س/ لما يخلص الحيض (البريود) بكون كسلانة ومش قادرة احافظ ع الصلاة في وقتها تاني أعمل ايه؟؟ وهو المفروض أصلي بدل الأيام اللي ماصليتهاش وقت البريود ولا أعمل ايه ؟ ******* ج/ بالنسبة للكسل عن الصلاة بعد فترة الحيض (البريود) فالصح إنك تتعاملي معاه بذكاء ازاي؟؟! - اشحني قلبك قبل انتهاء الحيض بيوم مثلا بمقطع عن الصلاة وفضلها وعظم ذنب اللي بيضيعها - ماتسيبيش لنفسك فرصة تكمل في الكسل قوميها غصب عنها لكل فرض وماتسيبيش وقت للتفكير في الكسل لإنك مش بتفكري لوحدك ده معاكي الشيطان بيحسسك إنها جبل فمع الآذان قومي فورا - لو كسلتي عن فرض اعملي لنفسك عقوبة صدقة مثلا بمبلغ كبير عشان ماتكمليش - طبعا الصحبة اللي هتشجعك وتقولك عادي كلنا كده تبعدي عنها وتروحي لصحبة بتعظم أمر الصلاة - وقبل كل ده ومعاه الدعاء والاستعانة بالله وانك تقولي يارب أعني على ذكرك وشكرك وحسن عبادتك، رب اجعلني مقيم الصلاة 👈 أما بالنسبة للصلاة في الأيام اللي ماكنتيش بتصلي فيها بسبب الحيض (البريود) فدي مش عليكي قضاءها لحديث أم المؤمنين عائشة : "كانَ يُصِيبُنَا ذلكَ، فَنُؤْمَرُ بقَضَاءِ الصَّوْمِ، ولَا نُؤْمَرُ بقَضَاءِ الصَّلَاةِ." 👈 يعني اللي مطلوب تقضيه هو صيام الأيام اللي فطرتيها من رمضان بسبب الحيض أما الصلاة مش هتقضيها وتبدئي تصلي مع أول فرض بعد ماتشوفي الطهر #كاريكاتير_رسايل #رسايل_البنات