*Mugovera 7 Chikumi - June 2025* *Zvidzidzo zvamangwanani:* *Vhiki rechinomwe roKumuka kwaJesu* *Chiverengo chokutanga:* _Mabasa 28,16-20.30-31_ _Inzwai chiverengo chinobva mubhuku raMabasa Avapositori_ 16Patakasvika kuguta reRoma, Pauro akabvumirwa kugara oga nomusoja aimuchengetedza. 17Kuzoti kwapera mazuva matatu zvakaitika kuti Pauro akakoka vakuru vakuru vavaJudha. Pavakanga vaungana akati kwavari, “Varume hama, kunyange zvangu pasina chakaipa chandakaita kuvanhu kana kutsika dzamadzita teguru edu, asi ndakasungwa kuJerusaremu ndikaiswa mumaoko avaRoma. 18 Pavakandiongorora vakada kundisunungura, nokuti ndakanga ndisina mhosva inokodzera rufu. 19VaJudha vakapokana nazvo zvikandimanikidza kukumbira kusvitsa nyaya iyi kuna Siza, kunyange ndakanga ndisina mhosva yokukwirira rudzi rwangu. 20Ndicho chikonzero chaita kuti ndikumbire kukuonai, uye kuti nditaure nemi pamusana pokuti ndakasungwa necheni idzi nokuda kwechitarisiro cheIsiraeri.” 30 Pauro akagarako makore maviri ose achizvibhadharira. Ainyatsogamuchira vose vaiuya kwaari, 31 achiparidza umambo hwaMwari achidzidzisa zvaTenzi Jesu Kristu, zviri pachena asina anomudzivisa. *Shoko raMwari.* *Rwiyo rwokutsinhira:* _Nziyo 11,4.5+7. (D - 7)_ *(D) - Vakarurama, vachaona uso hwako TENZI.* 4 TENZI ari muTemberi yake inoera, chigaro choumambo chaTENZI chiri kudenga, maziso ake anoona, meso ake anoongorora vanhu. *(D) - Vakarurama, vachaona uso hwako TENZI* 5 TENZI anoedza vakarurama navakaipa, asi anovenga wakaipa anoda utsinye. 7 nokuti TENZI akarurama, anoda kuita kwakarurama, vakarurama vachaona uso hwake. *(D) - Vakarurama,* *vachaona uso hwakoTENZI.* *Kupemberera Shoko Rakanaka:* _Johani 16,7+13_ *Areruya, Areruya* Tenzi anoti: “Kana Mweya wechokwadi auya, achakutungamirirai muchokwadi chose.” *Areruya.* *Shoko Rakanaka:* _Johani 21,20-25_ _Inzwai Shoko Rakanaka rakanyorwa naJohani_ 20 Pita akatendeuka akaona mudzidzi waJesu wapamwoyo achitevera uya akanga akazembera pachipfuva chake pachirariro, uya uya akati kuna Jesu, “Tenzi, ndiani ari kuzokupandukirai?” 21Pita paakamuona akati kuna Jesu, “Nhai Tenzi, ko uyuwo uyu?” 22 Jesu akati kwaari, “Ko, kana ndichida kuti arambe aripo kusvikira ndadzoka zvinei newe. Chako iwe kunditevera.” 23 Pakabva pava norunyerekupe mune vehama rwokuti, mudzidzi iyeyu akanga asingazofa, asi Jesu akanga asina kuti haasi kuzofa, asi akanga angoti, “Ko, kana ndichida kuti arambe aripo kusvikira ndadzoka, zvinei newe?” 24 Iyeyu ndiye mudzidzi ari kupupura zvinhu izvi, uye ndiye akanyora zvinhu izvi, uyewo tinoziva kuti uchapupu hwake ndehwechokwadi. 25 Asi pane zvimwewo zvinhu zvizhinji zvakaitwa naJesu. Dai kuri kuti zvainyorwa zvose, chimwe nechimwe; ndinofunga kuti nyika yaitopata namabhuku acho aigona kunyorwa. *Shoko Rakanaka raTenzi*