خلينا نقول في البداية خالص: مهارة إن يكون عندي قدرة بفضل الله إن أحول الحاجة ال مش بحبها لحاجة بحبها أو حاجة نفسي اعملها ومش عارف اعملها دي مالهاش خطوات بطرق معينة ولكن ليها بعض الخطوات وكل واحد يطبق الخطوات بالطريقة المناسبة ليه. *أولًا:* لازم يكون عندي حاجة كدا جوايا ويقين إن الوقت ال هقضيه في الحاجة دي أو الشئ دا مش بيضيع؛ لأن كل الوقت دا عند ربنا وإن شاء الله ربنا يكتبلي الأجر _ ودايما ال بيخوفني إن أعمل حاجة وتضيع فكأني معملتش حاجة؛ فبكدا هتكون أول خطوة إن أتشجع وأبدأ وكمان أستمر. مثال_ فلو أنا مثلًا مش بحب أقعد على المذاكرة ودايما بحس إن كل ال بذكره بنساه ومفيش منه فايده، فالحقيقة الكلام دا مش صح، لأن فيه منه فايده كبيرة جدًا وهي إن دا أجر كبير عند ربنا لأن دا كدا أكأن بجاهد نفسي على العلم فكل لما بجاهد نفسي باخد أجر وكل ما بذاكر باخد أجر دا لو افترضنا إن نسينا المذاكرة يعني وكدا كدا مش بننساها كليًا. مفيش معلومة ممكن أذاكرها وأنساها كليًا؛ لأن لو لاحظنا في مادة معينة، أو درس مثلًا، أو حتى فصل معين ذاكرته وجيت يوم الامتحان بلاقي الدرس أو الفصل دا سهل أو مش بياخد الوقت الكبير ال بياخده الدرس أو الفصل الجديد. فبكدا نعرف إن المذاكرة أول مرة بتكون أصعب مرحلة لأن بتاخد وقت كبير غير لما باجي أذاكر تاني مرة؛ فلو جيت أذاكر فصل للمرة الأولى وليقته صعب أكيد مش كل لما أجي أذاكره هلاقيه بنفس الصعوبة فنطمن إن أول مرة أصعب مرة فناخد الصعب عشان نيجي للسهل. لازم نعرف إن المذاكرة دي تعب وحِمل على أي حد فطبيعي نلاقي عقلنا بيتهرب منها فيقعد بقى يتحجج بأي حجة عشان يبعد عنها زي مثلًا لو عندنا مشوار طويل بنتفق عليه غالبا بنتفق على الخروجة ومش بنخرج😂 فعقلي كدا بالظبط لو جيت أفكر واعمل جداول وخطط ومهام ففعلا بظبط الجدول% ولكن مش بذاكر 🥲. ففي بعض الأوقات نحتاج إن نبدأ علطول بدون مقدمات وبدون خطط ولا جداول ومهام ابقى اعملهم بعدين لما أدخل شوية في المذاكرة ولازم لما أجي أبدأ ساعتها أبدأ زي ما اتفقنا بدون حاجة وكأن لسه هبدأ مستلم المادة حالًا حتى لو مستلمها بقالي شهر ومذاكر فيها المهم الوقت دا أبدا. "المهم هو إني أبدأ وأكمل، حتى لو بخطوات صغيرة، لأن الاستمرار هو اللي هيخليني أوصل في الآخر!" وأي مجهود حتى لو كان بسيط، فهو بيتراكم وبيصنع فرق على المدى البعيد. _أسماء وليد_