ختمت كام مرة في رمضان؟ واحدة؟ اتنين؟ يمكن اكتر؟ ويمكن حتى بدأت ومكملتش؟ كان فيه حماس، منافسة، صحبة بتشدّك، وجوّ كلّه إيمانيات عالية. طب تعرف إنك ممكن تعمل ختمة، بس المرّة دي بتحدي أقوى؟! ختمة العشر من ذي الحجة.. يعني ختمة تلاوة في 10 أيام بس. وزي ما كنت بتحفز نفسك في رمضان بإنه شهر القرآن حفز نفسك في العشر من ذي الحجة بإنها أفضل أيام الدنيا والعمل الصالح فيها أحب لله. فتخيل بقى تتقرب لله فيها بكلامه سبحانه وتعالى! بس خلّينا واقعيين رمضان، الجو كان مساعد.. و️ردك مواظب عليه ️الناس حواليك بتختم ️سوشيال ميديا بتفكّرك ️المساجد مفتوحة طول الوقت. أما في أيام العشر.. مفيش الطابع الإيماني العالي اللي كان في رمضان مع ضغط الشغل أو المذاكرة حتى الموبايل بقى مشتّتك أكتر منه محفّزك. فلو مش هتقدر تختم، على الأقل زوّد وقت التلاوة. ولو همّتك عالية، حاول تختم ولو ختمة واحدة. ولو لسه ما بدأتش، استعن بالله وابدأ.. وبصدق نيتك تقدر تسبق وتفوز بختمة كاملة في موسم ذهبي إن شاء الله. القرآن في العشر مش بس ثواب، ده تجديد عهد مع كلام ربنا، بلاش ترجع تنشغل عنه تاني. #رمضانك_المُصغّر