Hiat dang neilo kêi ah Kuki te siatna bep gen gen ziang ah i nam Vaiphei khangto ding ahem? Vaiphei ka hi la kiti ahi chun la Nam puitu vaihawmtu te thupûkna chu zâbawl unla, mingawl la hilo uh chun zui na chang hiau in. 1997 thu la hung gen veu sek ua. Zia hun leh mun a kha Kuki pumpi le hilo, Churachandpur district sung ah Kuki te tawh Zomi te kihiatthiam lo na tung ahia, Vaiphei te chu Zomi ah um ala hi ziak leh Vaiphei cha hunkhawp Zomi te pangbel ah i la um ziak ua i In leh lo teu a hal ua, ei la tha uh ahi. Zia hunlai akha kuama bel chuam neilo in neutral tak in ala um leuhin a thuak ah pang lo hial ding ihiu. Gal pan tu ah pang le kihi sam lo mi kikâl ah i va kisuk-awk khak ziak ua thina manna nasatak kituak ahi. Ei that te, In ei hal piak te chu kipakcha lo hial ahi, amau mawna le hun tiang a um tho nai. VPC GHQs in kuama a ki bêl pua, *VAIPHEI CHU MANI KENG ADIN DING TI AHI.* Bang ziak ah ZOMI COUNCIL apat VPC GHQs a pawt leh KUKI tawh mek mat zing ham gua la hiu em? KUKI nuai ah a ki um pua, um le ki um lo ding ahi. VPC in ziat leh vei tawh kituak tak um a tup a ngim hi ngei ding ahi. ZOMI COUNCIL a pawt san vang a ki mêl mâk na ding a um chuam pua, kuamasap a ki lungtuak pi phawt tawh kalsuan khawmpi thei ding in le man bawk in au. Hun chiasa KNF-P te khansiatna thu hi a ki pakcha diak pua. ZOMI COUNCIL nuai ah i um lai uh ahia, aleh nikhat thu ah Tuili nâklam khaw guk (6) kihal te kha bangziak ah ZRA te'n del lo ahiu em? Bangziak ah Tonglawn K & D, Bualmual, Vawkbual L & M kihal ni kha a del lo uh ahi em? ZRA te venbitna chu khawilam tung ahi tam? Phainuam ah i thi nau hile i gen veu ua ka suapi pa ngeile a thi'n a pangkha ka pawna ma ma hi, ahinla zia hun lai ah i belchak te'u ZRA te'n ei guard lo ziak ua melma te'n ei tha uh ahi. KNF-P te ei tha i gen tam po leh ZRA hin Vaiphei ahuk lo zia kilang hilo ahi em? Bang a ti leh ZRA te hat zawlo na phawldawk sek la hiu em? Zia hunlai achun Vaiphei ZOMI um ahia, KUKI leh ZOMI kihiatthiam lo na ziak in, Vaiphei te'n Zomi te pang i la bel ziak ua KNF lam te'n ei la do khak uh ahi. Venbitna nasem ding ah mawpaw tu chu ZRA te ahi. A venbit zawlo uh ahi em? Vengbit nuam lo zaw? Dawtna lianpi khat ahi. Gal nei chu i kivêng lâ leh thina manna i tuak ding ma ahi. Mi te gal anchâk ah pan pan ding hilo ahi. ZRA te muang zawlo na ziak in ZRA apat in Vaiphei tangval bang hem zat hung zâm dawk in USRA a hung phudawk ua. ZRA te'n USRA te a melma et ua, kimêl mak ziak in ZRA te'n mibang zat hem eithat ua, ahinla zia haw chu ZRA te ei bawl na va ki ti ti diaklo ahi. A pha bukim leh dik bukim ki um diaklo ahi. Ahin, zia haw chu tu vawikhawnung ah i va gen gen ah bang phachuam ding ahem? Khangthak te lakah kituak lo na chî phalo tu kihi zawlo maw? Khat leh khat ki zâ tua ah kituak tak ah tuibang ah luang khawm dial dial ding ki tup zing ahi. *SIZO-PAWK KHANGLAI*