*رسالة لطالب تالتة ثانوي ٢* 💊الكبسولة داخل اللجنة!👇 تريكات مش هتاخد من وقتك كتير صدقا، ولكن أنت الفائز بإذن الله، والمحتاج لده حقيقي، فاستثمر في وقتك بقراءة النص للآخر، وأنت المستفيد بإذن الله! ليلة الامتحان بقت بكرة! هنعمل إيه؟ 1️⃣أولا: لو عندك مراجعة احضرها، وركّز في إلي بيتقال، والي بيتحل، راجع الملزمة(أو الورق) إلي الأستاذ وزّعه عليكم، لو فيه جزئية في المنهج واقعة منك القِ نظرة عليها، وحاول تفهمها كده سريعا، وحل أسئلة كتير، ركز على الأسئلة جدااااا في الحل، واقرأ الأسئلة الي بتحلها ليلة الامتحان كويس، وبعدها القِ نظرة سريعة على السؤال بالإجابة بعد ما تحل، وتتأكد إن إلي حليته ده صح. كل ده اختيارات، وترشيحات ليك، اختار إلي يناسبك منها، بس أكيد مش هتراجع المنهج كله ليلة الامتحان! اهدى، وماتتوترش بقدر الإمكان، أو بمعنى أصح اتحكم في توترك.🤌 افتكر⬅️"ما لا يُدرك كله لا يُترك جُله"👌 التوتر طبيعي جدا، بس يكون دافع للسعي بقدر الإمكان لآخر لحظة، مش يوقفك عن السعي، وتتخيل سيناريوا حزين، ومرعب! لا، هو.ّن على نفسك، وافتكر إنها دنيا، و إن ده امتحانات دنيا، و إننا جايين نسعى، ونعمل إلي علينا، وبس، ونتيجة السعي ده عند ربنا الي هيختارلنا الأنسب لينا صدقا سبحانه! نرجع تاني يلا:) لازم تنام على الأقل ٣ساعات، لو مخلّص وعايز تنام أكتر تمام، لو لا أو عايز تخلص كام حاجة تمام بردو، بس لازم تنام ماينفعش نهائي تطبق لأن جسمك، ودماغك محتاجين يفصلوا عشان يحتفظوا بالي استقبلوه، ويكونوا مستعدين يستقبلوا تاني، ويتعاملوا في الامتحان، لكن لو طبقت فأنت بتملى دماغك معلومات، وارهاق، وبس، ففي اللجنة هتلاقي حرفيا الدنيا كلها اختلطت في بعض، فلازم تفصل حتى لو هتجبر نفسك على ده! 2️⃣ثانيا: خلاص رايحين اللجنة، وأنت بتستعد عشان تنزل؟ أفطر أي حاجة بسيطة حاول جدا، ويكون معاك زجاجة ماية، وتدخل بيها اللجنة كمان، مفيدة جدا، كل شوية تشرب منها. عرفت تصلي ركعتين ضحى؟ تمام، و لو صليت ٤ فتمام جدااا، وتكون من النوايا إن ربنا يكفيك يومك، وامتحانك ده، وفيه حديث بده. صلّ على النبي، واستغفر، وقول لا حول ولا قوة إلا بالله، بنية إن ربنا يذكّرك بالي هتحتاج تتذكره، ويكفيك همك، ويغفر لك ذنبك، ويسددك للإيجابات الصح، ودول مكملين معانا واحنا ماشيين، وواحنا في المواصلة...حرفيا طول الوقت طالما مش بتراجع حاجة تبع مادتك:) 3️⃣ثالثا: واحنا داخلين من باب المدرسة، وباب اللجنة، وواحنا خارجين بردو هنقول: { وَقُلْ رَبِّ أَدْخِلْنِي مُدْخَلَ صِدْقٍ وَأَخْرِجْنِي مُخْرَجَ صِدْقٍ وَاجْعَلْ لِي مِنْ لَدُنْكَ سُلْطَانًا نَصِيرًا } [سُورَةُ الإِسْرَاءِ: ٨٠] 4️⃣رابعا: واحنا طالعين السلم لللجنة هنقول الله أكبر في كل خطوة للسلم عن جابر بن عبد الله ـ رضي الله عنهما ـ قال: {كنا إذا صعدنا كبرنا وإذا نزلنا سبحنا}. (رواه البخاري) 5️⃣خامسا: هنعمل إيه في اللجنة؟ هتسمي الله، وتقعد عقبال ما الورقة تجيلك، أو لو جت ووزعوا الورق عادي بردو مش هناخد وقت ماتبصش فيها لحد ما تقول الكام حاجة دول🔽 ممكن تقول *سورة الفاتحة* بنية أنها تكون سبب فتح لك، *والمعوذات* (آخر ٣ سور في المصحف )، وتقول لا حول ولا قوة إلا بالله، وتصلي على النبيﷺ، وهكذا تستغفر (١٠ مرات) لو زودت، أو نقصت منهم براحتك، بس حقيقي لو خدوا منك ٥ دقائق يبقوا كتير فخد الخطوة ده، واعمل ده عشان ربنا يفتح عليك، ويرزقك بركة إلي أنت قرأته ده، حقيقي كلهم حاجة عظيمة جدا لا يسع نقول ثواب، وأجر، ونتكلم عن كل حاجة منهم بشكل منفرد، بس ممكن أقول أهم حاجة تكون مصدق، وعندك يقين، دول كلمة السر فالي اتذكر والي لسه هنذكره بإذن الله... 6️⃣سادسا: تمام خلصنا ممكن نحل بقى؟ آه طبعا يلا صلّ على النبيﷺ كده هنبدأ بالترتيب السؤال إلي نعرف نحله، ومتأكدين منه، تمام نحله، حتى لو في ورقة الأسئلة، لكن لو متأكد منه جدا بإذن الله حل في ورقة الإجابة على طول، عشان ماتضيعش وقت. تمام، وأنا ماشي بالترتيب قابلني سؤال، وأكتر مش قادر اديهم إجابة محددة اعمل إيه؟ شوف غيرهم ماتستغرقش وقتك، وتركيزك فيهم، شوف إلي ماشي معاك بفضل الله، واعمله، والي محتاج تقف عنده شوية اعمل جنبه علامة واضحة تبين إن ده لسه ماتحلش، وسيبه لحد ما تمر على الامتحان كله، تمام حلينا الي عارفينه، نعمل ايه في إلي سبناه ده؟ تمام هقول لك بس قبلها عايزة أقول تركاية مهمة فوق ماتتخيل، ومن أهم الأشياء إن لم تكن أولهم إلي مخلياني اكتب لك النص ده دلوقت بفضل الله، ومنته، ماتستهونش بيها فضلا! ألا وهي قبل ما تحل أي سؤال ممكن تقول: رب اختر لي ولا تخيرني، خلاص اختارت وهتحل؟ تمام، هتقول: بسم الله، رب اختر لي و لا تخيرني، يارب سدد قلمي للإجابة الصح إلي فيها نجاحي، وبعد ما تخلص الحل تستودع السؤال ده بالحل ده عند ربنا، قدرت تعمل ده تمام، ماقدرتش ممكن نسيب جزء استوداع الإجابات ده للآخر بعد ما نخلص، وخلاص تمام اتأكدنا إننا حلينا كله في ورقة الإجابة، وفيه وقت نراجع؟ تمام هنقفل الورق و ندعي ونستودع الورق والإيجابات ده عند ربنا مثلا: يارب استودعتك الورق ده، والإيجابات، والحل ده، نجاح، وامتياز، وتفوق، فإنه لا يضيع عندك الودائع يارب، اكرمني وعاملني بكرمك، وهكذا براحتك لو عايز تدعي بعد ما استودعت ورقك، وايجاباتك عند ربنا صلّ على النبي وقوم اتوكل على الله، وبحذرك إنك تراجع بجد، هتستفاد إيه؟ عوّد نفسك ماتراجعش، ولا تمشي مع حد هيراجع، و لا تسمع لحد هيراجع، اخرج كأنك مُدرس، مالكش دعوة عملت إيه، أو الناس عملت إيه، وحتى لو سمعت بالغلط وانت نازل، ولا تفرح لو إلي قالوه يوافق إلي حليته، و لا تزعل لما تسمع إنك ماعملتش ذيهم، بقول لك: خليك مُدرس كأنك مش بتنتمي لفئة الطلاب ده! مراجعتك مش هتفيد بشيء، بل هتزعلك، وزمايلك هيزعلوا، لو اختلفتوا في حاجة، وماحدش عارف مين الصح؟ ولو متأكدين فمالكوش دعوة بردو، وده مش حساباتكم انتم، أنت استودعت ورقتك عند ربنا صح؟ شكرا بقى مهمتك انتهت يلا على البيت نشوف المادة الجاية نظامها إيه؟ ونرمي إلي فاتت بخروجنا من اللجنة. 7️⃣ سابعا: وده نقطة بقى أنا متعمدة اذكرها آخر شيء رغم أنها أهم شيء! الغش، وفي بعض الأقوال "بنساعد بعض" حرام يا جماعة قال ﷺ: "من غشّنا فليس منا" الحديث بسيط، وكلماته بسيطة بس لو ركّزتت فيه، وشوفت معناه، وقرأت عنه هتتفزع والله! تعرف أنك لو نجحت بدرجة مش درجتك، ولا مجهودك، ودخلت كلية مش درجاتك إلي جايباها، أنت كده خدت مكان طالب تاني كان مستحق مكانك ده، وظلمته؟ خدت حاجة مش من حقك! تعرف إنك لو اشتغلت بعد كده بتخصصك، أو شهادتك حتى لو بتقول مش هشتغل بيها، واضطريت تشتغل بيها فلوسك منها حرام لأنها جت بالحرام أصلا فمالك، وأكلك ... إلخ حرام؟ صعبة قوي، والله صعبة جدا، وخطيرة، ومافيش حاجة تستاهل تغش، أو تغشش حد! أي حد عايزك تغششه عرفه ده، ولو حصل ده في اللجنة، ولا كأنك سامعه حتى لو صاحبك فأنت بتضره، وبتضر نفسك، ولو صاحبك ممكن تقوله على ده قبلها عشان يفهم موقفك، صدّقك تمام، شافك بتهرب، وبتحتفظ لمجهودك لنفسك، ومش عايز تساعده فبراحته، ليك إلي ربنا يراه منك، وأنك حاولت توضح له... وعدم غشك ده يكون سواء أنت مذاكر، وكله تمام معاك، أو لا! لو سؤال مش جاي معاك أي إجابة متأكد منها حل إلي يغلب عليه ظنك، ولو مافيش حل ماتسيهوش فاضي، وحلّه أنت مش بالغش! والله، وبالله، وتالله، هذا الفعل عظيم جدا عند الله، وبتكون بتعمل عبادة نادرا لو حد عملها، بتكون مميز عند ربنا بمحاولة أن تتقيه بإنك ماتغشش، ولا تغشش! من ترك شيئا لله عوضه الله خيرا منه والله حقيقي ربنا هيجبرك، وهيكرمك، وهيسترها معاك بفضله عشان محاولاتك في فعل يحبه، ويرضاه، وخوفت منه، ولجأت ليه، وما أغضبتهوش في وقت أنت كنت عايز حاجة تنجيك! فكن بجانب الرامي تنجو وربي! انتظروا بإذن الله نص تالت وأخير هنتكلم عن وقت النتيجة وما بعدها:) بس قرب النتيجة بإذن الله، بالتوفيق، وابشروا💪🙂‍↔ *ماتنساش تثبت وجودك ودعمك بتفاعلك على النص والشير في كل مكان💫⬆️* -رابط قناة التليجرام:⬇️ https://t.me/KetabatSafw -رابط قناة الواتس:⬇️ https://whatsapp.com/channel/0029Vb50CDn72WU5JBQLS423 -رابط صراحة لاستقبال أرائكم واقتراحاتكم يا كرام:⬇️ https://762378810.sarhne.com