وقتك في رمضان ضيّق، عندك شغل ومذاكرة كتير، خلقك ضيّق... 7 حاجات لازم يكونوا في جيبك وانت داخل رمضان: 1- الإحسان (طالما قررت تعمل حاجة، اعملها بجودة عالية. هتحبس نفسك في صلاة التراويح ساعة؟ يبقى خلي صلاتك صح.) 2- تجارة النوايا مع الله (عدّد نواياك في المباح العادي، زي الطبخ أو العمل أو الصبر أو النوم أو الأكل.) 3- خطة الأعمال الموازية (يعني وانت نازل تشتري طلبات السحور، اذكر ربنا. وانت في المواصلات، اسمع قرآن أو محاضرة دينية. وانتِ بتطبخي، اسردي قرآن من حفظك، وهكذا.) 4- استثمار الأوقات البينية (قريبة من رقم 3، لكن دي أدق. عارف الدقيقة اللي نازلها على السلم؟ تقدر تستغفر فيها حوالي 60 مرة. الخمس دقايق اللي رايح فيهم أول الشارع تجيب كيس فول؟ تقدر تسرد فيهم صفحتين قرآن. ضروري تستغلهم!) 5- أنتوي ما لا تقدر عليه من الأعمال (اللي عندها ولاد ومش قادرة تصلي التراويح، قولِي: "لو كان عندي وقت، كنت هصلي فعلًا"، وإن شاء الله ليكِ أجر. اللي مش قادر يعتكف في المسجد، قول: "لو كان شغلي يسمح، كنت اعتكفت"، وإن شاء الله ليك أجر.) 6- ترك المحرمات "عبادة الأبطال" مين هيصلي التراويح في المسجد؟ أغلب المسلمين. مين هيصوم؟ الأغلبية. طب مين مش هيتابع مسلسلات؟! مين هيمسح تيك توك؟! مين مش هيسمع أغاني الإعلانات؟! أقل القليل... 7- تاجر مع الله بحسن الخلق (قال النبي ﷺ: "إن الرجل ليبلغ بحسن خلقه درجة الصائم القائم.") حسن الخلق يجوز على أهل بيتك برضو، مش بس للناس برا. كده كده اللي برا انت مجبر تحترمهم، بس أهل بيتك أحيانًا ممكن تسوء لهم، فـ تاجر مع الله بحسن خلقك. 🌙 لو عندكم وقت، هيكون مفيد جدًا لو حضرتوا الفيديو ده، مهم جدًا. بس كده، والسلام ختام، ودمتم سالمين ♥️ منقول