بصى يا حبيبتى أولا لازم نفهم إن الصلاة عمود الدين يعنى اى عمود الدين يعنى مثلا لو شفتى منزل أكيد بيكون ليه عمود وعمود وعمود وعمود .... إلخ لو جينا كدا وقعنا عمود منهم مش البيت هيقع ؟ هتقولى أكيد أيوا هيقع.......كذلك الصلاة.......لو وقعت مش هتعرفى تقيمى دينك تانى من غيرها لو جيتى بصيتى كدا فى كتب السيرة هتلاقى إن الرّسول محمد صلى الله عليه وسلم لما مات عمه وزوجته السيدة خديجة -رضي الله عنها وأرضاها-........كان العام دا عام الحزن بعدها ربنا عمل حاجه زى هدية كدا للرسول صلى الله عليه وسلم وهى `رحلة الإسراء والمعراج` فى الرحلة دى الرسول طلع إلى السماء بصحبة سيدنا جبريل عليه السلام عشان ربنا يديله الهدية .....كانت الهدية دى هى الصلاة. ف بكدا نعرف إن الصلاة كدا أمرها مش عادى دا كمان غير فضل الصلاة انتى لما بتصلى الخمس فرائض بتوع اليوم ثوابهم كأنك صليتى 50 صلاة دا كدا أمر عظيم جدا ثانيا :لازم تعرفى إن الصلاة دى تنهى عن الفحشاء والمنكر.......بصى كدا ربنا قال اى `قال تعالى:-{اتْلُ ما أُوحىَ إليك من الكتابِ وأَقمِ الصلاة إن الصلاةَ تَنْهَى عنِ الفحْشاءِ والمُنكر...}` يعنى لما تيجى تعملى معصية أو كدا هتقولى هوا فى حد بيصلى بيعمل كدا........مرة مع مرة هتلاقى نفسك بعدتى عن المعصية ومش هيجيلك مزاج تعمليها تانى ثالثا:- لازم تعرفى إن فى حديث `عَنْ أَبِي سُفْيَانَ ، قَالَ : سَمِعْتُ جَابِرًا يَقُولُ : سَمِعْتُ النَّبِيَّ صَلَّى اللَّهُ عَلَيْهِ وَسَلَّمَ يَقُولُ : " إِنَّ بَيْنَ الرَّجُلِ وَبَيْنَ الشِّرْكِ وَالْكُفْرِ تَرْكَ الصَّلَاةِ ".` يعنى اللى مش بيصلى زى الكافر العلماء مختلفين إذا كان كفر أكبر أو أصغر لكن فى النهاية هو كافر .......وجزاء الكافرين النار وأكيد انتى مش عايزه تكونى معاهم رابعا لازم تعرفى إن الرسول صلى الله عليه وسلم كان بيقاتل عشان الإسلام عشان الناس تشهد أن لا إله إلا الله وأن محمدًا رسول الله وبعد كدا علطول عشان الصلاة `عَنْ وَاقِدِ بْنِ مُحَمَّدٍ ، قَالَ : سَمِعْتُ أَبِي يُحَدِّثُ عَنِ ابْنِ عُمَرَ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ : " أُمِرْتُ أَنْ أُقَاتِلَ النَّاسَ حَتَّى يَشْهَدُوا أَنْ لَا إِلَهَ إِلَّا اللَّهُ، وَأَنَّ مُحَمَّدًا رَسُولُ اللَّهِ، وَيُقِيمُوا الصَّلَاةَ، وَيُؤْتُوا الزَّكَاةَ، فَإِذَا فَعَلُوا ذَلِكَ عَصَمُوا مِنِّي دِمَاءَهُمْ وَأَمْوَالَهُمْ إِلَّا بِحَقِّ الْإِسْلَامِ، وَحِسَابُهُمْ عَلَى اللَّهِ ".` كمان لازم تعرفى إنك لما تصلى انتى كدا بتكوني واقفه أمام الله عز وجل طب لو متكاسلة عن الصلاة افتكرى دا دايما وقولى لنفسك هو اللى ف إيدى دا أفضل من إنى أقف بين يدى الله 🥹 فكرى دايما نفسك بالاية الكريمة `{قُل أذلك خَيرٌ أم جنةُ الخُلد التى وُعد المتقون ....}` فكرى نفسك إن نعيم الآخرة خير وأفضل من نعيم الدنيا بكثير تذكرى `قول الله تعالى:-بل تُؤثرون الحياةَ الدنيا ،،،،والآخرةُ خيرٌ وأبقى` عايزاكى تفكرى نفسك بالوقوف أمام يدى الله هوا احنا هنقف قدام ربنا أيوا هنقف عشان ربنا يحاسب كل واحد على عمله وبيكون فى حاجه زى ساتر كدا عشان محدش يعرف عمل التانى عشان ربنا ستير بيستر كل واحد > صلاة العصر يا راغبين الجنة > والآخرة خير وأبقى...♡