*AMASOMO GA MISSA LEERO (LWAKUNA), 27 MUKUTULANSANJA, 2025* *WIIKI EY'OMUSANVU MU BUDDE: OBW’OMWAKA C.* *Girigori owe Narek Omutuukirivu, Mukulu w'Abamonaki era Muyigiriza mukulu mw'Ekeleziya.* *Gaburyeli owa Nyaffe anyoleddwa Omutuukirivu, Munnaddiini.* *Anna Line Omutuukirivu, Mujulizi.* *Honorina Omutuukirivu, Mujulizi.* *Hipolito ow'Olusozi Jura Omutuukirivu, Mumonaki.* *Emmanueli owe Cremona Omutuukirivu, Mwepisikoopi.* *Alinoto/Alinoti/Anoti Omutuukirivu, Munnamalungu.* *Komugani/Kowani Omutuukirivu, Mukulu w'Abamonaki.* *Onezima owe Cologne Omutuukirivu, Mubiikira.* *Besa owe Alexandria Omutuukirivu, Musirikale era Mujulizi.* *Omwesiimi Mariya Yozefa Karolina Buraderi (Brader), Mubiikira era Mugunzi wa Kibiina kya Bannaddiini.* *Omwesiimi Mariya Deluyili-Maritini (Deluil-Martiny), Mubiikira.* *Omwesiimi Yozefu Tusi Soleri (Josep Tous Soler), Musaserdooti era Mugunzi wa Kibiina kya Bannaddiini.* *Omwesiimi Wiliyamu Rikadisoni (William Richardson), Musaserdooti era Mujulizi.* *Omwesiimi Roja Filikoko (Roger Filcock), Musaserdooti era Mujulizi.* *Fotunato (Fortunatus) owe Roma Omutuukirivu, Mujulizi.* *Alekizanda owe Roma Omutuukirivu, Mujulizi.* *ESSOMO ERISOOKA* _Tolwawo okudda eri Omukama._ *Bye tusoma mu Kitabo kya Siraki 5:1-8* Tomalira mutima ku nsimbi zo, oba okugamba, nti: Mu ekyo neemala. Totwalibwa maddu go n’amaanyi go, okugoberera ebisanyusa omutima gwo. Era togamba nti: Ani anninako obuyinza, kuba Omukama aliwoolerera ddala eggwanga ku ggwe? Togamba nti: Nnayonoona ate kiki ekyantuukirira? Kuba okugumiikiriza kw’Omukama kulwawo Tewesuunga kisonyiwo, n’oyongera ekibi ku kibi. Togamba nti: Okusaasira kwe kungi alisonyiwa ebibi byange enkumu, kubanga mu ye mulimu byombi, ekisa n’obusungu, ate aboonoonyi abasunguwalira nnyo. Tolwa kudda eri Mukama, leka kulagaanyalaganya nti: Jjo jjuzi. Kubanga obusungu bw’Omukama bugenda kutumbuka; ate mu budde bw’okuwoolera eggwanga ogenda kuzikiririra ddala. Tossa mutima gwo ku magoba agafuniddwa obubi, tigagenda kukugasa ku lunaku olw’akabi. _Ebyo Omukama y’abyogera._ *OLUYIMBA OLW’OKWEBUULIRIRA: Zab 1:1-2, 3, 4+6.* _Ekiddibwamu: *Omuntu oyo yesiimye eyateeka essuubi lye mu Mukama.*_ Yesiimye omuntu atagoberera kibuuliriro kya babi, n’atayingira mu kkubo lya boonoonyi. Tatuula basiru gye batuula, wabula okwesiima kwe kuli mu Tteeka ly’Omukama. _Ekidd: *Omuntu oyo yesiimye eyateeka essuubi lye mu Mukama.*_ Ali ng’omuti ogwasimbibwa okumpi n’emyala gy’amazzi, ogussaako ekibala mu budde bwagwo. Ebikoola byagwo nga tibiwotookerera, buli by’akola byonna bigenda bulungi. _Ekidd: *Omuntu oyo yesiimye eyateeka essuubi lye mu Mukama.*_ Si bwe batyo ababi, sibwe batyo, wabula bali ng’ebisusunku empewo by’esaasaanya. Kubanga Omukama alabirira ekkubo ly’abalungi, ekkubo ly’ababi lizikiriza. _Ekidd: *Omuntu oyo yesiimye eyateeka essuubi lye mu Mukama.*_ *OKWANIRIZA EVANJIRI* _R/.*Alleluya Alleluya.*_ Omukama Mwesigwa mu bigambo bye byonna, Mutuukirivu mu mirimo gye gyonna. _R/.*Alleluya Alleluya.*_ *EVANJIRI* _Wakiri oyingire mu bulamu kakono-kamu, n’otosuulibwa mu Gehena ng’olina emikono gy’ombi._ *Ebigambo by’Evanjiri ya Mukama waffe Yezu Kristu ebivudde mu Mariko 9: 41-50* Mu budde buli, Yezu yagamba Abayigirizwa be, nti: Buli alibawa olwendo lw’amazzi obuzzi mu Linnya lyange, kuba muli ba Kristu, ka mbabuulire, talisubwa mpeera ye! Naye alyesittaza omu ku bato bano abanzikiriza, ekyandisinze obulungi, asibibwe olubengo mu bulago, asuulibwe mu nnyanja. Era oba ng’omukono gwo gukwesittaza, gutemeko; waakiri oyingire mu Bulamu kakono-kamu, n’otosuulibwa mu Gehena ng’olina emikono gyombi, mu muliro ogutazikira (envunyu yaabwe mw’etefiira n’omuliro mwe gutazikira). Era obanga ekigere kyo kikwesittaza, kitemeko; waakiri oyingire mu Bulamu Obutaggwaawo ng’oli mulema, n’otosuulibwa mu gehena y’omuliro ogutazikira ng’olina ebigere byombi (envunyu yaabwe mw’etefiira n’omuliro mwe gutazikira). Ea oba ng’eriiso lyo likwesittaza, linokolemu; waakiri oyingire mu Bwakabaka bwa Katonda ng’oli wa ttulu, n’otosuulibwa mu Gehena ya muliro n’amaaso gombi (envunyu yaabwe mw’etefiira n’omuliro mwe gutazikira). Kuba buli omu alungwamu omuliro. Omunnyo guba mulungi! Naye omunnyo bwe gusaabulukuka, muba mukyalungamu ki? Mubeere n’omunnyo mu mmwe n’eddembe mubeere nalyo mwekka na mwekka. _Ebyo Omukama y’abyogera._ *OKWEBUULIRIRA KU KIGAMBO KYA KATONDA.* _Omulamwa: *Twatondebwa mu kwagala era olw'okwagala.*_ Ekisa kye tukolera bannaffe olw’okuba nga baatondebwa mu kifaananyi kya Katonda, kyoleka okusiima kwaffe eri Omutonzi waffe olw’obulungi bwe n’Ekisa kye gye tuli. Kristu ky’ava asuubiza empeera erindiridde abo abagirira bannaabwe ekisa: _“Buli alibawa olwendo lw’amazzi obuzzi mu Linnya lyange …… talisubwa mpeera ye!”_ Ffe abayigirizwa be, tuteekwa okutwala eky’okulabirako kya Mukama waffe nga tubeera n’ekisa eri bannaffe nga tubaddukirira mu byetaago by’obulamu bwabwe. Mukama waffe tatusaba kukola kitusukkiridde oba kye tutasobola, mu buli omu mu ffe yawuundamu ebitone ebyawufu olw’okwagala era atusuubidde okubikozesa okutuusa Okwagala kwe eri abalala. Okwagala okwo kwe kutusembeza eri Kitaffe ne tuyiga n’okwesamba byonna ebitagwanira Kitiibwa kye; olw’ekyo, tuteekwa okwevaamu okwesalako ebyo byonna ebitujja ku Kwagala kwa Katonda, ne bituviiramu okufiirwa obulamu bwa Katonda mu ffe. Yezu tatutuma kweremaza mu mubiri, naye atuyita okumalirira okubaako ne bye twesamba n’okwerekereza olw’okubeera Ye, tumugoberere nga tiwali muziziko gwonna. Bwe tunaakola tutyo, tunabeera omunnyo oguleetawo obuwoomerevu mu bulamu bw’ensi ne mu mitima gy’abantu egigenda giggwamu okwagala. Siraki ky’ava atulabula obuteeyibaala, ng’obulamu bwaffe tibukyalimu kawoomerera konna ak’Evanjiri, wabula nga twemalidde mu kuyaayaanira obugagga bw’oku nsi, obututuusa n’okulowooza nti titukyetaaga Katonda mu bulamu bwaffe _Ayi Mukama wange, nkwaniriza mu mutima gwange otuuliremu ddala obutaguvaamu, bw’otyo ofuule obulamu bwange obwakaloosa k’Okwagala kwo n’ekitangaala ky’amazima go, wonna we mbeera mbunyewo essanyu n’emirembe egiva mu Mawulire Agasanyusa ag’Evanjiri, nga kwe kwagala kwe njoleka abalala. Amiina._ *NNYAFFE BIIKIRA MARIYA BULAMU BW'ABALWADDE, TWONGERA OKUKUKWASA KITAFFE PAAPA FRANCIS OMUWE OKUWONA AMANGU AYONGERE OKULAMBIKA EKELEZIYA WA KATONDA OMUTUKUVU* *PADRE PIO OMUTUUKIRIVU SABIRA ABOONOONYI BONNA AWAMU NABO BONNA ABAVA KU EKELEZIYA WA KATONDA OMUTUKUVU BADDE ERI YEZU ALI MU SAKARAMENTU ETTUKUVU ENNYO.* *©2025 PADRE PIO OMUTUUKIRIVU TUSABIRE.*