*MUKASA (LWAKUSATU), 26 MUKUTULANSANJA, 2025* *WIIKI EYOMUSANVU MU BUDDE: OBW’OMWAKA C.* *Alekizanda (Alexander) owe Alexandria Omutuukirivu, Mwepisikoopi* *Vikitoro (Victor) Omutuukirivu, Munnamalungu.* *Ayirini (Irene) Omutuukirivu, Mubererevu.* *Donoziyo owe Augsburg Omutuukirivu, Mujulizi.* *Pawula owa Yozefu owe Calasanz Omutuukirivu, Mugunzi wa Kibiina kya Bannaddiini.* *Andereya (Andrew) owe Florence Omutuukirivu, Mwepisikoopi.* *Fulaviyano owe Como Omutuukirivu, Mwepisikoopi.* *Fotunato Omutuukirivu, Mujulizi.* *Omwesiimi Piyedadi (Piedad) owe Cruz Ortiz Real, Mubiikira.* *Omwesiimi Mikela (Michela) Ranzi owe Vercelli, Mubiikira.* *Omwesiimi Rubereto Durari (Robert Drury), Musaserdooti era Mujulizi.* *Omwesiimi Anolodi (Arnold) owe Stromberg, Mumonaki.* *ESSOMO ERISOOKA* _Katonda ayagala abo abaagala amagezi_ *Bye tusoma mu kitabo kya Siraki 4:11-19* Amagezi geegunjulira abaana baago, ate galabirira abo abaganoonya. Buli yenna agaagala ayagala obulamu, abo abagaweereza nga bukyali, balijjula essanyu. Buli yenna agakwatira okumpi alisikira ekitiibwa, na buli yonna gy’anaalaganga, Omukama alimuwa omukisa. Abo abagaweereza, baweereza Omutuukirivu, n’Omukama ayagala abo abagaagala. Buli yenna agawulira alamula kituufu, na buli agassaako omwoyo asula wagumu. Bw’agewa agenda kugasikira, n’ezzadde lye ligenda kugeesigaliza. Kubanga nandibadde mu kusooka gamuyisa mu makubo ageenyoolanyoola nga gamuleetera okutya n’obunafu, nga gamulumya n’amateeka gaago okutuuka lwe gasobola okumwesiga, nga gamugeza n’ebizibu eby’amaanyi. Oluvannyuma galimuzza mu kkubo eggolokofu ne gamubikkulira ebyama byago. Bw’alikwata amakubo amalala galimwabuulira ne gamuleka azikirire. _Ebyo Omukama y’abyogera._ *OLUYIMBA OLW’OKWEBUULIRIRA: Zab 119, 165, 168, 171, 172, 174, 175.* _Ekiddibwamu: *Ayi Mukama, abaagala Etteeka lyo baba n’eddembe ddene.*_ Abaagala Etteeka lyo baba n’eddembe ddene, tibaba na webesittala. Nkuuma by’olagira ne by’oteesa, kuba amakubo gange gonna gali mu Maaso go. _Ekidd: *Ayi Mukama, abaagala Etteeka lyo baba n’eddembe ddene.*_ Emimwa gyange giyimbe bw’oliba onjigirizza byewateesa. Olulimi lwange luyimba Enjogera yo, kuba Ebiragiro byo byonna bituufu. _Ekidd: *Ayi Mukama, abaagala Etteeka lyo baba n’eddembe ddene.*_ Ayi Mukama, obulokofu obuva gyoli mbwegomba, n’Etteeka lyo lye ssanyu lyange. Omwoyo gwange gubeewo gukutende, ne by’olangirira binnyambe. _Ekidd: *Ayi Mukama, abaagala Etteeka lyo baba n’eddembe ddene.*_ *OKWANIRIZA EVANJIRI* _Ekidd: *Alleluya Alleluya.*_ Nsuubira mu Mukama, omwoyo gwange gusuubira mu Kigambo kye. _Ekidd: *Alleluya Alleluya.*_ *EVANJIRI* _Atabawakanya, oyo aba munnammwe._ *Ebigambo by’Evanjiri ya Mukama waffe Yezu Kristu ebivudde mu Mariko 9: 38-40* Mu budde buli, Yoanna n’ayanukula n’agamba nti: Muyigiriza, twalaba omuntu ng’agoba amasitaani mu Linnya lyo, sso nga tayita naffe, ne tumugaana! Yezu n’abagamba nti: Muleke kumuziyiza; kubanga tiwali akola bya magero mu Linnya lyange ate amangu ago n’asobola okunjogerako obubi. Kubanga atatuwakanya, oyo aba munnaffe. _Ebyo Omukama y’abyogera._ *OKWEBUULIRIRA KU KIGAMBO KYA KATONDA.* _Omulamwa: *Okwagala okutuufu kusanyukira mu buwanguzi bw’abalala.*_ Obuggya n’ensaalwa bibi kubanga bitutuusa okunakuwala nga bannaffe bafunye ebirungi sso nga byandibadde bitusanyusa; olw’okweyagaliza nti byandibadde byaffe, oba nti kikendeeza ku mikisa egyandibadde egyaffe. Omukama avunaana Abatume n’Abayigirizwa be olw’okukwatirwa ensaalwa n’okwekengera oyo atayita nabo wabula ng’akola ebikolwa ebirungi mu Linnya ly’Omukama; baayagala okumuyimiriza naye Omukama n’abakomako. Omukama kyeyava awandiika Etteeka lye ery’okwagala olw’okutondebwa mu Kifaananyi kye; ng’ayagala tubeere ababaka b’okwagala eri bannaffe. Buli lwe tuteeka etteeka ly’okwagala mu nkola, nga twagala bannaffe nga bwe tweyagala, lwe tusinga okufuna emirembe n’okubeera abasanyufu. Ng’abayigirizwa ba Yezu, Mukama waffe atusuubidde okusanyukira bulijjo mu bulungi bw’abalala, ate n’okukola ebikolwa ebyo ebiggyayo Ekifaananyi kya Katonda mwe twatonderwa; anti ye asanyukira mu bulungi bw’ebitonde bye byonna. Okwagala n’Obulungi bwa Katonda bweyoleka buli lwenkolera munnange ekikolwa eky’ekisa; n’okusanyukira mu buwanguzi bw’omulala kikolwa kya kwagala. Bulijjo Omukama tumusabe ajjuzze emitima gyaffe n’okwagala kwe, agifuule emikutu mw’ayitira okutuusa ku batonde bannaffe Okwagala kwe nga tubeera ba kisa gye bali. _Ayi Yezu, jjuzza omutima gwange n’ebitone bya Mwoyo Mutuukirivu, obulamu bwange butangalijje mu balala nga mbagabanyiza mu ssanyu ly’Okwagala kwo, nfuula omumuli ogumulisa abalala, batuuke ku buwanguzi n’eddembe olw’okubawanirira, n’olw’okwagala kwe mbooleka. Amiina._ *NYAFFE BIIKIRA MARIYA BULAMU BW'ABALWADDE, TWONGERA OKUKUKWASA KITAFFE PAAPA FRANCIS OMUWE OKUWONA AMANGU AYONGERE OKULAMBIKA EKELEZIYA WA KATONDA OMUTUKUVU.* *PADRE PIO OMUTUUKIRIVU SABIRA ABOONOONYI BONNA AWAMU NABO BONNA ABAVA KU EKELEZIYA WA KATONDA OMUTUKUVU BADDE ERI YEZU ALI MU SAKARAMENTU ETTUKUVU ENNYO.* *©2025: PADRE PIO OMUTUUKIRIVU TUSABIRE.*