خد بالك... آخر يوم أو يومين قبل رمضان - ربنا يبلغنا إياه - بيكون الشيطان في حالة طواريء قصوى مش بس عشان موضوع التصفيد والخلاف فيه وهل هو لكل الشياطين أم للمردة فقط ولكن لسبب آخر مهم التوريط يا صديقي مهم جدا بالنسبة للشيطان إنك تدخل رمضان متورط معصية جديدة اتفتح لك بابها شهوة كنت ناسيها تخطيط لملهيات رمضانية ناوي تستسلم لها وللفرجة عليها وتضييع الأوقات انشغال دنيوي مالوش لازمة كبره فجأة في عينك مشكلة عائلية مش معمول حسابها كل ده أو غيره مش شرط تكون انت المتسبب فيه وممكن حاجات من دي تحصل خارجة عن إرادتك الفكرة إنك لما هتتورط فيها هتدخل رمضان ذهنك مش صافي لاهي أو متغافل مشغول البال متوتر حزين أو غاضب كل دي مشاعر كفيلة إنها تعطلك عن البداية القوية في الطاعة اللي تتمناها طيب نعمل إيه عشان ده ما يحصلش شوف يا صديقي.. فيه حاجات مش هتقدر تعمل معاها حاجة وهي الأشياء الخارجة عن إرادتك زي ما قولتلك المشكلات أو الابتلاءات لو قدرت تتجنبها قدر وسعك وتفوت فبها ونعمت لكن لو كدة كدة حصلت فأنت ممكن تستغلها في مزيد من الطاعة والانكسار لله الذي بيده تفريجها وكشف الغم الذي بها هتدعي وتتضرع وتنكسر لله فتكون الأزمة دي وسيلة قرب ومزيد خشوع أما الحاجات اللي بإرادتك فدي بقى يا صاحبي مالهاش غير حل واحد احذر انتبه إبعد بلاش كل الكلمات دي خلاصتها أنت يا عزيزي قرارك إنت هتستسلم ولا لأ خصوصا اليومين اللي فاضلين وطبعا مش شرط إن ده ما يحصلش بعد ما الشهر يبدأ.. ممكن طبعا يحصل لحد آخر يوم بس على الأقل هتكون دخلت الأجواء الإيمانية ومناعتك الدينية زادت شوية بأجواء رمضان واستفدت بحلاوة البدايات عشان كدة حبيت أنبهك لليومين الخطرين دول وأفكرك وأفكر نفسي بالكلمتين اللي ببساطة دول بلاش تتورط وربنا يبلغنا رمضان على خير..