بعد ما مشيت من ميكروسوفت في 2016 ( كان عندي ٢٢ سنة ) قررت أعمل شركة وأبقى رجل أعمال 😁 المهم عملت السجل التجاري وطبعت الكروت وكتبت عليها CEO وجبت سماعة Jabra بلوتوث وبمشي في ايدي نوتة وقلم، اللي هو تشوفني من بعيد تقول حفيد بيل جيتس، بعد ٥ شهور الشركة فشلت والفلوس كلها ضاعت ومبقاش معايا غير الكروت اللي طبعتها 😅 روحت لأبويا مكسور الجناح، قولتله أنا فاشل وهرجع اشتغل في الشركات، قالي براحتك! اشتغلت في شركة فعلاً وبعد ٣ شهور مشيت، رجعت لأبويا قولتله انا هعمل شركة والمرة دي هاخد بالي، قالي براحتك! عملت شركة وقدر الإمكان معملتش الأخطاء السابقة ولكني عملت أخطاء جديدة 😂 بعد ٨ شهور الشركة فشلت وقفلتها، كنت كسبت منها حوالي ٤٠ ألف جنيه. روحت لأبويا وأنا فاقد الشغف قولتله الشركة فشلت، انا هرجع اشتغل تاني في اي شركة، قالي براحتك! لما جيت امشي قالي هو اللي بيعمل حادثة بيبطل سواقة؟ الكلام دخل من ودني مخرجش، قولتله أكيد لأ! قالي طب ما تجرب تاني انت محتاج فلوس؟ قولتله لأ، قالي خلاص جرب تاني! فعلاً جربت تاني والموضوع مشي والشركة نجحت وربنا أكرمني، اللي عايز أقوله إننا أحياناً بنتعب، بنجيب أخرنا، بنحس إنها قفلت خلاص، المعافرة نجاح، المحاولة من تاني نجاح، نقع ونقوم نقع ونقوم، هي ماشية كده، اللي بياخد جنب بيخسر والتراب بيجي عليه، لو حاسس انها مقفلة معاك، اعتبر دي اشارة، قوم تاني وحاول!