ازاي أتعامل مع طفلي في أول 6 سنين من عمره؟ المرحلة دي من عمر الطفل تعتبر الأساس اللي بيتبني عليه كل شيء بعد كده، سواء في شخصيته، ثقته بنفسه، أو حتى طريقته في التعامل مع الناس. ومن تعاملي مع الأطفال ومشاكلهم من أكتر من 20 سنة، حابب أشارك معكم شوية مفاتيح بسيطة، لكن تأثيرها كبير جدًا: 🔹 1. حب بدون شروط: طفلك محتاج يحس إنه محبوب لمجرد إنه هو.. مش عشان عمل حاجة كويسة أو نجح. الحب اللي مفيهوش شروط هو اللي بيدي الطفل أمان داخلي. 🔹 2. خليه يحس بالأمان: الكلمة القاسية، الصراخ، التهديد أو الضرب.. ما بيعلّموش الطفل، بالعكس، بيكسروا جواه حاجات كتير. لما يحس بالأمان، يبدأ يثق في نفسه وفيك. 🔹 3. اسمعه بتركيز: لما يكلمك، انزل لمستواه، بص في عيونه، وخلّيه يحس إنك فعلًا مهتم. ممكن كلامه يكون بسيط بس عنده كبير جدًا فبلاش تحسسه ان كلامه تافه. 🔹 4. خليك ثابت في كلامك: النهاردة تقول له "ماشي" وبكرة تقول "لأ" على نفس الحاجة، ده بيشتّت الطفل وبيخليه مش عارف يتصرف. الثبات مهم. 🔹 5. اللعب مش تضييع وقت: اللعب هو لغته الأساسية، وسيلته إنه يكتشف ويتعلم ويعبّر عن نفسه. خليه يلعب.. وشارك معاه وقتك كمان. 🔹 6. شجّعه بطريقته هو: كل طفل بيتطور بسرعته. لما تشجعه على المجهود مش بس النتيجة، بتزرع فيه ثقة. ولما تبطّل تقارنه بغيره، بترتاحوا أنتم الاتنين. 🔹 7. علّمه يحكي عن مشاعره: لما يعيط، ما تقولهوش "عيب" أو "أنت ولد كبير". علمه يقول: "أنا زعلان"، "أنا مضايق"، وخلّي مشاعره تكون مسموح بيها. 🔹 8. كُن القدوة: طفلك هيقلدك أكتر مما يسمعك. لما تغلط، اعتذر. لما تتعصب، خده بحضن بعدين. هو بيتعلّم الحياة منك. في أول 6 سنين، كل كلمة وكل تصرف بيترسخ جواه. السنين دي مش بترجع.. بس تأثيرها بيكمّل معاه طول العمر.