*SoO group a lamkai ho, MLA ho Kuki-Zo Council le ZC lamkai ho Guwahati a kimuto ding* NITINTHUSOH (DAILYNEWS) ✍ 16-Lhaphul-2025 (Friday) Manipur boina toh kimat’a thinglhangmi Kuki-Zo ho thilngeh ‘Separate Administration UT with Legislature’ toh kisaiya panlah ding dan seikhomna ding in janni chun lamkai phabep Guwahati jon in ana kalsong uvin ahi. Tahsan umtah thulhut a kon a kimu in aseina a chun tuni nikho May nisim 16 nikho’a Kuki-Zo thinglhangmite lah a lamkai ho leh Suspension of Operation (SoO) group a um United Peoples Front leh Kuki National Organisation a lamkai ho jaona a Kuki-Zo MLA phabep jaona a thukhoh ho seikhomna anei diu ahi. Kihouna ding toh kisaiyin Kuki-Zo Council a kon Manipur dalha’a Guwahati a vaikon ho ahileh Henlianthang Thanglet, Chairman KZC; Thangzamang, Secretary Org. KZC; Thanglen Mate, Jt. Secretary KZC; Rev GS Gangte, Treasurer KZC; Richard Hmar, Finance Secy KZC; Ch Ajang Khongsai, Coordinator Governing Council KZC; Ginza Vualzong, Spokesperson KZC; Letsei Mate, Member KZC leh Paotin, Member KZC ahiuve. Amaho hin Kangpokpi jotpa in Guwahati anajon uvin ahi. Hiche kihouna a jao ding in Zomi Council a kon lamkai 4 - Vumsuan Naulak, Chairman Zomi Council; Lianzalal, Vice Chairman Zomi Council; Pauneihlal, General Secy., Zomi Council leh Anthony Lianboi, Finance Secy. Zomi Council avaikon doh uvin, amaho hin Guite Road ajot uvin Aizawl a kipat vanleng a Guwahati ajotdiu ahi. Thulhut in aseibena achun eiho demand toh kisai a thu seikhom ding titah louva tulaitah a Manipur a Popular Government semdoh ding toh kisai a jong seigilkhomna ahin neitei ding uvin tahsan aum in ahi. Courtesy: ET ©Nitinthusoh (Dailynews)