🇸🇩❤️لا تَحْزَنْ إِنَّ اللَّهَ مَعَنَا❤️🇸🇩
February 24, 2025 at 07:26 PM
- هشوفك بكرا . متلبسيش البنطلون الأسود دا
= ليه دا جميل عليا
- لو في دريس او عبايه تعالي بيها
= أنت بتهزر يا احمد
-صاحبي شافك بالبنطلون وقالي بص الفرسه دي
= وأنا أعمل إيه يعني
- انتي مش هترتاحي غير لما أدخل السجن في حد ..لو هترتاحي قولي
=سلام يا احمد
-سلامين
" أتعصبت من كلامه وعندت فيه و نزلت بنفس البنطلون الي قالي متلبسهوش ووصلت الدرس وأول ما لمحته من بعيد قلبي أتقبض وكان هاين عليا ارجع ألبس العبايه السوده ..أجمدي يا مريم هو مش هيتحكم فيكي "
" قربت منه ودخلت الدرس بسرعه بس هو لمحني ..
ينهار ازرق ، يارب مايكون شاف البنطلون "
= بص ياض المزه دي .. اجمد واحده في الدرس كله
-متتكلمش ع بنات الناس يسطا
= دا احنا دفنينه سوا
- طب ملكش دعوه بالبنت دي
=أشمعنا ..بتاعتك ولا ايه
-لا مش بتاعتي بس متقربش منها ولا ترمي عليها كلام
= باين عليك واقع بس يابختك دا انت معاك فرسه يعني
-أحترم نفسك للمره الأخيرة
=وإذا محترمتش يا عم احمد
"لسه المدرس هيبدأ شرح ولقينا اصوات غريبه ، جرينا نشوف في إيه لقيت احمد منيم صاحبه ع الأرض ونازل فيه بالبوكس في وشه ، المدرس جري عليهم بعدهم عن بعض واحمد بصلي بصه كلها شر ومشي "
"جه بالليل والمفروض يرن وانا ماشيه في الأوضه
رايح جاي و خايفه اقرب من التليفون .. وبعد خمس دقايق التليفون رن"
-أ..أ..ألو
=وقسمآ عظمآ يا مريم لو لقيتك ماشيه بالبنطلون في حياتك تاني لأكون كاسر رجلك أنتي اساسا واحده مبتسمعيش الكلام
-أسفه و الله
= مش هضعف ، وربنا وعزه جلاله الله لو لمحتك ببنطلون تاني لأكون .. لأكون
-أهدا طيب
=متقوليليش أهدا
-طب أنت كويس
=اه كويس شكرا ع سؤالك سلام
- أستني عشان خاطري
=عايزه ايه
-بحبك
= يعني ينفع أقولك حاجه وتعانديني ، انا مش بتحكم فيكي بس عشان عارف صحابي والكلام الي بيتقال
- خلاص بقا أنا أسفه حقكك عليا
= شوفتيني وانا نازل ضرب في الواد
- أتوجعت
=أنا موجعنيش غير كلامه عليكي وكنت عايز أخدك من وسط الناس وأمسك ايدك واعرفهم انك ملكي
-بتكسف
= وعد مافيش بنطلونات تاني
-وعد
- بس إيه رأيك فيا النهارده
" بدأت ألبس جيب ودريسات مع الوقت واحمد
بيحاول يبعد عني عيون الناس وحارصني بعنيه بس مكنش بيعرف يخبي حبه نظراته ليا كانت فضحاه و صحابي كلهم لاحظو وكانو بيجبولي أخباره اول بأول
خلصنا ثانويه ونزل التنسيق ودخلنا كليات مختلفه في محافظات مختلفه و مبقناش نشوف بعض نهائي و بنكتفي بالمكالمات بس .. بس كان عصبي وفي نفس الوقت حنيه الدنيا فيه"
-أنا سمعت أن النقاب بيحمي من أشعه الشمس وبيخلي الواحده بيضه
=عايز ايه يا احمد
-أنا مش عايز انا بقولك بس
=مش هلبسه
-وأنا عمري ما أجبرك تلبسيه .. بس قولت أقولك المعلومه
دي
=أمممممم
-ربنا مش هيدخلك النار
= احمممممممد
-هتبيضي ومش هتستخدمي صن بلوك تاني
= لا
-هحبك اكتر
= احممممممد
-خلاص ماشي تصبحي ع خير
"حصلت ظروف في شغل بابا فخلتنا ننقل لمحافظه تانيه واحمد أنشغل في شغله فتره كبيره عشان يجهز في الشقه بجانب دراسته وكان عدي علينا تلت سنين ونص من غير
ما نشوف بعض فقرر أننا نتقابل حتي لو من بعيد عشان مبقاش قادر يتحمل بعدي ..
أتفقنا نتقابل في مكان بس من بعيد من غير ما نتكلم أو نقرب من بعض عشان احمد كان عايز ربنا يبارك في حبنا و منعملش حاجه تغضبه و الفتره الاخيره كان بيحاول يقلل معايا المكالمات لدرجه انه مبقاش يكلمني غير كل جمعه "
-أنا مش لاقيكي ..طب انتي لابسه ايه
=ركز يا احمد
-حقيقي مش لاقيكي وعمال أبص في وشوش البنات
ينفع الذنوب دي كلها
=ركز بقولك
-يا مريم أنتي فين .. طب انتي شيفاني
=أنا متأكدة انك هتعرفني من غير ما أقولك ..متاكده انك هتميزني
- مريم ..أنا زهقت
=خلاص يا احمد أمشي سلام
- مريم أبوس إيدك قوليلي انتي فين عشان انا سافرت
سبع ساعات و مش قادر أقف و ضهري واجعني ويادوبك هشوفك كام ساعه .
=خلاص يا احمد أمشي بقولك
-مري ....
"مكملش الاسم ولقيته سكت وركز فيا جامد وفضل ساكت كام دقيقه وبعدين لفّ وشه الناحيه التانيه وعيط "
=احمد
-........
=في راجل بيعيط
-.......
= احمد
- يعلم ربنا دعيت قد ايه عشان أشوفك كدا
= أمسح دموعك هتخليني أعيط انا كمان
-دموعك غاليه اوعي في يوم تعيطي
=حلو عليا ... انا مستنيه رأيك انت بس
-كأنك حوريه نازله من السما أو ..أو لؤلؤ طالع من بحر ، وأبعدي بقا خليني أتزفت أغض بصري
- طب بما أني بقيت منتقبه يا أستاذ أحمد فأنا مش هتجوز إلا ملتحي
- دقني مش هتمسها مكنه حلاقه تاني
= وجوزي لازم يصلي الفجر
-ببقا تعبان من الشغل والجامعه
= دي شروطي
-أمرك يست البنات
= قيام الليل
- ينفع ركعتين بس عشان ألحق انام كام ساعه
=أممم مع انهم قلقين بس ماشي .. جوزي ميسهرش برا البيت وأخره الساعه ١٠
= أتجوزك بس وانا اعمل بيات شتوي صيف وشتا
- كلامك في نوع من الغزل يا أستاذ
=أنا أسف يا أختااااه
-ههههههه... ليك طلبات
- أنا دعيت ربنا أن زوجتي تكون حافظه القرآن كامل
بحزن : أنا مش حافظاه كله يا احمد
= للأسف مش هينفع نكمل مع بعض أنا لازم أسيبك
-هحفظ والله .. اديني مهله كام شهر وهختمه
=هفكر
-كام شهر بس ..والله كام شهر هحفظه بجانب المزاكره
=طب روّحي البيت وجهزي العصير وخلي ابوكي
يفتح بابه ع الساعه ٦
-ليه يا احمد
= أصل انا كنت جايب أهلي أفسحهم وقولت أعدي عليكم
-احمد انت مش بتهزر
=الرصيد بيخلص مش سامعك
-احمد اتعدل ...انت مش بتهزر صح
=التليفون هيفصل سلام
-احمممممد
=تتجوزيني يا مريم
-بس انا لسه مختمتش القرآن
= ما انا عاهدت ربنا أني زوجتي تختم القرآن ع ايدي..
أظن من حقي ألبسك تاج الوقار
-أنا بح..
=هششش في الحلال أحلا
-رضا عنك ربي
=وأرضاني بكِ...يا من جعلتي الحلال أحب إلي قلبي
-أنا همشي عشان أجهز
=أتفضلي يا أنس.. مريم أنتي مش لابسه جوانتي
-.........
=انتي اساسا واحده مبتسمعيش الكلام .. وقسمآ عظمآ يا مريم لو طلعتي تاني من غير الجوانتي لأكون ...لأك..
-بحبك
=لأكون بايس جبينك عادي يعني