*ᵀᵃʳᵃᵃᵛᵉᵉḥ ᴷᵉ ᴺᵃᶻʳᵃᵃⁿᵉ ᴷî ᴶᵃᵃʸⁱᶻ Ṣᵒᵒʳᵃᵗᵉⁿ* ✍Maulãnã Ṭãriq Maḥmood Razavî 📝 Muḥammad Jamãluddîn 'Khãn https://whatsapp.com/channel/0029Va4xNTcBlHpj2ZXcdA3J Aṣl Mas-alah Ko Bayãn Karne Se Qabl (Pahle) Ek 'Ghalaṭ Fahmî Kã izaalah Zaroorî Hai, 'Ghalaṭ Fahmî Yeh Hai Ki Hamãre Mu-'ãshare Men Kalãme Paak Ḥifz Karne Ke Ba'ad Use Yaad Rakhne Ke Liye Tarãveeḥ Men Kalãme Paak Sunãnã Zaroorî Samjhã Jaatã Hai, Aur Kahã Jaatã Hai Ki Jo Tarãveeḥ Na Sunãye To Us Ke Ḥifz Karne Kã Kyã Maṭlab! isee Wajah Se Bachchiyon Ko Kalãme Paak Ḥifz Karwãne Par Log E'atirãz Karte Hain Ki Yeh Tarãveeḥ To Sunãyengî Nahîn To Ḥifz Kã Kyã Faayidah! is Ke 'Alaawah Yeh Ki Kitne Logon Ko Kahte Huye Sunã Gayã Ki Tarãveeḥ Men Kalãme Pãk Na Sunãyen To Bhool Jãyenge Aur Kitne Kahte Hain Ki Ham Ne Qur-aane Paak Nahîn Sunãyã To Bhool Gaye Jabki Ḥaqeeqat Yeh Hai Ki Poore Saal Kalãme Pãk Kî Tilãwat Nahîn Karte Hain Goyã Ki Un Logon Kî Nazar Men Qur-aane Pãk Ḥifz Karne Kã Maqṣad Bas Tarãveeḥ Parhãnã Hai Aur Tarãveeḥ Se Nã Jaane Kyã Maqṣad Hotã Hai. Bahar Ḥaal is Soch Ko Badalnã Chãhiye Ki Kalãme Paak Usî Waqt Yãd Rahegã Jab Qur-aane Paak Tarãveeḥ Men Sunãyã Jaaye, Kyon Ki Ham Buzurgon Ko Dekhte Hain To Un Kî Zindagî Men Kahîn Hamen Yeh Maqṣad Nazar Nahîn Aatã Hai, Jaisã Ki Sayyidî Ḥuzoor Taajush Sharee-'ah علیہ الرحمہ Ne Sattar⁷⁰ Saal Kî 'Umr Ke Ba'ad Kalãme Paak Ḥifz Kiyã, 'Ghaza Aur Mulke Shãm Wa'ghairah Men Kitnî Za'yeef Maawon Ne Kalãme Pãk Ḥifz Kiyã Lihãzã Hamen Yeh Baat Bilkul Zahan Se Nikaal Denã Chãhiye Aur Qur-aane Paak Ko Yaad Rakhne Ke Liye Rozãnã is Kî Tilãwat Karnã Chãhiye Aur Yahî Muḥabbate Qur-aan Kã Taqãzã Hai. *`Ab Aṣl Mas-alah Par Guftugû Karte Hain; Faqeer Ke 'ilm Men Tarãveeḥ Ke Nazrãne Kã Jawãz (Jãyiz Hone) Ke 3 Ṭareeqe Hain;`* ❶ Pahlã Ṭareeqah To Yeh Hai Ki Sunãne Se Pahle Ṣaaf Alfaaz Men Ḥaafize Qur-aan Kah De Ki Main Kuchh Nahîn Loongã Aur Sunwãne Waale Ṣaaf Alfaaz Men Mana'a Karen Ki Tumhen Kuchh Nahîn Diyã Jãyegã, is Sharṭ Ke Ba'ad Woh Kalãme Pãk Sunãyen Aur Phir Sunwãne Waale Muḥabbat Aur Ṣilah Raḥmî Ke Ṭaur Par Jo Chãhen Den, Yeh Lenã Denã Ḥalãl Hogã. ❷ Doosrã Ṭareeqah Yeh Hai Ki Sunwãne Waale Waqt Aur Ujrat Ko Muta-'ayyan Kar Ke Muṭlaq Kisî Bhî Kaam Par Sunãne Waalon Ke Saath ijaarah Kar Len. *`Maslan`* Sunwãne Waale Ḥaafiz Ṣaaḥab Se Kahen Ki Ham Ne 10 Din Tak Ek Ghante Ke Liye Yã 27 Din Tak Ek Ghante Ke Liye 25 Hazaar Rupyon Ke Badle Apne Kaam Ke Liye ijaarah Men Liyã, Ḥaafiz Ṣaaḥab Kahen: Ham Ne Qubool Kiyã, Ab Yeh Sunãne Waale Muta-'ayyane Waqt Men itne Dinon Ke Liye Unke Ajeer (Ujrat Par Kãm Karne Waale, Mazdoor, Naukar) Ho Gaye, Woh Jo Kaam Chãhen Len, is ijaare Ke Ba'ad Sunwãne Wãle Ḥaafiz Ṣaaḥab Se Kahen Ki Aap Tarãveeḥ Men Kalãme Paak Sunãyen To Yeh Jãyiz Hogã Aur Lenã Denã Ḥalaal Hogã. [Fatãwã Razviyyah Shareef, Jild⁸, Page¹⁶⁰, ق Mula'kh'khaṣan] ❸ Teesrã Ṭareeqah Yeh Hai Ki Namãze Panj-Gãnah Yã Namãze 'ishã Kî imãmat Ke Liye Un Ḥaafiz Ṣaaḥab Ko Muqarrar Kar Liyã Jaaye Jin Se Kalãme Pãk Sun-nã Hai, Phir Woh Tarãveeḥ Bhî Parhãyen, Ab Woh Tarãveeḥ Kî Ujrat Nahîn Balki Namãze 'ishaa Kî imaamat Kî Ujrat Hogî, Jo Bilã Shubah Jaayiz Wa Durust Hai. [Fatãwã 'Aleemiyah, Taraaveeḥ Kã Bayãn] Hamãre Ḥuffaaze Kiraam Ko Chãhiye Ki Jab Ma'aloom Hai Ki Nazrãnah Milegã To Kyon Na ise Jãyiz Wa Durust Ṭareeqe Se Liyã Jaaye. Allaah Ta-'aalã Ham Sab Ko Sa'khtî Se 'Amal Karne Kî Taufeeq 'Aṭaa Farmãye. Aameen ✍ Ṭaariq Maḥmood Razavee *Date:* 24 Sha'abãn 1445 Hijree Muṭãbiq 06 March 2024 'Eesvî ▬▬▬▬▬▬▬▬▬▬▬▬ یہ تحریر `اردو Urdu उर्दू` مِیں ↶ https://whatsapp.com/channel/0029Va4xNTcBlHpj2ZXcdA3J/816 येह तह़रीर `हिंदी Hindi ہندی` में ↷ https://whatsapp.com/channel/0029Va4xNTcBlHpj2ZXcdA3J/815