راقد في عنقريبي يوم الوقفة وبتونس مع مرتي عن ترتيبات بكرة .. قلت ليها نجيب اتنين كيلو ضان وفرخة كفاية قالت لي ديل ياراجل ماشاءالله سبعة شفع في عين العدو قلت ليها خلاص نجيب اتنين كيلو ضان وفرختين كفاية اكتر من كدة ماف اثناء ما بتكلم سمعنا كواريك الشفع وصوت الخروف وبكري جارنا بتكلم مع صابر ولدي (جرو من قرونو انت ولد خايب ولا شنو .. إنت زول بقيت كبير بتقرا في الثانوي وغالبك تجر خروف) مرقت من الغرفة مشيت اشوف الحاصل شنو لقيت شفعي فرحانين ينططو وصابر ولدي يربط في الخروف وبكري جارنا يكاوي فيهو وسألتو في شنو يابكري قال لي شنينة ام قرينات مالك انت كمان .. في اللحظة دي مرتي لبست توبها وجات وقفت جمبي وتعاين في الخروف مستغربة وقام بكري قالينا ياجماعة الموضوع كلو خالي ضرب لي العربية حا تجيك في البيت تركب طوالي تجينا الابيض تعيد هناك ونفس العربية حا ترجع بيها لحدي باب بيتك قلت ليهو ياخال كان تكلمني بدري وانا هسة جبت خروفي واتفقت مع نسابتي نعيد هنا قال لي خروفك ياهو مربوط هسة مع البهايم في الزريبة ونسابتك كل سنة بتعيد معاهم وانا عندي عرس ولدي بالله بطل الفارغة وتعال نحن مشتاقين ليك .. المهم دا الحاصل وخروفي جبتو بنية الضحية وحرم ما ارجع ابيعو وماعندك معاي كلام غايتو بكري بعد مانبح فينا واقنعنا مشى وجا راجع مع مرتو وجابو معاهم مستلزمات الخروف الاشتروها كلها لانهم مابقدرو يشيلوها في العربية ومافي حتة تتخت فيها ضحينا مع الاولاد تمام التمام ويوم العيد بليل جا مزمل جارنا وسالني من بكري ووريتو الحكاية وقام استغرب وقال لي بكري غشاك ومابعرف يكضب لاني امبارح مشيت زيارة الحارة ١٢ ولقيتو قاعد قدام بيت نسابتو في كرسي ورافع كرعينو في الشجرة ويلعلع في التلفون وجريت فيهو نور ونزلت سلمت عليهو ولقيت معاهو نسيبو السمين الجزار داك واخدت لي معاهم قعدة وادوني شربوت كارب كمان .. تاني يوم في العيد ياسهل مشيت الحارة ١٢ كداري وعارف المسافة قريبة ولقيتم خاتين صينية الفطور وبكري لما شافني اتلبش وحلف الا اقعد افطر وجابو الشاي وقال لي والله كلو من الزول دا واشر على نسيبو قالينا انتو كلكم اتنين وعندكم شافع واحد بس وعاملين دوشة دايرننا نجي نضحي معاكم واحسن ليك تجيب مرتك دي تجي تضحي معانا مرة واحدة .. اها انا وزوجتي فكرنا اننا مادام مضحيين هنا قالت خروفنا نديهو لي شفع فوزية مرتك ودا الحصل .. يعني بالواضح كدة دا بقا موضوع نسوان وانا وانت نمرق منو وما نجيب لي نفسنا البلاوي .. قام نسيب بكري قال لي اسمع اول حاجة نحنا هنا عندنا ضحيتين وهشام اخوي برسل قروش خروفو نضحي ليهو هنا وعزوز نسينا بجي بعيالو يضحي معانا وبكري الماسورة جارك دا بصراحة بنحتاج ليهو عشان نغلبو في الكشتينة وهسة انت ذاتك الله جابك عشان نغلبك معاهو .. جيبو الكشتينة وحرم ماتمرق من هنا .. تصدق يا سهل مشيت اشاكل بكري عشان غشاني قضيت اليوم في الكشتينة ورجعت منهم بالليل .. ياخ بكري عندو نسابة ذي السم .. موضوع الخروف الجابو لينا ذاتو نسيتو مع اللخمة والشربوت وجر الخمسينات .. لكن بيني وبينك انا وبكري غلبناهم لمن قربو يطردونا .. الغلب حااااار ___ سهل الطيب 💚💚 تابع قناة السودان علي الواتساب https://whatsapp.com/channel/0029Vb2jDpaIXnlnpxUJ5a1x تابع قناة السودان علي تلغرام https://t.me/sudaaan