*Svondo 8 Chikumi - June 2025* *Zuvaguruguru rePentekoste* *Chiverengo chokutanga:* _Mabasa 2,1-11_ _Inzwai chiverengo chinobva mubhuku raMabasa Avapositori_ 1Zuva rePendekositi parakasvika, Vapositori vakanga vari panzvimbo imwechete. 2Pakarepo kwakava nokutinhira kuchibva kudenga kuchinge kuvhuvhuta kwemhepo inesimba, kukazadza imba yose yavakanga vagere. 3Vakaona marimi anenge omoto akapararana achindogara pano mumwe nomumwe wavo. 4Vakabva vazadzwa vose naMweya Mutsvene vakabva vatangisa kutaura nedzimwe ndimi, sokupiwa kwavakaitwa naMweya kuti vataure. 5 Izvozvo muJerusaremu makanga muina vaJudha, vanhu vakanga vakazvipira pakunamata, vakanga vauya kuzombogaramo vaibva kumarudzi ose avanhu enyika dzose dziri pasi pedenga. 6Nokunzwa kutinhira uku, mhomho yavanhu yakaungana vakashamiswa nokuti mumwe nomumwe akanzwa vachitaura norurimi rwake. 7Vakakatyamara vakashamiswa vachiti, “Vose vari kutaura ava havasi vokuGarirea here? 8 Zviri kuitika sei kuti mumwe nomumwe wedu ari kuvanzwa vachitaura norurimi rwake? 9 Panoti, vaPatia, navaMidhia, kwoti vaEramu, navagari vokuMesopatamia nokuJudhea, novokuKapadhosia, kozoti vokuPondusi, neAsia, 10 kouyawo vokuFirigia, novokuPamufiria, kozotiwo vokuIjipiti, novokune dzimwe nzvimbo dzeRibhia pedyo neKurini. Kune vaenzi vanobva kuRoma vechiJudha, navakapindukira kuchiJudha. 11 Kune vokuKiriti nevokuArabhia, tiri kuvanzwa vachitaura mundimi dzedu mabasa makuru aMwari.” *Shoko raMwari.* *Rwiyo rwokutsinhira:* _Nziyo 104,1+24.29-30.31+34. (D - 30)_ *(D) - Tenzi tumai mweya wenyu, zvose zvinobva zvasikwa patsva.* 1Rumbidza TENZI mweya wangu, TENZI Mwari wangu, muri mukuru kwazvo. TENZI hakusi kuwanda ikoko kwakaita zvamakaita, makazviita zvose noungwaru, nyika izere nezvisikwa zvenyu. *(D) - Tenzi tumai mweya wenyu, zvose zvinobva zvasikwa patsva.* Mukabvisa femo razvo, zvinobva zvafa zvichibva zvadzokera kuvhu kwazvo. 30Mukatuma mweya wenyu, zvinobva zvasikwa, muchitobva mavandudza pasi. *(D) - Tenzi tumai mweya wenyu, zvose zvinobva zvasikwa patsva.* 31Mbiri yaMwari ngaigare nokusingaperi, Mwari ngaafarire mabasa ake. 34Dai waro munamato wangu wokurangarira kwangu kwangomufadza, nokuti ndinofara naMwari. *(D) - Tenzi tumai mweya wenyu, zvose zvinobva zvasikwa patsva.* *Chiverengo chechipiri:* _VaRoma 8,8-17_ _Inzwai chiverengo chinobva mutsamba yaPauro kuvaRoma_ Hama, 8 avo vanoda kuzvifadza nyama dzavo havagoni kufadza Mwari. 9Asi imi hamusipo kuzvifadza nyama yenyu. Imi muina Mweya Mutsvene, kana Mweya waMwari ari mamuri zvechokwadi. Ani nani asina Mweya waKristu, haasi wake. 10Asi kana Kristu ari mamuri, kunyange miviri yenyu yakafa nokuda kwechitadzo, mweya yenyu mipenyu pamusana poururami. 11Kana Mweya waiye akamutsa Jesu muvafi achigara mamuri, iye akamutsa Kristu Jesu kuvakafa, achapa upenyu kumiviri yenyu inofa nokuna iyewo Mweya anogara mamuri. 12Saizvozvo, hama, dzangu hatina chikwereti kunyama kuti tigare upenyu hwenyama 13nokuti ukagara upenyu hwenyama, uchafa asi kana ukauraya, neMweya, zviito zvomuviri uchararama. 14Vose vanotungamirirwa neMweya waMwari, vana vaMwari, 15nokuti hamuna kugamuchira mweya wouranda kuti mupindezve mukutya, asi makagamuchira Mweya wokuti muve vana. Ndiye anotigonesa kudaidza tichiti, “Abha! Baba!” 16 Iye Mweya pachake anopupurirana nemweya wedu kuti tiri vana vaMwari. 17Zvino kana tiri vana, tiri vagari venhaka. Tiri vagari venhaka yaMwari, uye vagari venhaka pamwe naKristu. Ndokunge tambotambudzikawo pamwechete naye kuti tigozorumbidzwa pamwe naye. Shoko raMwari. *Rwiyo rwePentekoste* _(Sequence)_ Uyai Mweya Mutsvene, Buritsai kudenga Miseve yomwenje wenyu. Uyai Baba vavarombo. Uyai Nyakupa wezvipo, Uyai Muvheneki womwoyo. Munyaradzi wakanakisa, Shamwari wadiwa mumweya, Mubatidzi wakanaka. Taneta, motizorodza. Tadziya, motitonhodza, Tachema, motinyaradza . Chiedza chitsvene kwazvo, Zadzisai mwoyo nemweya Yavatendi venyu vadiwa. Musati mavhenekera Hamuna chinhu mumunhu. Hapana chisina kusviba. Chenesesai zvine tsvina. Nokudiridza zvakaoma. Ponesai pose pane ronda. Kotamisai zvikukutu, Mudziise chine chando. Ruramisai chakatsauka. Mupe vatenderi venyu Vanotarisira kunemi, Zvinomwe zvinotiita vatsvene. Takarurama titusei, Tafa tipinzei kudenga; Tipei kufarako narini. *Kupemberera Shoko Rakanaka:* *Areruya, Areruya* Uya Mweya Musiki, pindai mumwoyo yavenyu, tungidzai moto worudo rwenyu mumwoyo yavo. *Areruya.* *Shoko Rakanaka:* _Johani 14,15-16.23b-26_ _Inzwai Shoko Rakanaka rakanyorwa naJohani_ Jesu akati: 15 “Kana muchindida, muchachengeta mitemo yangu. 16 Iniwo ndichakumbira Baba, ivo vachakupai mumwe Murevereri, achava nemi nokusingaperi. Kana munhu achindida anochengeta izwi rangu, Baba vangu vachamuda, tozobva touya kwaari toita musha wedu maari. 24Munhu asingandidi, haachengeti mazwi angu, izwi ramuri kunzwa harisi rangu asi kuti nderaBaba vakandituma. 25Zvinhu izvi ndazvitaura kwamuri ndichinemi. 26Asi Murevereri uya, Mweya Mutsvene, achatumwa naBaba muzita rangu, iye achakudzidzisai zvinhu zvose, achikuyeuchidzai zvose zvandakataura kwamuri.” *Shoko Rakanaka raTenzi.*