+ سؤال للبابا شنودة عن التسرع : +++++++++++++++++++++ + س : مشكلتى هى التسرع وقد يسبب لى التسرع مشاكل فماذا افعل لكى أتغلب على التسرع ؟ + ج : + الانسان المتسرع بإستمرار بيكون مندفع والاندفاع بيجيب أخطاء الكتاب بيقول ليكن كل إنسان مبطئا فى التكلم مبطئا فى الغضب مسرعا الى الاستماع يعنى يخلى باله يسمع أكتر من ما يتكلم مسرعا فى الاستماع مبطئا فى التكلم مبطئا فى الغضب لان غضب الإنسان لايصنع بر الله الانسان المتسرع ساعات أعصابه بتكون أعصاب تعبانة يعنى إيه أعصاب تعبانة الشخص اللى أعصابه هادية يقدر يحتمل فى هدوء اللى أعصابه تعبانة بيبقى بيسمع الكلام وهو بيغلى مش قادر يحتمل نفسه ولازم يرد ولازم يتكلم مش عايز يفكر كل اللي أمامه ان هو يرد ما بيفكرش يرد يقول إيه لكن المهم يرد وبس + وكمان الانسان المتسرع ساعات بيضع أمامه خطوة واحدة ومايهموش الخطوات اللى بعد كده زى واحد يقول أصل أخبط الخبطة دى واللى يجرى يجرى لكن الانسان اللى مش متسرع مايخبطش خبطة يقول لو أعمل كده يجرى إيه بعديها ورد الفعل إيه بيحصل إيه النتيجة تبقى إيه + الانسان المتسرع قليل التفكير عباره عن اعصاب منفعلة وتفكير قليل ولذلك كثيرا مايقع الانسان فى أخطاء نتيجة لهذا التسرع يقع فى أخطاء + الانسان المتسرع عرضه انه يندم ويقول ياريت فكر قبل ان تتسرع وفكر قبل ان تتكلم فى انسان يتكلم ويتصرف بسرعة وبعد كده يقعد يفكر بعد مايشوف النتائج الصعبة + كمان الانسان المتسرع أكيد انه لم يشرك الله معه فى العمل ولا فى الفكر ولا فى الكلام لان لو أشرك الله معاه فى الكلام وفى الفكر كان يتباطئ ويقول لما نشوف ربنا يريد ب إيه نستنى لما نشوف إرادة ربنا نعرض الأمر أمام الله ونشوف النتيجة إيه لكن الانسان المتسرع مابيعرضش الأمر على ربنا مجرد إنسان بيتصرف وبس ببشريته بدون أن يدخل ربنا فى الموضوع + أيضا الانسان المتسرع معندوش طول أناة معندوش طول بال بينما من ثمار الروح القدس طول الاناة فالتسرع يضر كثيرا + فالتسرع لا فيه إيمان ولافيه إدخال الله وإشراك الله فى الموضوع ولا فيه تفكير ولا فيه أعصاب هادئة ولا فيه دراسة وتفهم إنما إندفاع + نصيحتى للأخ المتسرع إنه يفكر كتير ويصلى كتير ويتباطئ كتير ومايفتكرش ان الدنيا هتخرب لو ماخدش التصرف ده النهاردة أو لو ماتكلمش دلوقتى أبدا مش هيجرى حاجة + إعرف أيضا إن التسرع يتنافى مع الرزانة الانسان المتسرع غير رزين يتنافى مع الرزانة ويتنافى مع الدقة يتنافى مع حياه التدقيق الانسان اللى بيتسرع مابيدققش اى حاجة بتجيله بيشتغل بيها + والتسرع نوع من الإرتجالية فى التصرف الانسان بيتصرف إرتجالى بدون مايفكر + ولكن هذا لا يمنع ان فى أمور تحتاج الى بت سريع قبل ان تتطور الى أسوء لكن أيضا هذا البت يكون بحكمة مايكونش بتسرع فى فرق بين سرعة البت وبين التسرع على رأى واحد من الشعراء قال ( قد يدرك المتأنى بعض حاجته وقد يكون مع المستعجل الذلل ) يعنى المتأنى ده بيدرك حاجات واللى بيستعجل ده بيقع فى الغلط فيبدرك المتأنى بعض حاجته وقد يكون مع المستعجل الذلل فرد عليه واحد تانى يقوله ( وكم أضر ببعض الناس بطأهم وكان خيرا لهم لو أنهم عجلوا ) فالانسان الحكيم مش معناها باستمرار يكون بطئ فيه أشياء تحتاج لسرعة برضوا بفهم وسرعة بتعقل وسرعة بدراسة وسرعة بعرض الأمر على الله أيضا لكن ماتكونش نوع من التهاون و التباطئ الى أخره + الانسان المتسرع عليه أيضا أن يدرس الاخطاء التى يقع فيها أثناء تسرعه ويبكت نفسه عليها بستمرار وكل مايجى ياخد موقف بتسرع يقول أنا المرة اللى فاتت جرالى كذا وجرالى كذا ووقعت فى كذا الى أخره وبهذا الشكل يجب ان هو يخاف من التسرع بتاعه ويتباطئ قليلا