#_مهدويات -37 ____________________1 الشيخ حيدر الحميداوي • إلك شايل محنه ماكله ضلوعي إلك سويت - يم - بجاري دموعي إلك عايش وقف بالدنيه يامولاي حرام بدون ذكرك يخلص اسبوعي ____________________2 عمار هليل الواسطي • إلك شايل محنّه وشوگ يالغايب منهن دمعي وشّــل والگلب ذايب بحسرة وينك إنته الحيره وسط الروح ولا أدري الزمن بفراگك اشجايب ____________________3 ابو محسن المشكوري • الك شايل محنه مغركه الدلال وهيه الربح عندي وهيه راس المال غالي وبس الك جلمة الغالي تلوك والغيرك نشاز اتصير من تنكال ____________________4 مهدي التقي • إلك شايل مَحَنّه بگد حنان أمي ويَمْ سرداب بيتك أنْسَه حتّه إسمي من آخر سفير لهسّه أدوْر إعليك يمته أتعود ؟ آنه أستاهْدَك يمي ____________________5 علي هادي الخزعلي • الك شايل محنة اتصفن ام النوگ و ايام الاسبوع احبال عالمخنوگ يبوصالح خنگتي اعليك تشبه حيل طفل توه حلى والهسه ما مشبوگ ____________________6 علي الشملاوي • الك شايل محنه هدلت حيلي ابجي عليك ناس البجي تبجيلي تعال بداعت العصروها خلف الباب اكولن هسه يرجع مانمت ليلي ___________________7 كريم الدراجي • الك شايل حزن بس حزنك شكبرة وداعت شامتك وعيونك الخضرة اعله گد جروح گلبك ثوبينة دموع بكد بيت الاحزان و شوغة الزهرة ____________________8 المرحوم الشيخ احمد الشامي • الك شايل محنه وشوگ يالغايب يالعمرك چبير وشاب مو شايب من تظهر واكحل بشوفتك عيناي گلبي ينتعش لبفرگتك ذايب