الانجرافي حكومة تيكتوقراط موازية كلنا عارفين القصة الموازية دي ..لكن كدي خلونا نشوف بعض معاني كلمة (موازية) في المعجم ومعانيها وتصاريفها بما إنها حكومة تصاريف !ونستعرض ما شاكلها من نعوت .. وشاكلها هنا المقصود ماثلها وليس اتشاكل معاها، لانهم حتى الآن في مجلس شكليات ولكن لقدام حيبقى مجلس شُلليات ومشكلات وكلاشات..لاسمح الله. • موازية من الفعل (وزَى) وفي المثال نقول وزَى الأَمرُ فَلاناً: غاظه! والحاجة الحصلت في نيروبي دي تقريبا غايظة معظم السودانيين لانو الحضور هم تلاقيط من المع والضد ولا يمثلون الاّ أنفسهم و إستمدوا الشرعية من عدم وجود شرعية في ظل هوان الوطن و الاستهجان بالمواطن، وطبعا مابقدر أقول غايظة دول الجوار لانوفي كتير منهم عندو مصلحة في حكومة التيكتوكر الموازية دي!. • الوَزَي : الرجلُ القصير المُلزَّزُ الخَلْق لعله يقصد (القوني) أو ربما راجل (تسو) وبالتأكيد هذا التشبيه والنعت بعيدا عن (الحلو) و(سندالة) مالم يكون نعت أليم. • تَوَازَى الشَّيئان: وازى أحدُهما الآخر، تقابلا، تواجها، سارا متقابلين بحيث لا يلتقيان إذا امتدّا!! يعني شنو؟ متقول إنفصال عديييل وريحنا ..يعني حيكون في حكومة بورتسودان وحكومة دقلوستان بعد ما فقدنا جنوب السودان !! ، وعلى كده ممكن نتوقع حكومة طمبورستان التي يدعو لها عمسيب خان! • وسبحان الله المعجم جاب سيرة الموزنجية من تصريف موازي وقال : المَوَّازُ : هو بائعُ الموز، أنا خشمي عندي ولعل (تراجي) هي من تبحث عن المَوَّازُ لأن الكلمة التي القتها أمام الحضور كانت (عارية) من الصحة وتمثل رغبتها! وكان الاجدر أن تتحدث عن تخصيب اليورنيوم بدلا من التشدق والتشبق بتخصيب نساء الدولة الموازية! • ثم تحدث المعجم عن متوازِي الأَضْلاَعِ و مُتَوَازِي السُّطُوحِ في الاشكال الهندسية وقياسا بالمؤتمر الناس الجات عشان الضلع ماكان في ضلع كان متوازي اضلاع ، ومتوازي السطوح كان متساوي السطوح ناس مسطحين في ..ما داير اقول في السياسة لانو السياسة ما دايرة فهم هي اصلا لعبة قذرة .. أسالوا أي واحد ضليع مثل عثمان ذونون أو ناجي كوكتيل أو ربما المفكر النورحمد.