زكاة المال👌 ١- الزكاة بتتحسب ٢,٥ ٪ من فلوسك كلها ، تحدد معاد معين كل سنة وتقعد كدة وتشوف معاك كام وتاخد ٢,٥٪ من الإجمالي وتخرجه زكاة ، الزكاة بتخرج على إجمالى الفلوس كلها ، كل رأس المال مش مجرد الربح الزائد السنة دي فقط لا كله كله .. ٢- لو فلوسك تعادل أكتر من ٨٥ جرام ذهب ( بسعر اليوم ) ، وفي رأى فقهى آخر إن القياس على الفضة ونصاب الفضة ٥٩٥ جرام لو معاك مبلغ زي ده في معاد خروج الزكاة ومخلص احتياجاتك ومصاريفك ومش عليك ديون ، يخرج عليها ٢,٥٪ للفقراء ٣- الزكاة كل سنة على نفس المبلغ؟ أيوة .. - يعني أنا معايا مبلغ خرجت عنه زكاة السنة اللى فاتت والمبلغ ما زادش حاجة بل يمكن نقص ، أخرج عنه زكاة برضه طالما بلغ(نصاب الفضة تقريباً)؟؟ أيوة .. طب ما الفلوس كده هتخلص؟ لأ مش هتخلص إن شاء الله ، ما نقص مال من صدقة ، "من ذا الذى يقرض الله قرضا حسنا فيضاعفه له" ، وحتى لو خلصت ، ده حكم ربنا عشان الفقراء يعرفوا يعيشوا ، المال مال الله مش مالك ، وانت اجتهد واشتغل عشان المال يزيد وما يتأثرش بالزكاة .. ٤- طب أنا عندى بضاعة ع الرف في المحل مش فلوس سايلة؟؟ - قدر قيمتها كام فلوس واجمعها ع الفلوس السايلة وخرج منها ٢,٥٪ زكاة ، كل سنة كدة ، لكن تمن المحل نفسه لأ مفيش عليه زكاة ، وكذلك لو عندك مصنع مثلاً نفس الكلام .. ٥- طب البيت بتاعي؟ - البيت اللى انت ساكنه لأ ، أو اللى انت بانيه عشان هتسكنه أو أولادك هتسكنه لأ برضه (حتى لو احتمال السكن مش أكيد لكن مش مستبعد وانت أدرى بنيتك بقي) ، إنما البيت اللى انت بانيه عشان الفلوس ما تفقدش قيمتها أو عشان تبيعه وتكسب فيه تحسب تمنه كام ويخرج منه ٢,٥ زكاة ، وده كل سنة ، ولو شارى شقق مش محتاجها ومش هتكسنها كاستثمار يعني تشوف هى قيمتها كام وتطلع منها ٢,٥٪ ، وبرضه كل سنة .. ٦- بس أنا عندي شقق مأجرها ، أخرج زكاة على ثمن الشقق برضه؟ - لأ ، ما دامت الشقق متأجرة هيخرج الزكاة على الإيجار بس ٧- طب الأراضي أنا عندى حتة أرض مبانى سايبها للزمن - لو شاريها عشان ف يوم من الأيام تبنيها لك تسكنها أو أولادك يسكنوها مفيش عليك حاجة ، لكن لو شاريها للزمن تسقعها تكسب فيها أو هتبنيها عمارة ف يوم من الأيام تبيعها أو حتى حاططها لتخزين الفلوس في صورة عقار يبقي عليها ٢,٥٪ زكاة ٨- طب اللي شارى سبايك ذهب للزمن؟ - خلاص احنا حفظنا بقي ده يخرج ٢,٥٪ زكاة كل سنة ، إنما الذهب اللى شارياه واحدة ست تلبسه زينة مفيش عليه زكاة ٩- طب والأسهم والسندات؟ والشهادات والودايع؟؟ - رغم إن الشهادات والودائع عليها تحفظات شرعية لكن إجمالا الزكاة بتخرج على ٢,٥٪ من كل اللى معاك ، وده كل سنة مش مرة وخلاص ١٠- طب أنا مسلف فلوس لناس والفلوس دى مش معايا - إن كنت ضامن إنهم هيسددوها تخرج عليها زكاة حتى لو الفلوس مش معاك ، إلا لو كانت فلوس اتاكلت عليك ومش عارف تطولها ما تخرجش عليها حاجة ١١- طب الميراث؟ - مجرد ما ورثت فلوس أو أرض أو عقار وجب عليك الزكاة وإن كان الأمر فيه خلاف في النقطة دى لكن التحوط إن حتى لو كان لسة ما استلمتش ميراثك والأمور مشاع فالزكاة واجبة عليك عن كل سنة حسب نصيبك إلا لو كان نصيبك من العقار حاجة بتستخدمها في السكن مثلاً ١٢- بس الكلام ده معناه إن أي فلوس معاك هتخسر ربع قيمتها كل عشر سنين - آه ، ده ظاهرياً ، لكن عمليا انت هتجتهد عشان ده ما يحصلش وهتشغل فلوسك ومش هتركنها وبالتالى يدور راس المال ويتخلق وظايف وشغل للناس ، بخلاف إن حتى لو خلص ، المال مال الله مش مالك ، الناس بتعتقد الزكاة سهلة ، مع إن حرب الردة في جزيرة العرب كان أحد أهم أسباب قيامها هو عدم رغبة ناس كتير جدا في دفع الزكاة ، وبالحسابات الاقتصادية زكاة مال المصريين كفيلة إنها ما تسيبش فقير واحد في مصر ، وما جاع فقير إلا بحرمان غنى له من حقه المعلوم في ماله .. وخليك عارف حديث سيدنا النبي : "ما تلف مال في بر ولا بحر إلا بحبس الزكاة" تحديث لطلب الاصدقاء ✍️الذهب المعتبر في تحديد نصاب الزكاة هو عيار ٢٤، لأن عيار ٢١، أو ١٨ ليس ذهبًا صافيًا، بل هو مخلوط بفلزات، ومعادن أخرى. فمن كان عنده عيار آخر من ذهب ٢١ أو ١٨ أو غيرهما، فالزكاة تجب في الصافي منه فقط.