*VAIPHEI NAMPI PAWSAL PHA PU NENGDOLIAN SUANTE f/o NANGZAKAI SUANTE CHANCHIN CHAWMKIM* 1993-94 kum ah Vaiphei thisan, Vaiphei pau manglo ah, nam chuam lakah ki-thethâng talua kha, puaknat/ngaikhawk ziakin i nam lawi upate'n ki huaikhawm thak ding ah pan ahun la thak un, Pu Lengpau Khaute (Thadou pau thaw), VNO President leh Pu Lianzakap Suantak (Zou pau thaw), VNO Gen Secy. malatna in "Vaiphei re-unfication" ti dan chiapi in, i suapi-sanggam nam chuam laka ala kipia zo ta te kaikhawm kit in, pan ala la pan un, zia chun Pu Nengdolian Suante (Tedim pau thaw) ngeile i nampi kona aw hia in, Vaiphei nam itna ziakah, a pau kibatpi (Tedim Chin) te etkâwi di le khawksa lo in, i nampi kuang VNO adinga khapet zen in ala pang hi. Hun hung chia zel in, VNO ah cabinet member (Treasurer) tiang hun tu to in, zia zaw nunga chun 1997 gal buai in ahung lap to phat in, buai khawk laitaka, nampi leadership hangsan leh open taka la ngam ama hi ala hi. Ama VNO (VPC) a president ala hi sung ngei in Vaiphei te'n hun sawt pi tak MLA ala ki neilo nung in MLA ahung ki nei to pan hi. I cheng thâng takluat ziak un, Vaiphei in MLA khat nei di le haksa kisa mama lai kha, Pu Nengdolian diplomacy thiam ziak ngei inle, 2002 kum ah Henglep leh Singngat constituency a T. Manga Vaiphei leh Thangso Baite teltin ala hi thepthup hi. Pu Nengdolian hi puitu pha leh mi hangsan tak ahi. 1997-98 kum ah unau kâl ah buaina a um lai in ama leadership na nuai in Vaiphei chate tamtak in bitna a nei khawlaw ui. Thadou pau thaw Vaiphei chate umna haw attack dingah ZRA te'n plan a siam lai ua ala phallo ziak in ZRA te'n a gawt ua, a chung ah khut a thâk bep uh hilo in zan khawvâk in ekbuk sungah a khum ui. A mi a sa te vengbit na dingin haksatna namênlo ala tuak hi. Hun hung chia zel in, Vaiphei leh Zomi kikâl ah kihiatthiam lo na neuh neuh a hung um sek ah. Pu Nengdolian in vision nei tak mai in galvan kihawm hitin uh, Vaiphei leh Zomi hi a chuam gel in um mai hitiu ti in hangsan tak in ala gen ahi. Zia gual ah puitu pha leh ginum Vaiphei chate'n i la nei khak ziak ua Vaiphei chate tamtak hing leh dam ah ala ki um thei ahi ti hethak thak hitiu. Pu Nengdolian in a cha te pawsal 4 leh tu pawsal 4 banah a lungsiat mama a Nam mite a sing ah sim te nusia in June 8, 2014 ni in kumtuang mun ding zuan in a chia tai. *A hinkhaw matdan tangpi:* Pu Nengdolian Suante (65 years, 9 months & 5 days) chu September 3, 1948 kum in Pu Lamkhup leh Pi Khaizen te kal in Murlen village, Champhai District, Mizoram state in ala piang hi. A neulai in a pa'n ala beisan ah, a nu tawh meithai in a khawsau ah, aman suapi numei Kapzadim a nei hi. Kum 1967 ah Manipur pemlut in zia chun Singngat Sub-division ah H. Bualkawt khua'n a pemlut ui. May 5, 1967 in Assam Regiment in ala lut hi. March 23, 1974 kum in azi Haukhenching tawh Pastor Gokhawlian in Singngat ECC biakin in ala ki khutsui sak hi. Zia nung achu Lamka khawpi chenglut in College Road, New Lamka ah khawsa in zia chun kum 1986 apat Cement Craft Industry a pandawk hi. Kum 1994 in Vaiphei National Organization (VNO) New Lamka Unit Founder Chairman in ala pang hi. Kum 1995 in Vaiphei National Organization (VNO) Lanva Block ah Chairman in ala pang hi. Kum 1995-97 kikal in Vaiphei National Organization (VNO) General Headquarters ah Treasurer in ala pang hi. April 11, 1998 ah Vaiphei National Organization, General Assembly ah GHQ President ding ah teltin in a um ah, term ni na ding ah kum 2001 ah teltin in ala um kit ah, kum 2004 tiang VNO General Headquarters ah President in ala pang hi. VNO president a tuk hun ah a sepdaw leh a panna te: September, 1998 kum ah VNO represent in ZC te tawh Indian Prime Minister Atal Bihari Vajpayee leh Home Minister Dr. Murali Manohar Joshi te kimupina'n a pang hi. VNO President a tuk sung in unau buaina (1997-98) ah genthei haksa tak ah a mi a sa thingtang kawchawng ah khawsa te natiang a keng ah chia in mun tamtak fangkual in ala vetha, ziaban achun Henglep Sub-division ah Chiangpi khua'n 'Rest House' khat ala bawldawk hi.