د حضرت معاذ بن جبل"رض" ملي پوځي اکاډمۍ څخه ٢٦٨ تنه ځوان افسران فارغ شول ١٤٤٦ه.ق د شعبان المعظم ٢١ مه د حضرت ابو عبیده بن جراح ملي دفاع پوهنتون اړوند د حضرت معاذ بن جبل"رض" ملي پوځي اکاډمۍ څخه ٢٦٨ تنه ځوان افسران د څلور کلنې نظامي دورې له بشپړولو وروسته نن د یو لړ شانداره مراسمو په ترڅ کې فارغ شول. په یادو مراسمو کې د اسلامي امارت د کابینې یو شمېر غړو، لوړ پوړو چارواکو، ګڼ شمېر مسؤلینو او منسوبینو ګډون کړی وو. مسؤلینو نويو فارغانو ته په خپلو خبرو کې وویل:« تاسو د هېواد مسلکي کدرونه یاست در سپارل شوي مسؤلیت ته متوجې شئ او خپل مسؤلیت د مسلک په رڼا کې مخته یوسئ، کوښښ وکړئ چې د خپل هېواد د پرمختګ لپاره خپلې هڅې لا ګړندۍ کړئ؛ په ترلاسه شوو زده کړو بسنه مه کوئ لا نور هم په خپل مسلک کې پوهه ترلاسه کړئ ځکه د دې ملت تاسو ته سترګې دي او تاسو به د ملت زخمونو ته ملهم جوړیږئ». ورته مهال نویو فارغانو اسلامي نظام ته د خدمت کولو په پار بشپړ چمتووالی وښود او مراسم فارغانو ته د بری لیکونو په ورکولو سره پای ته ورسېدل. #د_ملي_دفاع_وزارت