#سيناريو_رقم_5 🔴 بداية حلوة … نهاية كارثية مع الواتس المعدل ! 🔸 كالعادة عايش حالة حب انا و الاركيلة وكاسة المتة ... قلت لحالي أنو لازم اخد صورة و اتركها ذكرى مع إنو شكلي بالغلط ... والله ما كذبت خبر تصورت صورة وطلعت حلوة ولاقيت انو لازم حطها ستوري واتس وحطيتها ستوري وبعد دقيقتين بالضبط غيرت رأيي وقلت ما بقا بدي حط ستوري وعملتلا حذف ... هون طبعاً ما كان عليها ولا مشاهدة .. 🔸 بعد شغلة نص ساعة بتوصلني رسالة واتس من رفيقي نزلت البرداية لاقيت انو كاتبلي '' منور أبو الزوز '' انا هون انصدمت قلت شبو هاد ع شو عم يبعت هيك فتت ع المحادثة ولا لاقيتو راددلي ع الستوري وهون اجتني الصدمة الكبرى لأني أساسا انا شايل هي الستوري .. 🔸 رحت مباشرة حكيت الشب وبعتلو أني حاذفها وحكالي هوي انو معو الواتس المعدل وفيه ميزات خارقة وأمورو لوز ... هون انا لمعت الفكرة بعيوني وقلت لازم نزلو وصير هـ.ـكر متل رفيقي ... رحت ع السريع وغوغلت الموضوع ( بحثت عن الموضوع ع غوغل ) ولاقيت نسخة اسمها واتس الساموراي الخارق ... قلت انا اذا الاسم هيك لكن كيف الفعل ... والله وحملتو ... وأنا عم ثبتو بتطلع بوجهي حماية غوغل وبتقلي انو هاد التطبيق ضار ومن مصادر غير معروفة قلتلا لك التثبيت ع أي حال ... تثبت التطبيق وفتحتو وبلشت استمتع بالميزات .... وفكرت حالي صرت هـ.ـكر ماني عرفان أني صرت الضحية !!! 🔸 بعد فترة من الاستخدام بتفاجئ انو في رسائل عم تروح لرفقاتي من رقمي وشي وبحكيني رقم ع التلغرام بصير يبعتلي صوري وملفاتي بس للأمانة ما كان في شي مهم صرت احكي أنا وصاحب حساب التلغرام ونتناقش وقلتلو اشرحلي شو عملت وكيف صار هيك وكيف وصلت ل ملفاتي ... ☢️ ببساطة حكالي : 🔸 قلي أنو تطبيق الواتس المعدل يلي حملتو محقون فيه ملف خبـ.ـيث (تروجان) ... وأي جهاز بثبت تطبيق الواتس المعدل بإمكانو يتحكم فيه بشكل كامل وفيه يسجل صوتي ويفتح كاميرا حتى بدون ما اعرف او ما حس ب أي شي !! وحكالي انو 90٪ من التطبيقات المعدلة هيك بكون الوضع فيها ... ⚠️ طبعاً بعد فترة صغيرة انحظر رقمي من استخدام الواتس حظر نهائي وراح كل شغلي ومحادثاتي .. 🔰 منتعلم من هاد الشي : 🔸 أول شي لا تتجاهل حماية Google مشان لا يصير فيك متلي ... 🔸 تاني شي لا تستخدم واتس معدل ... 🔸 تالت شي ميزات زيادة = خصوصية أقل... 🔰 وفّر ع حالك وجع الراس وخليك ع الواتس الأساسي احسن شي ... #كروب_تكنولوجيا_المعلومات