*Saas Bahu Me Zalim Kaun? Isi Tarah Badi Aur Chhoti Bhabhi Me Zalim Kaun?* Aapne aksar suna hoga ke saas aur bahu ki nahi banti, ya nand aur bhabhi ke darmiyan tension rehti hai, ya do bhabiyon ke beech hamesha khinchav hota hai. Haqeeqat ye hai ke na koi poora zalim hota hai aur na hi koi mukammal mazloom. Balki, aksar auratein khud apni zaat par zulm kar rahi hoti hain. Masla asal me tab khada hota hai jab logon ki tarjeehat (priorities) alag hoti hain. Jab insaan apni pasand ki cheezon ko barbad hota dekhta hai to use zyada takleef hoti hai. Misal ke taur par, agar nand ko ghar ka aangan saaf rakhna pasand hai, lekin use kitchen ki safai utni zaroori nahi lagti, aur doosri taraf bhabhi ke liye kitchen ki safai sabse zaroori hai lekin aangan ka uske nazdeek utna koi maqsad nahi, to dono ek dusre se naraaz rahengi. Yahi baat saas aur bahu par bhi lagu hoti hai. Saas chahti hai ke ghar ke riwaj aur tareeqe barqarar rahen, jabke bahu apni soch aur tareeqe se zindagi jeena chahti hai. Agar ye farq samajh liya jaye to bohot se masail aise hi hal ho sakte hain. Aam tor par, hum jis cheez ko zaroori samajhte hain, agar hame koi aisa shakhs mil jaye jo unhi baton ko ahmiyat de, to wo hame acha lagta hai. Lekin agar kisi ki tarjeehat humse mukhtalif hoon to hame us se shikayat hone lagti hai. Jabke ye zaroori nahi ke wo shakhs laparwah hai, ho sakta hai ke uski tawajjo kisi aur zaroori cheez par ho. Is liye, bad-zan hone se pehle hame doosron ki tarjeehat ko samajhne ki koshish karni chahiye. Agar ek dusre ko bardasht karne ki aadat dal li jaye to ghar ka mahaul khushgawar Rahega