UBUHLUNGU BOTHANDO 💔 💔 ISAHLUKO 28 MANKOE 0736687697 "Awungizwa ukuthi ngithini wena Mxolisi?" "Ngiyaxolisa mama ngikuzwile kahle." "Sondela lapha ngingakazondi kakhulu ngoba ngizacina sengikutshaya kakhulu." Wasondela uMxolisi amadolo egedezela umthambiso usugeleza wodwa. UMaDube wathi ebona uMxolisi esetshaywa wahle wagijima wayacatsha esesaba ukuthi sebengamtshaya laye izibunu. Wayenwaya kokuphela ezizwa zitshisa. "Bambelela isitumbu lesi ngifuna ukukutshaya izibunu lezi lawe." Wabambelela uMxolisi uswazi lwakhala kuye. "Ngiyaxolisa mama angeke ngiphinde futhi." "Kulungile, hamba uyekukha amanzi unyoko azowatsha izigqoko zami. Ngifuna ukuthi nxa ngibuya ngithole seliqedile yonke into." "Kuzwakele mama." Wayekhuluma eviyoca uMxolisi esephenduke isilima. Waphuma uLihle ezitshila isisu sikhonale esiyabona abangane bakhe. "Eta! Uryt lapho?" "Ngisharp unjani wena?" "Ngiyaphila kuphela angisakwazi Lihle usuzifihla loba yisisu lesi esikwenza kanjalo?" "Isisu asingenzi lutho khululeka Lindani." "Uyababa shemu ngiyakuvuma mntwana, lokhe ufana lakudala." Wathi esizwa ebukwa uLihle wahle wazitshila kakhulu ukuze uLindani ambuke kahle. ULindani bake bathandana kudala, ngokuhlala uhlala phetsheya kukaTshangani koDakamela. "Ubekwa yini lapha kodwa Lindani?" "Bengizokhangela wena manje sengikuthola ususuthi angiboni ukuthi indaba yami ungayamukela khathesi." "Khululeka Lindani, mina nxa ungifuna ngikhona." "Usulomuntu Lihle, uyakwazi ukuthi sitshontshane egangeni akusayenzi sengimdala lami." "Khululeka mina ngisasenguLihle omaziyo akutshintshanga lutho. Singahamba siyelala endlini." "Endlini ngaphi Lihle usuyendile?" "Emendweni wami mina ngiyazibusa akulamuntu ongitshayela umthetho, ufike ntambama uzathola lenkukhu ikulindile sengiphekile." "Ngiyaboga Lihle, ngiyakuvuma sibili awutshintshanga usasenguye engimaziyo. Sizabonana ntambama nxa ilanga litshona ngizafika lapho khululeka." Bavumelana uLihle loLindani kwabakuhle kakhulu. Waqhubeka ngohambo lwakhe uLihle kanye loLindani sebethembisane ukubonana ntambama. "Mntanami, sazithezela olulenkume lapha ekhaya." "Angithi mama nguwe owawugijima utshitsha koMangena usithi uyamthanda uLihle muhle kuloMaLuphahla." "Kanti wawufuna ngenzeni ngoba inunu yakho leyi yayingafanelanga ukuba ngumalukazana wami." "Kodwa mama uMaLuphahla wayengcono kuloLihle. Khangela khathesi uLihle usenzani?" Basebephoselana inyoka efileyo uMxolisi loMaDube ngoba basebephakathi kwetshe lembokodo sokunzima kibo. UMxolisi kwakufika isikhathi azizwe emkhumbula uMaLuphahla ngoba wayemhlonipha loba yena emenza isilima. "Ngithemba seliqedile elikwenzayo lina?" Kwakubuza uLihle engena esangweni. Bathithibala bonke ngoba kwasokufike inkunzi ehlaba ezinye. "Mxolisi ubusuqedile ukuhlambulula?" "Yebo mama besengiqedile konke." Babekhuluma benyenyeza ngoba babehlanze impahla bebonke bencedisana. "Ngakhuluma lani langenza isilima lina ziyelele. Liyangikhohlwa ukuthi ngingubani?" "Siyaxolisa sisi mina bengingezwanga." "Akuthathe amadrink lawa uwabeke kahle kulomuntu wemzini obuyayo lamuhla, ngikukweledile esitolo kuzamele liyekubhadala lizabona ukuthi lizathengisa imbuzi loba inkomo kuzaphuma kini ngoba mina ngifuna isikhwelede sibhadaliwe. MaDube ngifuna ubambe inkukhu leyana ebekelayo uyiqume ngoba inonile angifuni nkukhu ecakileyo mina, amaqanda akhona ungibilisele wona wonke engavuthwa uwalethe endlini ngizabe ngilele." "Kuyezwakala sisi." Wasuka uLihle waqonda ekamelweni abalala kilo. "Wena Mxolisi! Endlini akuthanyelwanga ubusenzani ngoba lezinto zihlezi butshapha?" Wathi esizwa ebizwa uMxolisi weza egijima ukuthi azozizwela kahle. "Ngiyaxolisa mama yikuthi bengiwatsha." "Sondela lapha ngikutshuke indlebe lezi." Wasondela uMxolisi bamdonsa indlebe zaze zasala zitshisa seziqala ukuvuvuka. Lathi lizilahla kunina eseqedile uMaDube, kwathi kusanjalo belinde uLihle ukuthi azobaphakela kwakhuleka umuntu esangweni. "Awu Lindani, usufikila sthandwa sami?" "Yebo uyakwazi nxa ngibizwe nguwe ngibuya ngigijima." "Asihambe siyendlini ukuze izilima lezi zingasiphazamisi nxa sixoxa. Mxolisi ngicela ulandele lamazi uLindani ufuna ukugeza." Watatazela uMxolisi ethatha amanzi ewalandelisela masinyane ngoba indlela yayisatshisa. "Ngiwabeke ngaphi mama amanzi okugeza?" "Dinga isepa lelitshe uqede umthelele amanzi uLindani ageze,engaqeda uhambe eyewachitha." "Kuyezwakala mama ngizabuya engaqeda ukugeza umuntu wemzini." "Hlala khonapha umlinde ageze." Wageza uLindani uMxolisi ebukele waqeda wachitha amanzi wabuyela emkulwini. ULihle wahamba esiyaphakulula umkulwini, wafika wathatha yonke inyama watshiya ikhanda lenyawo lomhluzi wathi besale besidla. Basala besidla kakhulu isitshwala lomhluzi ukuze belale besuthi. Kwakumnandi kuLihle loLindani besemathandweni, bathi sebeqedile ukudla kwangena uMxolisi ezobutha imincephe. "Uphangise uzolala ngoba sesifuna ukuvala." "Yebo mama." Waphenduka masinyane uMxolisi wafika wathatha obhayi wendlala phansi uLihle walala ethaleni loLindani. Walala esemathandweni uLihle uMxolisi ezigoqile esizwa ubuhlungu lapho nxa uLindani esengena ezulwini elitsha, kungathi ugwabisela uMxolisi ngoba wayehle amemeze kakhulu. ISAQHUBEKA