بس غلط دينيًا، لكنها كمان ممكن تأذيها نفسيًا وتاخد من وقتها وتركيزها. كلميها عن تجربة الحياة، وإن معظم العلاقات دي بتكون سطحية ومبنية على مشاعر لحظية مش حب حقيقي. عرفيها إن أي علاقة محترمة لازم يكون فيها وضوح وهدف، ولو الشخص ده صادق فعلاً، هيجي من الباب مش الشباك. زائد تخوفيها من ربنا، وتعرفيها إن أي شيء لا يرضى الله في البداية مش هيرضينا في النهاية. 5. اعملي رقابة غير مباشرة ما تخليش الأمر يعدي وكأن حاجة ما حصلتش، لكن كمان ما تخليش الرقابة تكون خانقة: راقبي تصرفاتها بطريقة ذكية من غير ما تحسسها إنها متهمة. شجعيها على ملء وقتها بحاجات مفيدة (دراسة، أنشطة، قرآن، رياضة ..). قربي منها أكتر، صاحبيها، خديها ف حضنك، حسسيها بالأمان وإنك في ضهرها وجنبها، عوديها تحكيلك أي حاجة تحصل معاها، او ما يجد معاها من مشاعر في مرحلتها دي، واحكي لها عن نفسك وعن اختياراتك زمان علشان تحس إنكِ صاحبتها مش مجرد أم بتراقبها، انت صاحبتها مش أمها. 6. كوني قدوة لها لو حست إنكِ بتعامليها بأسلوب محترم وعقلاني، هتتعلم منك إنها تحترم نفسها وتختار الصح من غير ما تحس إنها مضطرة تخبي عنكِ. 7. لو لقيتِها متعلقة بيه جدًا أو بتعاندك في الحالة دي، لا ترفضي العلاقة مرة واحدة بطريقة عنيفة، لأن ده ممكن يخليها تتمسك بيها أكتر، لكن حاولي تبيني لها العيوب اللي ممكن تكون مش شايفاها، وخدي وقتك لحد ما تقتنع بنفسها. 8. ادعي لها باستمرار القلب بيد الله، ولو كنتِ خايفة عليها، أكثري من الدعاء لها بالهداية والصحبة الصالحة، وربنا يحفظها ويبارك لكِ فيها. يسر الله لك والحمد لله رب العالمين وعلى الله قصد السبيل #منقول