*Muvhuro 9 Chikumi - June 2025* *Kurangarira Maria, Amai veSangano* *Kurangarira Efrem muDhikoni neNgwazi yezvechitendero* *Chiverengo chokutanga:* _Mavambo 3,9-15.20_ _Inzwai chiverengo chinobva mubhuku raMavambo_ Adhamu apedza kudya muchero womuti 9 Mwari Tenzi akamudaidza achiti, “Uri kupiko?” 10Adhamu akati, “Ndanzwa kufamba kwamanga muchiita mubindu ndikatya nokuti handina kusimira, ndokubva ndahwanda.” 11 Mwari akati, “Ndiani akakuudza kuti hauna kusimira? Wadyasu muti wandakati usadye?” 12 Adhamu akati, “Mukadzi wamakandipa kuti ndive naye, ndiye andipa muchero womuti iwoyo ndikadya.” 13 Mwari Tenzi akabvunza mukadzi achiti, “Chii chawaita ichochi?” Mukadzi akati, “Nyoka ndiyo yandifurira ndikabva ndadya.” 14Mwari Tenzi akataurira nyoka kuti, “Pamusana pezvawaita izvozvi; wapinda rushambwa pazvipfuwo zvose nemhuka dzose dzesango. Uchafamba nedumbu rako uchidya guruva upenyu hwako hwose. 15Ndichaisa ruvengo pakati pako nomukadzi, napakati pechizvarwa chake nechizvarwa chako, chizvarwa chake chichapwanya musoro wako, iwe ucharuma chitsitsinho chake.” 20Adhamu akatumidza mudzimai wake zita rokuti Evha, nokuti ndivo amai vavanhu vose. *Shoko raTenzi.* *kana* *Chiverengo chokutanga:* _Mabasa 1,12-14_ _Inzwai chiverengo chinobva mubhuku raMabasa Avapositori_ 12VaPositori vakadzokera kuJerusaremu vachibva kugomo rinonzi Orivheti, riri pedyo neJerusaremu, chinhambwe cherwendo rwunobvumirwa pamusi weSabata. 13Pavakapinda vakaenda kuimba yapamusoro mavaigara. Paiti, Pita naJohani, kouya Jemusi naAndireya, kwoti Firipi naTomasi, kwozoti Bhatoromeo naMateu, kwozotiwo Jemusi mwana waArifeosi, uyewo Simoni Muziroti naJudhasi mwana waJemusi. 14Vose ivava vakazvipira pakunamata pamwechete namadzimai, naMaria amai vaJesu, navakoma, navanun’una vake. *Shoko raTenzi.* *Rwiyo rwokutsinhira:* _Nziyo 87,1b-7. (D - 3)_ *(D) - Munorumbidzwa kwazvo imi guta raMwari.* Pagomo rinoera ndipo pane guta rakavakwa naMwari. 2 Mwari anoda guta reZioni kupinda dzimwe nzvimbo dzose dzomaJakobho. 3 Munorumbidzwa kwazvo imi guta raMwari. *(D) - Munorumbidzwa kwazvo imi guta raMwari.* 4 Ndingagone kudoma veRahabhu, neveBhabhironi, kwoti veFirisitia, neveTire, nevekuItiopia, pakati pavanondiziva zvichatonzi, “Uyu newoyo akaberekwa imomo.” *(D) - Munorumbidzwa kwazvo imi guta raMwari.* 5 Kana zviri zveguta reZioni, zvingatonzi, “Nyika iyi neyoyo yakaberekwa imomo,” uye kuti Wokumusoro soro achaita kuti rimire. *(D) - Munorumbidzwa kwazvo imi guta raMwari.* 6 TENZI anonyora mubhuku ravanhu achitoti nyika iyi neiyi yakaberekwa imomo. 7 Vaimbi uyewo vatambi vose vanoti, “Takatubuka mauri.” *(D) - Munorumbidzwa kwazvo imi guta raMwari.* *Kupemberera Shoko Rakanaka:* *Areruya, Areruya* Makakomborerwa Maria Mandara Tsvene, nokuti munokodzera chiremba chavafiri vechitendero chamakawa na pasi pomuchinjikwa waTenzi. *Areruya.* *Shoko Rakanaka:* _Johani 19,25-34_ _Inzwai Shoko Rakanaka rakanyorwa naJohani_ 25 Izvozvo pedyo nomuchinjikwa waJesu pakanga pamire amai vake nomunun’una waamai vake Maria, mudzimai waKiropasi, naMaria Magadharena. 26 Jesu paakaona amai vake nomudzidzi wake wapamwoyo akamira pedyo, akati kuna amai vake, “Amai, mwana wenyu uyu” 27 Ndokuti kumudzidzi wake, “Amai vako ava.” Kubvira ipapo mudzidzi uya akavatora akavaisa mumusha make. 28 Mushure maizvozvi Jesu paakaona kuti zvose zvazadziswa uye kuti Magwaro Matsvene azadziswe akati, “Ndine nyota.” 29 Ipapo pakanga paine mudziyo uzere waini inovava. Naizvozvo vakaisa chifovefove chizere waini inovava iya pamushenjere, vakachiisa pamuromo pake. 30 Jesu paakasveta waini iya inovava akati, “Zvapera,” akakotamisa musoro ndokubva afa. 31 Zvarakanga riri zuva rokugadzirira Pasika, vaJudha vakakumbira Pirato kuti makumbo avo atyorwe, uye kuti zvitunha zvibviswe, kuti zvitunha zvirege kunge zviri pamuchinjikwa pamusi weSabata, nokuti Sabata iroro rakanga riri Sabata guru. 32 Saizvozvo masoja akaenda akatyora makumbo owokutanga, neewechipiri weavo vakanga varovererwa pamwechete naye. 33 Asi pavakauya kuna Jesu, vakaona kuti atofa, havana kumutyora makumbo. 34 Mumwe musoja akamubaya parutivi pake nepfumo, pakabva pabuda ropa nemvura. *Shoko Rakanaka raTenzi*