*جبر الخواطر:* بدور على عروسة من سنتين وكان كل إما حد من أهلي أو جيراني يرشحلي واحدة وأروح أشوفها مشوفش فيها القبول نهائي فإبعت مرسال يبلغ أهلها إن كل شيء قسمة ونصيب؛ ومن تاني يوم أبدأ بالبحث عن عروسة تانية وهكذا.. لحد ما جماعة أصحابي إتفقوا مع بعض يرشحولي واحدة بترفض كل يوم والتاني عريس عشان أعرف إن اللّٰه حق! فتوكلت على اللّٰه وروحتلها والنيه نية خير زي كُل مرة مشيت فيها لبنت قبلها واللّٰه.. ولكني قبل ما أطلع على بيتها اللي وصفولي عنوانة بالدقة دخلت السوبر ماركت اللي تحته عشان أشتري باكت نعناع يغيَّر ريحة بوقي، فإتفاجأت بالبياعة اللي قاعدة فيه بتضرب قطة صغيرة بمنتهى القسوة عشان أكلت من طبقين لانشون فبوظتهم! فمقدرتش أمسك نفسي رغم إني في قرية غير قريتي وفي وسط ناس غير ناسي وقولتلها حرام عليكي دي مهما كانت روح برضوا وبعدين معندهاش عقل فغير مدركة لتمن اللانشون ده! مكنتش تعرف إن لازم تدفع فيه فلوس عشان تسد جوعها لإنها متعرفش يعني إيه فلوس أصلاً، وحتَّى لو تعرف وينفع تتعامل معاملة الإنسان مينفعش تعامليها بالقسوة دي لإنها صغيرة! فالرحمة يرحمك اللّٰه، سيدنا النبي قال دخلت إمرأة النار في هرة، حبستها، فلا أطعمتها ولا تركتها تأكل من خشاش الأرض . وبعدين طلعت خمسين جنية من جيبي إشتريت باكتين النعناع وقولتلها الباقي حق الطبقين اللي باظوا، وأخدت واحد منها أكلته كله للقطة وأنا واقف وشيلتها من على الأرض طبطبت عليها وبوستها من راسها.. وبعدين نزلتها على الأرض وأنا ماسك دمع عيني بالعافية، وإستحلفت الست دي باللّٰه هي اللي تأكلها الطبق التاني بإيديها جبرًا لخاطرها إن جاعت، وسيبتها وخرجت برَّة فلقيت راجل كبير في السن بيقولي ربنا يجازيك الجنَّة يبني ونعم التربية واللّٰه، وسألني إنت إبن مين؟ فإبتسمت وقولتله مش من هنا واللّٰهِ ياعم الحاج، بس جاي أتقدم لعروسة هنا فإدعيلي ربنا يتمم عليا بخير.. قالي يارب، وسألني بنت مين؟ قولتله بنت الأستاذ محمود خضر. فأخدني من إيدي بإبتسامة وقالي تعالى.. فمشيت وراه زي المغفل لحد ما دخلنا البيت إياه؛ والمفاجأة إنُّه طلع جدها وأكتر حد له دلال عليها في البيت! والغريبة إني شوفت القبول اللي كنت بدور عليه ولأول مرة فيها، والأغرب إن كلهم بلا استثناء وافقوا عليا في نفس اليوم وبدون ما يسألوا عني حتَّى! فإتفاديت من شماتة أصحابي ومن رفضها، وخرجت من هناك وأنا مجبور الخاطر عشان مهانش عليا خاطر مُجرَّد قطة بالنسبة لكتير من الناس!!