ننګرهار؛ په دره نور ولسوالۍ کې د ۳۰ لوبډلو ترمنځ د ټېپ بال کرېکټ سيالۍ پای ته ورسېدې يکشنبه، د کب پنځمه، ۱۴۰۳ د ننګرهار ولایت د بدني روزنې او ورزش رياست اړوند د ټېب بال کرېکټ فدراسیون د استازولۍ له لوري د ياد ولايت په دره نور ولسوالۍ کې د ۳۰ لوبډلو ترمنځ د ټېپ بال کرېکټ سيالۍ د بونتا مرکزي لوبډلې په اتلولۍ پای ته ورسېدې. د دغو سياليو پايلوبه د بونتا مرکزي او ننګرهار مرکزي لوبډلو ترمنځ ترسره شوه، بونتا مرکزي لوبډلې د پچې په ګټلو سره د توپ وهنې پرېکړه وکړه، چې په ټاکليو شپږو اورونو کې د څلورو لوبغاړو په سوځېدو سره مقابلې لوبډلې ته د ۸۶ منډو هدف وټاکه. په ځواب کې د ننګرهار مرکزي لوبډلې د ټولو لوبغاړو په سوځېدو سره ۷۰ منډې جوړې کړي او لوبه يې د ۱۶ منډو په توپير سره وبايلله. د يادو سياليو موخه ورزش ته د ځوانانو هڅول او د يادي ولسوالۍ وګړو ته د يوې سالمې تفريح برابرول و، چې ۱۵ ورځې يې دوام وکړ.