أبسط خطة لأنجح رمضان 🌙 لو قلتلك فيه شوية هواء هيعدوا علينا اللي هيشمهم هيدخل الجنة هتعمل إيه، هتسيب كل اللي في إيدك من الصبح وهتطلع البلكونة ومش بعيد تطلع فوق سطح بيتكم علشان تستعد وتشمهم دا بالظبط رمضان يا جماعة( نفحة من ربنا باعتها لينا علشان تطيرنا للجنة) وأنت مش مطلوب منك غير إنك تتعرض لها وبس " إن لربكم في أيام دهركم لنفحات ألا فتعرضوا لها" الكون كله بيتهيأ للنفحة دي أبواب الجنة اتفتحت، وأبواب النار اتقفلت، والشياطين اتسلسلت كل دا ليه؟! علشان فيه نفحة هتطير ناس للجنة كل يوم. النبي صلى الله عليه وسلم قال " ولله عتقاء من النار وذلك في كل ليلة" خلي المقولة دي شعارك واكتبها قدامك. هقوم أقف وأتعرض للنفحة طب أعمل إيه علشان أكون من الناس اللي هتتعرض للنفحة ١)جهز شنطتك أي رحلة كبيرة بتحتاج تجهز شنطتك، جهز أدوات استقبال للنفحة دي علامة لقلبك وعقلك إنك داخل الرحلة وداخل على حاجة مختلفة ونية تؤجر عليها وربنا يعينك بسببها اقعد دلوقتي وجهز شنطتك( حط فيها أحلى مصحف عندك وسجادة مريحة وإسدال صلاة وعطريهم بريحة حلوة وخاتم التسبيح بتاعك حتى لو مش بتحبه دا هيعودك على الذكر وحصالة صغيرة تعودك على الصدقة اللي هتطلعها كل يوم وأخيرا جدول عبادات صغير كدا) ورقة جدول العبادات دي هنجهزها ومفروض منستقلش بها أبدا نحط فيها مربعات وهنعلم عليها ودي حاجة هتحفزنا ودا هيقودنا لخطة رمضان. هنعمل إيه في رمضان؟! عملنا خطة هتناسب الكل حسب ظروفهم، وخلينا نتفق إن رمضان شهر عبادة وعلشان نتعرض للنفحات لازم عبادة لذا حسب مسؤوليتك اقعد مع نفسك وحاول تفضي عدد ساعات للعبادة، كل اللي تقدر تأجله أجله وفعّل مود " بعد العيد من الوقتي" رمضان يستاهل إنك تعمل أكتر من كدا. مسؤولياتك المتبقية بقا حولها لعبادة بالنية، عددوا النوايا علشان الأجور تزيد. الأوقات البينية استغلها في العبادة وظفها لصالحك معاك مصحفك، سلسلة بتسمعها، خاتم التسبيح وغيرهم. الخطة مبينية على المحطات الأساسية في يومنا وهم الصلوات الخمس ( الصلاة على وقتها كل فرض في ميعاده) كل فرض هيفكرنا بعبادة متزامنة معاه الفجر " إن قرآن الفجر كان مشهودا " هتصلي الفجر وتمسك مصحفك تجيب الوِرد بتاعك وأنت وهمتك وكله خير بإذن الله. ولو عايز تبقى جامد اقرأ لحد الشروق ويبقى مبروك عليك أجر حجة وعمرة كاملين تخيل ثوابهم في رمضان! الظهر صلاة الظهر مميزة بالسنن الرواتب( نصفهم فيها ٦ ركعات) أربعة قبل واتنين بعد يبقى نركز نصلي سنة الظهر لو قدرت على دي باقي سنن اليوم سهلة وهتعملها. ومبروك عليك بيت في الجنة بالسنن الرواتب اللي صليتها. صلاة العصر العبادة المرتبطة بها أذكار المساء تفكرك بقا بالذكر تقول أذكار المساء وخاتم التسبيح في إيدك وجيب أي وِرد أذكار حسب همتك. صلاة المغرب العبادة المرتبطة بها الدعاء( عبادة عظيمة إنك بتلجأ لربنا وتطلب منه) استغل ربع ساعة كدا وقت المغرب وما تنساش إن ليك دعوة مستجابة وقت فِطرك صلاة العشاء العبادة المرتبطة بها صلاة التراويح والقيام والتهجد يبقى منضعيش دول طول الشهر. وبس دي خطة رمضان يا سيدي. #إلىَ_جِنان