إزاي أربي بنتي على الصراحة وتيجي تحكيلي دايمًا عن اللي بيحصل معاها، وفي نفس الوقت يكون ليها مساحة خاصة بيها؟ الله يسعد قلب كل أم، بروحي واللهِ 💜 أول حاجة، متعاقبيهاش لو قالت لك حاجة، حتى لو كانت غلطة. متعايرهاش بيها بعد كده، لا تلميحًا ولا تصريحًا، حتى لو بعد سنين. متحكيش لحد عن أسرارها حتى لو كانت حاجات بسيطة، خليها تحس إن خصوصيتها مصانة، وإنك أقرب حد ليها. متكونيش ذايبة في شخصيتها لمجرد تكسبها، بالعكس، خليكي صريحة معاها، وقولي لها إن مفيش حد في الدنيا هيحبها ويخاف عليها زيك، ولا حد هيفضل سندها زي أمها. وأكدي لها الحاجات دي: أمك مش هتفشي سرك. أمك مش هتخونك ولا هتتكلم عنك في غيابك. أمك هتحافظ على أسرارك مهما حصل. أمك مش هتضحك عليك ولا هتجملك في الغلط، هتنصحك وتوجهك. أمك مش هتشمت فيك لو اختلفتوا ولا هتكسرك بكلام عن أخطائك. أمك هي أول وأقرب صديقة ليك، وهي اللي هتفضل تحبك أكتر من أي حد. وكمان: استشيريها في بعض أمورك عشان تحس إن رأيها مهم. خديها معاك لوحدكم في مشوار أو نزهة، واتكلمي معاها كأنها صاحبتك، مش مجرد بنتك. جربي تديها سر بسيط كاختبار، قولي لها: "أنا هقولك حاجة ومحدش غيرك يعرفها"، وشوفي هتحافظ عليه ولا لأ. خلي عندها حرية في بعض التفاصيل، متجبريهاش تحكي كل حاجة، المهم إنها تحس بالأمان وإنك موجودة لو احتاجتك. متفتحيش دفاترها ولا تفتشي في خصوصياتها، راقبيها من بعيد بطريقة ذكية، لكن من غير ما تحسسها بعدم الثقة. وأهم حاجة، ادعي ربنا يصلحها، سواء كانت صريحة معاك أو بتحب تحتفظ ببعض الأمور لنفسها. ربنا يحفظ لك بنتك ويجعلها من الصالحات 💜