د انساني نفس یو صفت "تلویم" دی، دا هغه صفت دی چې کله په انسان کې ژوندی پاتې وي؛ نو ښو کړنو ته یې هڅوي او په بدو یې ملامتوي او ګرموي. دا ډول نفس د قران کریم په اصطلاح کې "لوَّامة" بلل شوی. (وَلا أُقْسِمُ بِالنَّفْسِ اللَّوَّامَةِ). دا صفت انساني نفس کې الهي لارښود ګڼل کیږي، چې موږ یې په "ضمیر" (conscience)، سره یادوو. خو دا صفت طبعاً هغه مهال فعال او کارنده وي چې ژوندی یي او د کوم انسان چې دا صفت مړ شي، هغه ته ښه او بد، روا او ناروا او حیا او بې حیایي؛ برابر شي.