مع القرف الحاصل دا وعشان امنع النضمي الكتير مع سواقين العربات ، مركب مكنه برازيلي ومسجل إسمي في التطبيق ( روبيرتو فرناندو دا سيلفا ) بركب مع سيد العربية و بعمل فيها ما بعرف اتكلم إلا أسباني ، ف بتجاوز حنك الونسه دا لغايه ما أصل مكاني العاوز امشيهو .. بحاسب وبتخارج. المهم الليله العربيه الجاتني سايقها سوداني ، جيت راكب شبكني ليك هالووووو ماي فيرند .. وير آر يو فروم ؟ قلت ليهو فروم برازييييل .. شبكني ليك يا سلاااااااااام أهلنا وحبيبنا وقبل ما يسترسل معاي في الكلام شبكتو نو انجليش نو أرابك اسبانيول اسبانيول ( يعني يا ابو الشباب انا لا بتكلم انجليزي لا بتكلم عربي ، اسباني بس ) ف شنو عرف انو ماف طريقة اي تفاهم او ونسة مع الكائن دا لغايه ما أصل مشواري. المهم في السكة جاهو تلفون ، صاحبنا رد على التلفون وقال ليهو الو يا حسن كيفك كيف اخبارك ان شاءالله بخير .. سايق لي مشوار والله .. راكب معاي واحد برازيلي .. علي الطلاق تشوف وشو تحلف تقول التوم ود عمتك نفيسة ، رقييييق ذي سلك الاقاشي ، و اطرش ما بتكلم إلا أسباني. صاحبو اظن سألو قال ليهو جاي يعمل شنو في السعودية ؟ صاحبنا قال ليهو بي ضعفتو دي بكون مدرب لياقة بدنية في نادي .. اقسم بالله تشوفو تقول نازح من مدني. كدي عليك الله افتح الجزيره شوف الجنجويد ديل احتمال دخلو البرازيل وزولنا دا جا مكبرها من هناك .. في اللحظة دي اكتشفت انو الطعمجة دي جينات ف الشعب السوداني😂😀. الاسطورة تابع قناة السودان علي الواتساب https://whatsapp.com/channel/0029Vb2jDpaIXnlnpxUJ5a1x تابع قناة السودان علي تلغرام https://t.me/sudaaan