*WAMUNYI (LWAMUKAAGA), 08 MUKUTULANSANJA, 2025* *WIIKI EYOKUNA MU BUDDE: BW’OMWAKA C.* *YOZEFINA BAKHITA OMUTUUKIRIVU, MUBEEREREVU.* *Yeronimu Emiliyano Omutuukirivu, Musaserdooti.* *Kointa/Kwinta (Quinta) ow'e Alexandria Omutuukirivu, Mubeererevu era Mujulizi.* *Honorato ow'e Milano Omutuukirivu, Mwepisikoopi.* *Yisaya Boneri Omutuukirivu, Munnamalungu.* *Omwesiimi Esiperenza owa Yezu, Mugunzi wa Kibiina kya Bannaddiini.* *Omwesiimi Yowanna Filippi Jeningeni, Musaserdooti.* *Omwesiimi Yozefina Gaburiyella Bonino, Mugunzi wa Kibiina kya Bannaddiini.* *Elifuleda / Eligiva Omutuukirivu, Mumbejja era Mukulu w'Abamonaki abakazi.* *Pawulo ow'e Verdun Omutuukirivu, Mumonaki.* *Sebasitiyano ow'e Armenia Omutuukirivu, Mumonaki era Mujulizi.* *Diyonizi ow'e Armenia Omutuukirivu, Mumonaki era Mujulizi.* *Gisela Omutuukirivu, Mubiikira.* *ESSOMO ERISOOKA* _Katonda Kiwamirembe eyazuukiza mu bafu Oli eyafuuka Omusumba Omukulu, abayambe, mwetegeke okukola buli kirungi kyonna._ *Bye tusoma mu Bbaluwa y’Abeebureeyi 13: 15-17, 20-21* Ab’oluganda, bulijjo tuyite ku Ye okuweereza Katonda ekitambiro eky’okumutenda, ekitambiro ky’emimwa egyatula Erinnya lye. Okukolera obulungi abantu n’okuyambagana mu byetaago, timubyerabira; ebitambiro eby’engeri eyo Katonda bimusanyusa. Muwulire bakulu bammwe, mubagondere, anti baliwoza ogw’emyoyo gyammwe; omulimo bagukoze ssanyu, baleme kugukola nga basinda. Ekyo mmwe tikyandibagasizza. Katonda Kiwamirembe, eyazuukiza mu bafu Oli eyafuuka Omusumba omukulu ow’endiga olw’Omusaayi gw’Endagaano eteggwaawo, Mukama waffe Yezu Kristu abayambe mwetegeke okukola ky’ayagala mu buli kikolwa ekirungi kyonna; akole mu ffe buli ekimusanyusa kyonna, ng’ayita mu Yezu Kristu, asaanidde ekitiibwa emirembe n’emirembe. Amiina. _Ebyo Omukama yabyogera._ *OLUYIMBA OLW’OKWEBUULIRIRA: Zab 23: 1-3a, 3b-4, 5, 6* _Ekiddibwamu: *Omukama annunda, mpaawo kye njula.*_ Omukama annunda, mpaawo kye njula; yantuusa mu malundiro amalungi ne ngalamira. Yantwala eri amazzi gye mba mpummulira, omwoyo gwange yaguzzaamu endasi. _Ekidd: *Omukama annunda, mpaawo kye njula.*_ Yampisa mu bukubo obugolokofu olw’okubeera Erinnya lye. Ne bwe nnaatambulira mu kiwonvu ekikutte enzikiza, sitya bubenje, kuba Ggwe oli nange. _Ekidd: *Omukama annunda, mpaawo kye njula.*_ Ontegekera olujjuliro ng’abalabe bange batunula. Omutwe gwange ogusiiga omuzigo, ekikompe kyange ne kibooga. _Ekidd: *Omukama annunda, mpaawo kye njula.*_ Ekisa n’omukwano bingoberera ennaku zonna ez’obulamu bwange. Nnaasulanga mu nju y’Omukama emirembe n’ennaku. _Ekidd: *Omukama annunda, mpaawo kye njula.*_ *OKWANIRIZA EVANJIRI* _Ekidd: *Alleluya Alleluya*_ Oba oli anjagala talema kukwata Kigambo kyange. Ne Kitange talirema kumwagala, n’okujja tulijja gy’ali ne tumutebenkeramu. _Ekidd: *Alleluya Alleluya*_ *EVANJIRI* _B’ali ng’endiga ezitalina musumba._ *Ebigambo by’Evanjiri ya Mukama waffe Yezu Kristu ebivudde mu Mariko 6: 30-34* Mu budde buli, Abatume ne badda awali Yezu ne bamunyumiza byonna bye baakolayo ne bye baayigirizaayo. Ye n’abagamba nti: Mujje ku mabbali, mu kifo ekitaliimu bantu muwummuleko katono; kubanga bangi bajja nga bwe bagenda, nga tibalina na bbanga lya kulya. Ne basaabala mu lyato, ne bagenda mu kifo ekitaliimu bantu. Abantu ne babalaba nga bagenda, bangi nebamanya; abaava mu byalo byonna, ne bayita ku lukalu nga bagenda badduka, ne babasookayo. Yezu bwe yava mu lyato, n’asangayo ekibiina kinene nnyo; ne bamukwasa ekisaasaazi, kuba baali ng’endiga ezitaliiko musumba. _Ebyo Omukama yabyogera._ *OKWEBUULIRIRA KU KIGAMBO KYA KATONDA.* _Omulamwa: *Okuwummulamu okutuufu kututuusa eri Katonda waffe.*_ Katonda bwe yatonda omuntu, yamukwasa ebitonde byonna abirabirire era abifuge (si mu ngeri yakubisaanyawo wabula ng’agoberera enteereza y’Omutonzi); ng’ayita mu kukola mw’atuukiririza omulimo guno: kyokka era omuntu yassibwako etteeka ly’okuwummula ku lunaku lwa Sabbato. Ku lunaku lw’okuwummula, ebirowoozo n’omutima gwe abijja ku mirimu gye egya buli lunaku, n’abyolekeza Omutonzi ng’amwebaza, n’okumuddiza ku bibala by’emirimu gye egya Wiiki, eno nga bw’asaba enneema n’omukisa atandike era atuukirize okuyitibwa kwe mu Wiiki eddako. Olunaku olwo ku Mukristu, lwe lunaku lw’Omukama (Sande) era y’entikko y’ennaku omukaaga eza Wiiki mu bulamu bw’omuyigirizwa wa Yezu: kyokka si lwa kuba ng’afunayo akadde okuva mu kayisanyo k’emirimu n’okuwummulamu, naye kubanga emirimo gye egyo gyonna naye yennyini abissa ku bbali n’alowooza ku Katonda. Okuwummula olwo ne kuba nga kusimbye ku Katonda si ku oyo awummuddemu. Kristu mu kuyita Abayigirizwa be okuddako ku bbali bawummulemu, agenderera okutujjukiza nti, eri Omukristu, okuwummulamu n’okwesala ku mirimu egya bulijjo, kiri mu ntegeka ya Katonda Kitaffe, era okuwummula okutuufu kuteekwa kututuusa eri Kitaffe ow’omu Ggulu. Newankubadde baali bakooye nga beetaaga okuddako ku bbali, bwe basisinkanyeyo abantu ababanoonya, Kristu akwatiddwa ekisa gyebali; kwe kusooka okubakolako: mu kutuukiriza ekiragiro kya Kitaffe, tetusaanye kuzibiriza maaso gaffe eri obwetaavu bwa bannaffe abeetaaga okubajuna. Ne mu budde bwange obw’eddembe, nteekwa obuteerowoozaako nzekka, naye nteekwa okuluubirira okusiimibwa Katonda; kino Mukama waffe Yezu Kristu ky’atuyigiriza mu lugero lw’omu Vanjiri leero. Ku lunaku lw’okuwummula; nsaanye okufunayo akadde okubeera ne Yezu mu Kitambiro kya Missa, okusinza Esakaramentu, okukola ebikolwa eby’ekisa; okukyalira abalwadde n’abakadde, okubeerako n’ab’omu maka gaffe n’ab’emikwano. Mu mulembe guno, ku bantu bangi bakaluubirirwa okuwummula nga beekwasa emirimo, ate ku abalala okwewummuzaamu kitegeeza kufa ku bulungi bwange bwokka, n’okwesaasaanyizaako ensimbi awatali mulala (oba abalala) abansumbuwa yadde okulinnyirira eddembe lyange; engeri eno teweesa Katonda kitiibwa. Yezu atujjukiza okweyambisa obudde bw’okuwummula okutumbula obulamu bwaffe mu bujjuvu: mu mubiri ne mu mwoyo; Nnyaffe Ekeleziya atuwa eky’okulabirako kya Nnyaffe Biikira Mariya ku lunaku luno olukulembera Olunaku lw’Omukama; twetaba wamu naye mu kuteekateeka emibiri n’emyoyo gyaffe, tusobole okukuza obulungi olunaku lw’Omukama n’emibiri eginaaziddwako ekko, n’emyoyo egirongoose. _Ayi Yezu omwagalwa, webale okunyaniriza n’okumpuliriza nga nzize gy’oli olw’okwanukula omulanga gwo okuwummulako naawe. Ng’amaanyi g’okukwagala n’okwagala abalala gakendedde, nnesiga ggwe okunzijuza n’amaanyi amaggya nziremu okukuweereza n’okusingawo._ *PADRE PIO OMUTUUKIRIVU SABIRA ABOONOONYI BONNA AWAMU NABO BONNA ABAVA KU EKELEZIYA WA KATONDA OMUTUKUVU BADDE ERI YEZU ALI MU SAKARAMENTU ETTUKUVU ENNYO.* *©2025: PADRE PIO OMUTUUKIRIVU TUSABIRE.*