😭دماکې 😭 ښۀ پۀ سوچ او صلاح کېږي ښۀ ښکاره پۀ رضا کېږي دلته دا ناروا کېږي د سرونو سودا کېږي څوکيدار ولې اودۀ دے؟ دا واکدار ولې اودۀ دے؟ چې د ښار خلک مړۀ کېږي نو دا ښار ولې اودۀ دے؟ څو وئ دا دهشتګردي ده څوک وئ نه د چا غلطي ده څوک وئ داسې ولې کېږي څوک وئ وي به زندګي ده څوک راغونډ شي احتجاج کړي څوک زخميانو له علاج کړي څوک خو ښې کنځلې اوکړي څوک ستائينه د سامراج کړي لږ زخمونه چې راټول شي دا مات زړونه چې راټول شي پرهرونه چې راټول شي آرمانونه چې راټول شي چې خوشحاله خوشحالي شي چې وختونه د سپرلي شي ښۀ قلاره قلاري شي ناساپه چغې شپېلي شي هله بيا دماکه اوشوه ناروا دماکه اوشوه څو سرونه پکې مړۀ شو د ژړا دماکه اوشوه ښۀ د کار سرونه وژني د سرکار سرونه وژني پۀ اعتبار کې ئې ساتلي د اعتبار سرونه وژني دا سازش ګورے د چا دے؟ فرمائش ګورے د چا دے ؟ څوک زما د وينو تګے ؟ دا خواهش ګورے د چا دے ؟ ښه! چې تۀ نۀ ئې سرکاره چې خبر نۀ ئې واکداره چې تۀ هم لکه سپين باز ئې نو غل څوک دے څوکيداره؟ نو بيا دغه کافر څوک دے؟ د قتلونو ماهر څوک دے؟ د انسان پۀ دې جامه کې دا ګُمنانه خنزير څوک دے؟ څو سړي ورپکې مړۀ شي لېوني ورپکې مړۀ شي څوک د موره يو لَلے وي ګلالي ورپکې مړۀ شي دا سرونه چا خرڅ کړي دا لاشونه چا خرڅ کړي دا کوم خلک چې خاموش دي د دوي زړونه چا خرڅ کړي زما وينه چې توئيږي ښۀ پۀ لږ قيمت خرڅيږی څۀ کسان پرې خوشحاليږي چې توئيږي ارزانيږي چې نۀ ستا دے نۀ زما دے دا قصور ګورے د چا دے ؟ هلال ٓځانله لېونے دے کڼو خلکو ته لګيا دے... (ماله پۀ لاس کې ګلاب راکه بېتابه شوے يم تاب راکه ټوپک دې ورک شي کتاب راکه زما د وينې حساب راکه ورځ پۀ قيامت به درته دا ټپه کوونه) .......