ما استعديت ولا عملت أي حاجة و رمضان حيضيع مني !!! 😭 ◼️ عد معاي من 1 لي 4 : 1. "الانتصار على النفس يكون بالنقاط لا بالضربة القاضية" بدر آل مرعي نحن بسبب تصور إنو في معركة حتحصل رمضان بقى لينا حاجة توتر ، تكاليف و صعوبة و شي تقيل جايني ! شهر الخير و البركة و الفضل و البشارة و المغفرة بقينا نخاف بسبب إنو حاسين روحنا خاشين على امتحان له ما بعده و خلاص الوحش الكاسر و مصارعتك مع نفسك ! رمضان هو الشهر اللي الصحابة كانو بيستقبلوهو بالفرح و البشارة و بينتظروهو و النبي صلى الله عليه وسلم كان ببشر أصحابه بيهو . رمضان شهر لطيف أدخل عليهو بتصور إنو هبة و فضيلة ربانية الواحد بيستثمرها لإصلاح نفسه ؛ فترة نقاهة ربنا يسر لينا فيها أسباب الصلاح ، نزهة بين التراويح و السحور و تدبر القرآن و العشر الأواخر و ليلة القدر . أيوة فيهو مجاهدة و صبر لكن ما تنسى جمالية الشهر دا !! ◇ خت لي نفسك اهداف و حاجات عاوز تصلحها و تزبطها في نفسك فيهو : ■ القدرت عليهو >>> اسأل ربنا يبارك ليك فيهو. ■ الما قدرت عليهو >>> اسأل ربنا يقدرك عليهو لي قدام. 2. واقعية الخطة عامل من عوامل الإنتاجية . _ عشان يكون في حاجة محددة نحن عايزين نطلع بيها ، و خليها واقعية بناء على وضعك في شعبان عشان ما تحترق . ◼️ عدد الختمات اللي عايز تعملها من جهة الأجر و الثواب. ◼️ الأجزاء أو سور اللي عايز تعيش معاها و تستصحبها طوال رمضان . ◼️مواد التزكية و إصلاح القلوب اللي عايز تخليها معاك في رمضان. ◾️العادات اللي عاوز تزبطها في رمضان . - هدف واضح = خطوات ثابتة و دافع أكبر للتقدم. 3. العلاقة مع الله أوسع من حاجز الأرقام ! - ياخونا نحن بنتعامل هنا مع الكريم سبحانه وتعالى ، نظرة رضى واحدة من الله سبحانه و تعالى ممكن تكون هي المنقذة و هي اللي ترفعك و تدخلك الجنة ! آية واحدة من كلام رب العالمين ممكن تغير حياتك إذا عكفت عليها و تدبرتها برواقة ! 4. ما تنسى ناس البيت من مشاريعك : 🌧 ● حلقة تلاوة منزلية . ● تنزل حلقات برنامج تزكوي ( برنامج ذكركم مثلا بتاع شيخ محمد الأمين) و تعرضها في التلفزيون (بي فلاش أو بالبلوتوث ) بدل يحضرو مسلسلات رمضان :). ● اختيار كتاب بتاع رقائق و القراءة فيهو بعد الإفطار. نخلق لحظات رمضانية عائلية ❤️!. #الشهر_اللطيف 🌧 #رمضان_فرصة 🍃