*WALUMBE (LWAKUBIRI) 25, MUKUTULANSANJA, 2025* *WIIKI EYOMUSANVU MU BUDDE: OBW’OMWAKA C.* *Sezariya owe Nanzianzen Omutuukirivu, Musawo.* *Wobaruga Omutuukirivu, Mubererevu.* *Nesitori Omutuukirivu owe Side, Mujulizi.* *Herena Omutuukirivu, Mujulizi.* *Omwesiimi Mariyamu Vattalili (Mariya Rani), Munnaddiini era Mujulizi.* *Toribiyo Romo Gonzále Omutuukirivu, Musaserdooti era Mujulizi.* *Domeniko Lentini Omutuukirivu, Musaserdooti.* *Kalisito Karavariyo (Callisto Caravario) Omutuukirivu, Musaserdooti era Mujulizi.* *Alideturudi Omutuukirivu, Mukulu w'Abamonaki abakazi.* *Ananiya owe Phoenicia Omutuukirivu, Musaserdooti era Mujulizi.* *Gotaridi Omutuukirivu, Munnamalungu.* *Rigino Omutuukirivu, Mwepisikoopi era Mujulizi.* *Omwesiimi Mariya Adewodata Pisani, Mukulu w'Abamonaki abakazi.* *Omwesiimi Mariya Ludovika ow'Abamalayika, Mubiikira.* *Omwesiimi Kalara Schramm, Mubiikira era Mujulizi.* *Aloyiziyo Versiglia Omutuukirivu, Mwepisikoopi era Mujulizi.* *Omwesiimi Siriyako Mariya Sancha Hervas Mwepisikoopi.* *ESSOMO ERISOOKA* _Weetegekere okugezebwa._ *Bye tusoma mu Kitabo kya Siraki 2: 1-11* Mwana wange, obanga oluubirira okuweereza Omukama weetegekere okugezebwa okw’amaanyi. Beera mumalirivu mu mutima, beera munywevu, ate teweekanga ng’obuzibu buzze. Mwerippeko ate tomuvaako, olyoke osobole okufuna ekitiibwa ku nkomerero y’ennaku zo. Buli kyonna ekikujjira, kikkirize, ate mu ebyo ebitali bikakafu mu mbeera yo enyomebwa, beera mugumiikiriza. Anti Zawabu agerezebwa mu muliro, n’abasajja abalonde bagerezebwa mu kabiga ka kutowazibwa. Mwesige, ajja kukunyweza, goberera ekkubo eggolokofu era suubira mu Ye. Ggwe atya Omukama, lindirira okusaasira kwe, leka kulaga ku bbali si kulwa ng’ogwa. Ggwe atya Omukama, mwesige, togenda kufiirizibwa mpeera yo. Ggwe atya Omukama, suubira ebintu ebirungi, okwesiima okw’olubeerera n’okusaasirwa. Tunuulira amazadde ag’edda, olabe: ani yali yeesize Omukama n’aswazibwa? Oba ani yali amutaddemu ekitiibwa ng’amunywereddeko n’ayabulirwa? Oba ani yali amukowodde n’atafiibwako? Kubanga Omukama Musaasizi era wa Kisa, asonyiwa ebibi ate n’awonya mu nnaku ez’akabi. Girabye emitima eminafu, n’emikono emirebevu, n’omwonoonyi akwata amakubo abiri. Gulabye omutima omulebevu ogutalina Kukkiriza; kuba egy’engeri eyo tegigenda kulabirirwa. _Ebyo Omukama yabyogera._ *OLUYIMBA OLW’OKWEBUULIRIRA: Zab. 37: 3-4, 18-19, 27-28, 39-40.* _Ekiddibwamu: *Kwasa Omukama ekkubo lyo. Ye alikola.*_ Suubira mu Mukama era okole bulungi, olyoke obeere mu nsi otuule ntende. Weyagalire mu Mukama, alikuwa omutima gwo kye gwegomba. _Ekidd: *Kwasa Omukama ekkubo lyo. Ye alikola.*_ Omukama afaako ku bulamu bw’abayisa obulungi, n’obusika bwabwe bulibeerawo emirembe gyonna. Mu budde bw’akacwano tibaliswala ne mu nnaku ez’enjala balikkuta. _Ekidd: *Kwasa Omukama ekkubo lyo. Ye alikola.*_ Wewale ekibi ate okole ekirungi, olyoke osigalewo emirembe gyonna. Kubanga Omukama ayagala obutuufu tasuulirira Batuukirivu. _Ekidd: *Kwasa Omukama ekkubo lyo. Ye alikola.*_ Obulokofu bw’abatuufu buva mu Mukama, kye Kiddukiro kyabwe mu budde obw’ennaku. N’Omukama abayamba n’abawonya ababi n’abakuuma, kubanga beeyuna gy’ali. _Ekidd: *Kwasa Omukama ekkubo lyo. Ye alikola.*_ *OKWANIRIZA EVANJIRI* _Ekidd: *Alleluya Alleluya.*_ Ekigambo kyo kitangaaza ebigere byange, kye kitangaala mu kkubo lyange. _Ekidd: *Alleluya Alleluya.*_ *EVANJIRI* _Omwana w’Omuntu bajja kumukwata. Buli ayagala okubeera omukulu, abeere muvannyuma._ *Ebigambo by’Evanjiri ya Mukama waffe Yezu Kristu ebivudde mu Mariko 9: 30-37* Mu budde buli, Yezu n’Abayigirizwa be bwe baamala okuserengeta olusozi, baava awo ne basala mu Galilaaya; nga tayagala wabeewo amutegeera. Yayigiriza Abayigirizwa be, n’abagamba nti: Omwana w’Omuntu abantu bagenda kumukwata, bamutte n’okumutta; bwe balimala okumutta, alizuukira ku lw’Essatu. Naye bo ne batategeera kigambo ekyo; ne batya okukimubuuza. Ne batuuka e Kafaranawumu. Bwe baamala okuyingira mu nju, ye n’ababuuza nti: Mu kkubo mubadde mwogera ku ki? Bo ne basirika: kuba mu kkubo baali bawakana, nga beebuuza asinga obukulu mu bo! Ye n’atuula, n’ayita Ekkumi n’Ababiri, n’abagamba, nti: Buli ayagala okubeera omukulu, abeere muvannyuma mu bonna; abeere muweereza wa bonna. Awo n’akwata omwana omuto n’amussa w’ali mu makkati gaabwe, n’amuwambatira n’abagamba nti: Kiisi ajjanjaba omuto ng’ono mu Linnya lyange, aba ajjanjabye Nze; na buli anjijanjaba, tajjanjaba Nze, naye Oli eyantuma. _Ebyo Omukama yabyogera._ *OKWEBUULIRIRA KU KIGAMBO KYA KATONDA.* _Omulamwa: *Ekkubo Yezu ly'atwoleka okukwata erinatutuusa ku kitiibwa ky'Okugulumizibwa kwe.*_ Mu mirembe egyasooka mu Ekeleziya, ekitabo kya Siraki kyakwasibwanga abo abaali bakabatizibwa n'okuyingizibwa mu ddiini, kibeere ng’omumuli okubalaga engeri y’okuyisaamu mu bulamu Obukristu bwe baabanga bayingiddemu. Ku bwakyo, Omuwandiisi wakyo atusomesa n’okutuyigiriza ku kutya Katonda n’atujjukiza nti y’ensibuko y’amagezi n’okutegeera. Mu bibuuliriro by’omu Ssomo lya leero, Omuwandiisi atwala obudde okuyigiriza omuvubuka ali ku ntandikwa y’olugendo lw’okunoonya amagezi aga nnamaddala (kwe kugamba, nti: ali mu kunoonya Omukama). Ebibuuliriro bino lye kkubo naffe lye tuteekwa okukwata buli lukya nga tunoonya Omukama, atujjuze Okwagala kwe, n’Amagezi ge gatusobozese okwaŋŋanga ebisoomooza bye tusisinkana mu lugendo lw’Obukristu bwaffe. Atujjukiza nti ebigezo bye tusisinkana buli omu mu ngeri ye, gye misaalaba gye tuteekwa okwetikka nga tugoberera Yezu; tuleme kugiraba nga bibonerezo okuva ewa Katonda, wabula omukisa ogw’okutuyamba okukula mu bulamu bw’omwoyo ne mu Kukkiriza. Tuyigiramu okussa obwesige bwaffe mu Katonda, okusuubira mu Kisa n’Okusaasira kwe, ate n’okusuubira obuwanguzi olw’okwagala kw’atulinako; kino kye kifaananyi Yezu ky’atujjirawo mu Vanjiri ng’atuwa eky’okulabirako ky’omwana omuto. Atuyita okutambulira mu kkubo ly’obwetowaze nga tukola emirimo gyaffe. Ayagala tufuuke abaweereza b’abo be tukulembera nga twesamba ekkubo ly’okwegulumiza omuli okunoonya ebitiibwa n’okuyaayaanira okusiimibwa abantu, ebitutuusa n’okwefuula ab’ekitalo. _Ayi Mukama Yezu ggwe atajja kuweerezebwa wabula okuweereza ng’owaayo Obulamu bwo, njigiriza okufaananya Obukristu bwange ku Bulamu bwo, mu kwetikka omusaalaba gw'obwetowaze n'okufuuka omuweereza w'abo bentwala._ *NNYAFFE BIIKIRA MARIYA BULAMU BWA BALWADDE, TWONGERA OKUKUKWASA KITAFFE PAAPA FRANCIS OMUWE OKUWONA AMANGU AYONGERE OKULAMBIKA EKELEZIYA WA KATONDA OMUTUKUVU.* *PADRE PIO OMUTUUKIRIVU SABIRA ABOONOONYI BONNA AWAMU NABO BONNA ABAVA KU EKELEZIYA WA KATONDA OMUTUKUVU BADDE ERI YEZU ALI MU SAKARAMENTU ETTUKUVU ENNYO.* *©2025: PADRE PIO OMUTUUKIRIVU TUSABIRE.*