أي حدا قاعد حاطط رجل على رجل وبتفلسف ليه الستات اللي انقتلوا من أزواجهم ما طلقوش قبل هيك وأنقذوا حالهم ؟؟ الجواب ببساطه : الستات ببلدنا انزرع بعقلهم إنهم هم المسؤولين عن إصلاح أي شيء بحياتهم، وإنه مهما صار، اللوم بيرجع عليهم. لو حد تحرش فيها، أكيد لبسها ملفت، لو أهلها ضربوها، أكيد هي بترد عليهم، لو مديرها ضايقها، أكيد ليش تشتغل وتوجع راسها، لو جوزها معصب وزعلان، أكيد مش موفرة له الجو الهادئ، ولو مد إيده عليها، أكيد استفزته! وأول نصيحة بتنقال بأي مشكله زوجية؟ • “لما تلاقيه معصب، ابعدي عن وجهه.” • “لا تحطي راسك براسه، ولا تردي عليه بندّية.” • “لا تستفزيه، عشان ما يمد إيده عليكي.” • “مشاكلكم بتنحل جوا البيت، لا تطلعيها برة.” • “ولو اعتذر، سامحيه فوراً، لا تعانديه.” الطلاق مش خيار سهل للستات ببلدنا، ببساطة لأن الحياة أصلاً ضدهم. البنات كتير منهم مش معززين ببيوت أهاليهم، فكيف تترك زواج مؤذي لترجع لجحيم تاني؟ غير إنه المطلقة عندنا مصيبة بحد ذاتها، ودايماً تحت المراقبة. وطبعاً غير المصايب المالية! الزلمه لما يطلق اما بياخد الاولاد و بحرمهم امهم برمي الأولاد على أمهم، طب وين تروح في بلد الحياه جدا غاليه؟ إيجار، مدارس، أكل، شرب، علاج، حتى الهوى بفلوس! ومعظم الأمهات يا أما ما بيشتغلوا، أو بيشتغلوا برواتب ما بتكفي شي ، او ما بتشتغل و لا قادرة تااقي فرصه تناسبها.. الستات ببلدنا اتربوا إنهم أقل، وإنه حقوقهم مش بيدهم، وإنه لازم يطيعوا أزواجهم شرعاً حتى لو قاعدين بعلاقة مؤذية، عشان “الملائكة ما تلعنهم”! عقلية مسخّرة لخدمة الرجل بأي شكل. وسط هالضغط، وسط هالعقلية، وسط هالظروف، بدك إياها تترك وتروح ببساطة؟ تاخذ قرار مصيري هيك بسهولة؟ تفكر بحالها كإنسانة لها كيان وكرامة؟ إذا أنت قاعد بتنظر عن الطلاق وكأنه كبسة زر، لازم تعرف إنك ما بتعرف ولا شي عن الواقع، وإنك عايش بسلام وما شفت القهر اللي غيرك عايشه. احكي الحمد لله، لأنك واضح حياتك كانت أسهل، حتى لو مو شايفها هيك و مش مارر عليك مواقف حقيقه لتعرف شو بصير!! في اختصار ياريت ما انظر على بعض !! https://www.facebook.com/share/p/18iK9ePKcg/?